1 ‘Ona ō atu lea o le fānauga a Isaraelu, ma latou tolauapi i le ‘ele‘ele laugatasi o Moapi, i le itū mai o Ioritana e fesagai ma Ieriko.
2 ‘Ua iloa e Palako le atali‘i o Seporu mea uma na faia e Isaraelu i sa Amorī.
3 ‘Ona matuā fefe lea o Moapi ‘ona o le nu‘u, auā e to‘atele i latou; ‘ua atuatuvale fo‘i Moapi ‘ona o le fānauga Isaraelu.
4 ‘Ona fai atu ai lea o Moapi i toeaina o Mitiana, “‘Anei e fa‘aumatia e lenei vao tagata o mea uma ‘ua vagavagaia i tatou, e pei ona ‘aina e le povi o le vao o le fanua.” O Palako fo‘i le atali‘i o Seporu, o le tupu ia o Moapi i ia ona po.
5 ‘Ona ‘a‘auina atu ai lea e ia o le sāvali ‘iā Palaamo le atali‘i o Peoro, i Petoru o lo‘o latalata ane i le vaitafe i le lau‘ele‘ele o lona nu‘u, e ‘a‘ami ‘iā te ia, ‘ua fa‘apea atu, “Fa‘auta, ‘ua ō mai le tasi nu‘u mai Aikupito; fa‘auta, ‘ua ufitia le fogā‘ele‘ele ‘iā i latou; o lo‘o nonofo fo‘i i latou o feagai ma a‘u.
6 O lenei, se‘i e maliu mai, ‘ia e fetu‘uina lenei nu‘u mo a‘u, auā e sili lo latou malosi i lo‘u; atonu ‘e te mafai ai ‘ona fafasi ‘iā te i latou, ma tutuli ‘iā te i latou a‘i le nu‘u; auā ‘ua ‘ou iloa o lē ‘e te fa‘amanuia ‘ua manuia lea, ma lē ‘e te fetu‘uina ‘ua malaia lea.”
7 ‘Ona ō ai lea o toeaina o Moapi, ma toeaina o Mitiana, sa i o latou lima fo‘i o totogi o togafiti a le taulāitu; ‘ona o‘o atu lea o i latou ‘iā Palaamo, ma fai atu ‘iā te ia o ‘upu a Palako.
8 ‘Ona fai atu ai lea o ia ‘iā te i latou, “‘Ia ‘outou tofafā ‘i‘inā i le po nei, ‘ou te ‘aumai ai se ‘upu ‘iā te ‘outou e fetalai mai ai le ALI‘I ‘iā te a‘u.” Ona nonofo ai lea o ali‘i o Moapi ma Palaamo.
9 ‘Ona afio mai lea o le Atua ‘iā Palaamo, ‘ua fa‘apea mai, “O ai ‘ea ia tagata o ‘iā te oe?”
10 ‘Ona fa‘apea atu ai lea o Palaamo i le Atua, “O Palako le atali‘i o Seporu, o le tupu o Moapi, ‘ua ia fe‘au mai ‘iā te a‘u, ‘ua fa‘apea mai,
11 ‘Fa‘auta, ‘ua ō mai le tasi nu‘u mai Aikupito, ‘ua ufitia ai le fogā‘ele‘ele o lenei, ‘inā e sau ia, ‘ia e fetu‘uina i latou mo a‘u; atonu ‘ou te mafai ai ‘ona tau ma i latou, ma tutuli ‘ese ‘iā te i latou.’”
12 ‘Ona fetalai mai ai lea o le Atua ‘iā Palaamo, “‘Aua tou te ō ma i latou; ‘aua fo‘i ‘e te fetu‘u i le nu‘u; auā ‘ua fa‘amanuia i latou.”
13 ‘Ona tula‘i lea o Palaamo i le taeao, ‘ua fa‘apea atu i ali‘i mai ‘iā Palako, “‘Inā maliu atu ia i lo ‘outou nu‘u, auā e lē mafai i le ALI‘I ‘ona tu‘u ‘iā te a‘u e ō ma ‘outou.”
14 ‘Ona tula‘i ai lea o ali‘i o Moapi, ma latou ō atu ‘iā Palako, ‘ua fa‘apea atu, “E lē mafai Palaamo ‘ona matou ō mai.”
15 ‘Ona toe ‘a‘auina atu ai lea e Palako o ali‘i e sili ‘ona to‘atele ma le mamalu i ē na muamua.
16 ‘Ua latou o‘o ‘iā Palaamo, ma latou fa‘apea atu ‘iā te ia, “O lo‘o fa‘apea ‘ona fetalai mai o Palako le atali‘i o Seporu, ‘‘Ou te ‘ai‘oi atu ‘iā te oe, ‘aua ne‘i tāofia oe, a ‘ia e maliu mai lava ‘iā te a‘u;
17 auā ‘ou te matuā fa‘amaluali‘iina oe; o mea uma fo‘i ‘e te fai mai ai ‘iā te a‘u ‘ou te faia lava; o lenei, se‘i e maliu mai lava, ‘ia e fetu‘uina lenei nu‘u mo a‘u.’”
18 ‘Ona tali mai ai lea o Palaamo, ‘ua fa‘apea mai i ‘au‘auna a Palako, “‘Āfai e foa‘iina mai e Palako ‘iā te a‘u o ario ma auro e tumu ai lona fale, ‘ou te lē mafaia ‘ona soli le afioga a le ALI‘I lo‘u Atua e fai se mea itiiti, po o se mea tele.
19 O lenei, ‘ia nonofo ‘outou ‘i‘inā i lenei po, se‘ia ‘ou iloa pe se a se toe mea e fetalai mai ai le ALI‘I ‘iā te a‘u.”
