1 O gafa nei o Arona ma Mose i le aso na fetalai mai ai le ALI‘I ‘iā Mose i le mauga o Sinai.
2 O igoa fo‘i nei o atali‘i o Arona; o Natapu o le ulumatua ia, ma Aviu, o Eleasaro, ma Itamaro.
3 O igoa ia o atali‘i o Arona, o ositaulaga na fa‘au‘uina, ē na tofia e ia e fai le faiva o ositaulaga.
4 A ‘ua oti Natapu ma Aviu i luma o le ALI‘I ‘ina o la fa‘alatalata ma le afi ‘ese i luma o le ALI‘I i le vao o Sinai, ‘ua leai fo‘i ni a la fānau; ‘ona fai ai lea o le faiva o ositaulaga e Eleasaro ma Itamaro i luma o lo la tamā o Arona.
5 ‘Ua fetalai mai fo‘i le ALI‘I ‘iā Mose, ‘ua fa‘apea mai:
6 ‘Ia e fa‘alatalata mai le itū‘āiga o Levi, ma tu‘uina atu i latou i luma o Arona le ositaulaga, ‘ina ‘ia latou ‘au‘auna ‘iā te ia.
7 Latou te tausi ana mea e tausia ma mea e tausia e le fa‘apotopotoga uma lava i luma o le fale fetāfa‘i o le fa‘apotopotoga, e ‘au‘auna ai i le galuega o le malumalu.
8 Latou te tausia fo‘i mea uma o i le fale fetāfa‘i o le fa‘apotopotoga, ma mea e tausia e le fānauga a Isaraelu, e ‘au‘auna ai i le galuega o le malumalu.
9 ‘E te avatua sa Levī ‘iā Arona ma ona atali‘i; ‘ua matua avatua lava i latou ‘iā te ia a‘i le fānauga a Isaraelu.
10 ‘E te tofia fo‘i Arona ma ona atali‘i, latou te tausia lo latou faiva o ositaulaga; o le tagata ‘ese fo‘i e fa‘alatalata i ai e fasiotia o ia.
11 ‘Ua fetalai mai fo‘i le ALI‘I ‘iā Mose, ‘ua fa‘apea mai:
12 O a‘u fo‘i, fa‘auta, ‘ua ‘ou ‘avea sa Levī a‘i le fānauga a Isaraelu e fai ma sui o ulumatua uma lava, o ē mua‘i fānauina i le fānauga a Isaraelu; e fai fo‘i mo‘u o sa Levi;
13 auā o ulumatua uma lava mo a‘u lava i latou; o le aso na ‘ou fasi ai ulumatua uma i le nu‘u o Aikupito na ‘ou fa‘asāina ai mo a‘u o ulumatua uma lava a Isaraelu, o tagata ‘atoa fo‘i ma manu; mo a‘u lava i latou; o a‘u o le ALI‘I.
14 ‘Ua fetalai mai fo‘i le ALI‘I ‘iā Mose i le vao o Sinai, ‘ua fa‘apea mai:
15 ‘Ia e faitauina le fānauga a Levi i ‘āiga o latou tamā, i o latou ‘āiga; o tane uma lava, ‘ia e faitauina i latou e āfua mai i ē ‘ua tasi lo latou masina ‘atoa ma ē ‘ua matutua ai.
16 ‘Ona faitau ai lea e Mose ‘iā te i latou, e tusa ma le afioga a le ALI‘I, e pei ‘ona poloa‘iina mai ai o ia.
17 O atali‘i ia o Levi; o latou igoa, o Keresoma, ma Koato, ma Merari.
18 O igoa nei o atali‘i o Keresoma i o la ‘āiga; o Lepeni ma Semi.
19 o atali‘i fo‘i o Koato i o latou ‘āiga; o Amaramo, ma Isara, o Heperona, ma Usialu.
20 O atali‘i fo‘i o Merari i o la ‘āiga; o Maali ma Muse o ‘āiga ia o sa Levī i ‘āiga o latou tamā.
21 Na tutupu mai ‘iā Keresoma, o le ‘āiga o sa Lepenī ma le ‘āiga o sa Semī; o ‘āiga ia o sa Keresoma.
22 O i latou na faitaulia, o le aofa‘i o tane uma, e āfua mai i ē ‘ua tasi lo latou masina ‘atoa ma ē ‘ua matutua ai, o i latou lava na faitaulia, e fitu o afe ma le lima o selau.
23 E tolauapi ‘āiga o sa Keresoma i tua o le malumalu i le itū i sisifo.
24 O le ali‘i sili fo‘i o le ‘āiga o le tamā o sa Keresoma, o Eliasafo lea o le atali‘i o Laeli.
25 O mea fo‘i nei e tausia e le fānauga ā Keresoma i le fale fetāfa‘i o le fa‘apotopotoga, o le malumalu, ma le fale fetāfa‘i, ma lona ufiufi, ma le puipui tautau o le faitoto‘a o le fale fetāfa‘i o le fa‘apotopotoga,
26 O ‘ie puipui fo‘i o le lotoā, ma le puipui tautau o le faitoto‘a o le lotoā, o le ‘ua felāta‘i ma le malumalu e felāta‘i fo‘i ma le fatafaitaulaga e fa‘ata‘ali‘oli‘o ai, ma ona maea e fai a‘i ona sauniga uma.
27 Na tutupu mai ‘iā Koato o le ‘āiga o sa Amaramō, ma le ‘āiga o sa Isarā, ma le ‘āiga o sa Heperonā, ma le ‘āiga o sa Usialū; o ‘āiga ia o sa Koatō.
