1 ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai:
2 ‘Ia ‘oulua faitauaofa‘iina le fānauga a Koato mai le fānauga a Levī; i o latou ‘āiga, i ‘āiga o latou tamā,
3 e āfua mai i ē ‘ua tolu sefulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, ‘atoa uma o ē ō atu e ‘au‘auna e fai ai le galuega i le fale fetāfa‘i o le fa‘apotopotoga.
4 O le galuega lenei a le fānauga a Koato i le fale fetāfa‘i o le fa‘apotopotoga, i mea e sili ‘ona pa‘ia.
5 Auā pe a alu le toagalauapi, ‘ona ō ane ai lea o Arona ma ona atali‘i, ma ‘ave ifo le ‘ie puipui, ma latou ufiufi a‘i le ‘atola‘au o le tulafono.
6 E tu‘u fo‘i e i latou i ona luga le ufiufi pa‘u takesa, ma folasia ai i ona luga le ‘ie e uli uma lava, latou te sulu ai fo‘i ona amo.
7 Latou te folasia fo‘i le ‘ie uli i luga o le la‘o‘ai o areto e laulauina i luma, ma latou fa‘ae‘e i ona luga o tanoa salalafa, ma ipu, ma ipu e asu a‘i, ma tanoa e sasa‘a ai; e i ai fo‘i i ona luga le areto tumau;
8 latou te fofola fo‘i i luga o ia mea le ‘ie mūmū, latou te ufitia fo‘i lea i le ufiufi pa‘u takesa, ‘ona latou sulu ai lea o ona amo.
9 Latou te avane fo‘i le ‘ie uli, ma ufiufi a‘i le tu‘ugālamepa, ma ona lamepa, ma ona selelamepa, ma ona tu‘ugāmatapa‘u o le afi, ma ona tu‘ugāu‘u uma lava, latou te fai a‘i ona sauniga;
10 latou te tu‘u ai fo‘i ma ana mea uma i totonu o le ufiufi pa‘u tekesa, ma tu‘u ai i luga o se amo.
11 Latou te fofola fo‘i le ‘ie uli i luga o le fata auro e fai ai taulaga, ma ufitia lea mea i le ufiufi pa‘u takesa, ‘ona latou sulu ai lea o ona amo.
12 Latou te ‘ave fo‘i mea uma lava e fai a‘i le galuega latou te ‘au‘auna a‘i i le malumalu, ma tu‘u ai i le ‘ie uli, ma latou ufitia ai i le ufiufi pa‘u takesa, ma tu‘u ai i luga o se amo.
13 Latou te ‘ave ‘ese fo‘i le lefulefu mai le fatafaitaulaga, ma fofola i ona luga le ‘ie pauli.
14 Latou te tu‘u i ona luga ana mea uma ‘ua latou fai a‘i ona sauniga, o salefu, ma tui, ma suō, ma ipu; o mea uma o le fatafaitaulaga; latou te folasia fo‘i i ona luga le ufiufi pa‘u takesa, ma sulu ai ona amo.
15 Pe a uma fo‘i ‘ona ufiufitia e Arona ma ona atali‘i o le mea pa‘ia ma mea uma o i le mea pa‘ia, auā o le toagalauapi o le a alu, mulimuli ane ‘ona ulu ane ai lea o le fānauga a Koato e ‘ave ai; ‘ae ‘aua ne‘i latou papa‘i atu i se mea pa‘ia, ne‘i latou oti.O avega ia a le fānauga a Koato i le fale fetāfa‘i o le fa‘apotopotoga.
16 E ia Eleasaro le atali‘i o Arona le ositaulaga le pule i le suāu‘u e mū ai le afi, ma mea manogi lelei o mū, ma le taulaga i mea e ‘ai e fai so‘o, ma le suāu‘u e fa‘au‘u a‘i; e i lana pule le malumalu uma, ma mea uma ‘ua i le mea pa‘ia, ‘atoa ma ana mea.
17 ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai:
18 ‘Aua ne‘i lua vavae‘eseina le ‘āiga o sa Koatō i sa Levī;
19 a o le mea lenei lua te faia ‘iā te i latou, ‘ina ‘ia latou ola, ‘ia latou le oti, pe a latou fa‘alatalata i mea e sili ‘ona pa‘ia; ‘ia ulu atu Arona ma ona atali‘i, ma ‘ia latou totofi ‘iā te i latou o le tagata ma lana galuega ma lana avega.
20 ‘Ae ‘aua ne‘i latou ulu atu o matamata ai i sina ‘emo lava i mea pa‘ia, ‘ina ne‘i latou oti.
21 ‘Ua fetalai mai fo‘i le ALI‘I ‘iā Mose, ‘ua fa‘apea mai:
22 ‘Ia e faitauaofa‘iina le fānauga a Keresoma, o i latou lava i ‘āiga o latou tamā, i o latou ‘āiga;
23 e āfua mai i ē ‘ua tolugafulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, ‘e te faitaulia i latou, o i latou uma lava o ē ō atu e ‘au‘auna, e fai ai le galuega i le fale fetāfa‘i o le fa‘apotopotoga.