28 O le aofa‘i fo‘i o tane uma lava, e āfua mai i ē ‘ua tasi lo latou masina ‘atoa ma ē ‘ua matutua ai, e valu o afe ma le ono o selau, o lo‘o tausi i le tausiga o le mea pa‘ia.
29 E tolauapi ‘āiga o le fānauga a Koato i le itū i saute o le malumalu.
30 O le ali‘i sili o le ‘āiga o le tamā o ‘āiga o sa Koatō o Elisafano lea o le atali‘i o Usialu.
31 O mea fo‘i latou te tausia, o le ‘atola‘au, ma le la‘o‘ai, ma le tu‘ugālamepa, ma fatafaitaulaga, ma mea o i le mea pa‘ia latou te ‘au‘auna a‘i, ma le puipui tautau ma mea uma e fai a‘i ona sauniga.
32 O Eleasaro le atali‘i o Arona le ositaulaga e fai o ia ma ali‘i sili i ali‘i sili o sa Levi, na te pule i ē ‘ua tausi le tausiga o le mea pa‘ia.
33 Na tutupu mai ‘iā Merari o le ‘āiga o sa Maalī ma le ‘āiga o sa Musē; o ‘āiga ia o sa Merari.
34 O i latou fo‘i na faitaulia, o le aofa‘i o tane uma lava, e āfua mai i ē ‘ua tasi lo latou masina ‘atoa ma ē ‘ua matutua ai, e ono o afe ma le lua o selau.
35 O le ali‘i sili o le ‘āiga o le tamā o ‘āiga o sa Merari, o Surielu lea o le atali‘i o Aviaila; e tolauapi i latou i le itū i matū o le malumalu.
36 O le tofi o le fānauga a Merari latou te tausia laupapa o le malumalu, ma ona fa‘alava, ma ona pou, ma ona lago, ma ana mea uma, ma mea uma e fai a‘i ona sauniga.
37 O pou fo‘i o le lotoā e fa‘ata‘ali‘oli‘o ai, ma o latou lago, ma o latou fa‘amau, ma o latou maea.
38 A o ē tolauapi i luma o le malumalu i le itū i sasa‘e, i luma lava o le fale fetāfa‘i o le fa‘apotopotoga i le itū i sasa‘e, o Mose lea, ma Arona, ma ona atali‘i, o ē tausi le tausiga o le malumalu ‘ona o mea e tausia e le fānauga a Isaraelu; a o le tagata ‘ese e fa‘alatalata i ai e fasiotia lava ia.
39 O sa Levī ‘atoa uma ē na faitaulia, o i latou na faitaulia e Mose ma Arona e tusa ma le afioga a le ALI‘I, i o latou ‘āiga, o tane uma lava, e āfua mai i ē ‘ua tasi lo latou masina ‘atoa ma ē ‘ua matutua ai, e lua sefulu o afe ma afe e lua.
40 ‘Ua fetalai mai fo‘i le ALI‘I ‘iā Mose: ‘Inā faitau mai ia o tane ulumatua uma lava o le fānauga a Isaraelu, e āfua mai i ē ‘ua tasi lo latou masina ‘atoa ma ē ‘ua matutua ai, ma ē faitauina o latou igoa.
41 ‘Ia e ‘aumai fo‘i sa Levī e fai mo a‘u, (O a‘u o le ALI‘I) e sui a‘i ulumatua uma lava o le fānauga a Isaraelu, o manu fo‘i o sa Levī e sui a‘i ulumatua uma lava o manu a le fānauga a Isaraelu.
42 ‘Ona faitau mai ai lea e Mose, e pei ‘ona poloa‘i mai ai o le ALI‘I ‘iā te ia, o ulumatua uma lava o le fānauga a Isaraelu.
43 O tane ulumatua uma lava, o le aofa‘i o latou igoa, e āfua mai i ē ‘ua tasi lo latou masina ‘atoa ma ē ‘ua matutua ai, o i latou lava na e faitaulia, e lua sefulu o afe ma afe e lua ma le lua o selau ma le fitu o sefulu ma le tolu.
44 ‘Ua fetalai mai fo‘i le ALI‘I ‘iā Mose, ‘ua fa‘apea mai:
45 ‘Inā ‘aumai ia o sa Levī e sui a‘i ulumatua uma o le fānauga a Isaraelu, o manu fo‘i o sa Levī e sui a‘i a latou manu; e fai fo‘i sa Levī mo a‘u. O a‘u lava o le ALI‘I.
46 A o i latou o le a fa‘atauina e lua o selau ma le fitu o sefulu ma le tolu o ulumatua o le fānauga a Isaraelu o ē ‘ua sili ‘ona to‘atele i sa Levī;
47 ‘e te talia mai ai e ta‘ilima a latou sekeli, o le sekeli lea a le malumalu ‘e te talia mai ai; e luafulu o kire o le sekeli lea.
48 O tupe fo‘i e fa‘atauina a‘i i latou ‘ua sili i le faitau, ‘e te foa‘iina atu ai ‘iā Arona ma ona atali‘i.
49 ‘Ona talia mai ai lea e Mose o tupe o le tau o ē na totoe na sili i ē na suia e sa Levī.
50 ‘Ua talia mai e ia tupe mai ulumatua o le fānauga a Isaraelu; o sekeli e tasi le afe ma le tolu o selau ma le ono o sefulu ma le lima; o le sekeli lea a le malumalu.
51 ‘Ua avane fo‘i e Mose o tupe o ē na fa‘atauina ‘iā Arona ma ona atali‘i, e tusa ma le afioga a le ALI‘I, e pei ‘ona poloa‘i mai ai o le ALI‘I ‘iā Mose.