24 O le galuega fo‘i lenei a ‘āiga sa Keresomā latou te faia, ma latou avega;
25 latou te ‘ave ‘ie puipui o le malumalu ma le fale fetāfa‘i o le fa‘apotopotoga, o lona ufiufi, ma le ufiufi pa‘u takesa o lo‘o i ona lava luga, ma le ‘ie puipui o le faitoto‘a o le fale fetāfa‘i o le fa‘apotopotoga,
26 o ‘ie puipui fo‘i o le lotoā, ma le ‘ie puipui o le pupuni o le faitoto‘a o le lotoā, o le ‘ua felāta‘i ma le malumalu e felāta‘i fo‘i ma le fatafaitaulaga e fa‘ata‘ali‘oli‘o ai, ma o latou maea, ma mea uma o latou sauniga, ma mea uma e faia mo i latou; o la latou galuega lea.
27 O le ‘upu a Arona ma ona atali‘i e fai ai e le fānauga a sa Keresoma a latou galuega uma, ‘iā latou avega uma ma a latou galuega uma; tou te totofi lava ‘iā te i latou i le tausiga o a latou avega uma.
28 O le galuega lea a ‘āiga o le fānauga a sa Keresomā i le fale fetāfa‘i o le fa‘apotopotoga; o a latou mea e tausi fo‘i e i le pule lea a Itamaro le atali‘i o Arona le ositaulaga.
29 ‘E te faitaulia le fānauga a sa Merarī, i o latou ‘āiga, i ‘āiga o latou tamā;
30 e āfua mai i ē ‘ua tolugafulu o latou tausaga ‘atoa ma ē ‘ua matutua ai, e o‘o i ē ‘ua limagafulu o latou tausaga, ‘e te faitaulia i latou, o i latou uma lava o ē ō atu e ‘au‘auna, e fai ai le galuega o le fale fetāfa‘i o le fa‘apotopotoga.
31 O le tausiga lenei o a latou avega, ‘iā latou galuega uma i le fale fetāfa‘i o le fa‘apotopotoga; o laupapa o le malumalu, ma ona fa‘alava, ma ona pou, ma ona lago,
32 o pou fo‘i o le lotoā e fa‘ata‘ali‘oli‘o ai, ma o latou lago, ma o latou fa‘amau, ma o latou maea, ma a latou mea uma, ma o latou sauniga uma; tou te faitauina atu fo‘i i o latou igoa o mea uma o le tausiga o a latou avega.
33 O le galuega lea a ‘āiga o le fānauga a sa Merarī, i la latou galuega uma i le fale fetāfa‘i o le fa‘apotopotoga; e i le pule lea a Itamaro le atali‘i o Arona le ositaulaga.
34 ‘Ua faitaulia fo‘i e Mose, ma Arona, ma ali‘i sili o le fa‘apotopotoga o le fānauga a sa Koatō, i o latou ‘āiga, i ‘āiga fo‘i o latou tamā,
35 e āfua mai i ē ‘ua tolu sefulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, o i latou uma lava o ē ō atu e ‘au‘auna i le galuega i le fale fetāfa‘i o le fa‘apotopotoga,
36 o i latou fo‘i na faitaulia i o latou ‘āiga, e lua afe ma le fitu o selau ma le lima sefulu.
37 O i latou ia na faitaulia o ‘āiga o sa Koatō, o i latou uma e ‘au‘auna i le fale fetāfa‘i o le fa‘apotopotoga, o ē na faitaulia e Mose ma Arona e tusa ma le afioga a le ALI‘I ‘iā Mose.
38 O i latou fo‘i na faitau ia o le fānauga a Keresoma i o latou ‘āiga, i ‘āiga fo‘i o latou tamā,
39 e āfua mai i ē ‘ua tolu sefulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, o i latou uma lava o ē ō atu e ‘au‘auna i le galuega i le fale fetāfa‘i o le fa‘apotopotoga,
40 o i latou lava na faitauina i o latou ‘āiga, i ‘āiga o latou tamā, e lua afe ma le ono selau ma le tolu sefulu.
41 O i latou ia na faitaulia i ‘āiga o le fānauga a Keresoma, o i latou uma e ‘au‘auna i le fale fetāfa‘i o le fa‘apotopotoga, o ē na faitaulia e Mose ma Arona e tusa ma le afioga a le ALI‘I.
42 O i latou fo‘i na faitaulia i ‘āiga o fānauga a Merari, i o latou ‘āiga, i ‘āiga o latou tamā,
43 e āfua mai i ē ‘ua tolu sefulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, o i latou uma lava o ē ō atu e ‘au‘auna i le galuega i le fale fetāfa‘i o le fa‘apotopotoga.
44 O i latou lava na faitaulia i o latou ‘āiga, e tolu afe ma le lua o selau.
45 O i latou lava ia na faitaulia i ‘āiga o le fānauga a Merari, o ē na faitaulia e Mose ma Arona e tusa ma le afioga a le ALI‘I ‘iā Mose.
46 O i latou uma lava na faitaulia i sa Levī; o i latou na faitaulia e Mose, ma Arona, ma ali‘i sili o Isaraelu, i o latou ‘āiga, i ‘āiga fo‘i o latou tamā,
47 e āfua mai i ē ‘ua tolu sefulu o latou tausaga ‘atoa ma ē ‘ua matutua ai, e o‘o i ē ‘ua lima sefulu o latou tausaga, o i latou uma lava o ē ō atu e ‘au‘auna i fe‘au o le galuega, ma le galuega i avega i le fale fetāfa‘i o le fa‘apotopotoga.
48 O i latou lava na faitaulia o i latou, e valu afe ma le lima selau ma le valu sefulu.
49 Na faitaulia i latou e Mose e tusa ma le afioga a le ALI‘I, o le tagata ma lana galuega, ma lana avega; na faitaulia lava i latou e ia, e pei ‘ona poloa‘i mai ai o le ALI‘I ‘iā Mose.