20 ‘Ona afio mai lea o le Atua ‘iā Palaamo i le po, ‘ua fetalai mai ‘iā te ia, “‘Āfai ‘ua ō mai ia tagata e vala‘au ‘iā te oe, ‘ia e tula‘i, tou te ō ma i latou; ‘ae tau lava o le ‘upu ‘ou te fai atu ai ‘iā te oe, ia e faia lea.”
21 ‘Ona tula‘i ai lea o Palaamo i le taeao, ma fa‘anofoa lana asini, ‘ua ō fa‘atasi ma ali‘i o Moapi.
22 ‘Ona tupu ai lea o le to‘asā o le Atua ‘ina ‘ua alu o ia; ‘ua tu mai fo‘i le agelu a le ALI‘I i le ala e tete‘e ‘iā te ia. ‘Ua ti‘eti‘e o ia i lana asini, sa ‘iā te ia fo‘i ana ‘au‘auna e to‘alua.
23 ‘Ua iloa e le asini le agelu a le ALI‘I i le ala, sa i lona lima ana pelu ‘ua se‘i, ‘ona ‘alo ‘ese ai lea o le asini i le ala, ‘ua ui i le vao; ‘ona sasa ai lea o le asini e Palaamo e fa‘afo‘i ‘iā te ia i le ala.
24 A ‘ua tu le agelu a le ALI‘I i le ala vā apiapi i tōvine, sa ta‘itasi itū ala ‘aupā.
25 ‘Ua iloa e le asini le agelu a le ALI‘I, ‘ona ‘omia lea e ia o ia i le ‘aupā, na ‘omia fo‘i le vae o Palaamo i le ‘aupā; ‘ona toe sasa lea o ia i ai.
26 ‘Ona toe alu atu lea o le agelu a le ALI‘I, ma tu mai i le mea vā apiapi, e lē o i ai se ala, e ‘alo ‘ese ai i le itū taumatau, po o le itū tauagavale.
27 ‘Ua iloa e le asini le agelu a le ALI‘I, ‘ona ta‘oto ai lea o ia i lalo o Palaamo; ‘ona tupu ai lea o le ita o Palaamo, ma na sasa le asini i le la‘au.
28 ‘Ona fa‘agaganaina lea e le ALI‘I o le asini, i le ‘ua fai mai o ia ‘iā Palaamo, “Se a ‘ea se mea ‘ua ‘ou faia ‘iā te oe, na e sasa fa‘atolu mai ai ‘iā te a‘u?”
29 ‘Ona fai atu ai lea o Palaamo i le asini, “Auā ‘ua e fa‘a‘ono‘ono mai ‘iā te a‘u; se anoa ana i lo‘u lima se pelu po o pēnei ‘ua ‘ou fasimatea nei oe.”
30 ‘Ona fai mai ai lea o le asini ‘iā Palaamo, “E lē o lau asini ‘ea a‘u nei, ‘ua e ti‘eti‘e ai talu ‘ona e maua o a‘u ‘ua o‘o mai i le aso nei? o la‘u masani ‘ea ‘ona fai fa‘apea ‘iā te oe?”‘Ona fa‘apea atu ai lea o ia, “E leai lava.”
31 ‘Ona fa‘apupulaina lea e le ALI‘I o mata o Palaamo, ‘ona iloa ai lea e ia o le agelu a le ALI‘I o lo‘o tu i le ala, ‘ua i lona lima lana pelu ‘ua se‘i; ‘ona ifo ai lea o ia ‘ua fa‘apa‘ū faō.
32 ‘Ona fai mai ai lea o le agelu a le ALI‘I ‘iā te ia, “Se a ‘ea le mea ‘ua e sasa fa‘atolu ai lau asini fa‘auta, o a‘u nei ‘ua ‘ou sau e tete‘e ‘iā te oe, auā ‘ua leaga lava lou ala i o‘u luma.
33 Na iloa mai fo‘i a‘u e le asini, ma ‘alo ‘ese fa‘atolu ‘iā te a‘u; ana le ‘alo ‘ese o ia ‘iā te a‘u, po o pēnei ‘ua ‘ou fasiotia oe, ‘ae fa‘asao ‘iā te ia.”
34 ‘Ona fai atu ai lea o Palaamo i le agelu a le ALI‘I, “‘Ua ‘ou agasala, auā ‘ou te le‘i iloa ‘ua e tu mai oe i le ala e tete‘e ‘iā te a‘u; o lenei, ‘āfai ‘ua leaga ‘iā te oe le mea ‘ua ‘ou faia, ‘ou te toe fo‘i atu lava a‘u.”
35 ‘Ona fai mai ai lea o le agelu a le ALI‘I ‘iā Palaamo, “O pea ia ‘outou ma na tagata, ‘ae peita‘i tau o ‘upu ‘ou te fai atu ai ‘iā te oe ‘e te tautala a‘i.” ‘Ona ō ai lea o Palaamo ma ali‘i mai ‘iā Palako.
36 ‘Ua fa‘alogo Palako ‘ua sau Palaamo, ‘ona alu ai lea o ia e fa‘afetaia‘i ‘iā te ia i le tasi ‘a‘ai o Moapi, o le nu‘u tupito lea, o lo‘o i le tuā‘oi o Arinona.
37 ‘Ona fai mai ai lea o Palako ‘iā Palaamo, “Na ‘ou le matuā ‘a‘auina atu ‘ea nisi ‘iā te oe e ‘a‘ami ‘iā te oe se a ‘ea le mea na e lē sau ai ‘iā te a‘u? E moni ‘ea ‘ou te lē mafaia ‘ona fa‘amaluali‘iina oe?”
38 ‘Ona fai atu ai lea o Palaamo ‘iā Palako, “Fa‘auta, ‘ua ‘ou sau ‘iā te oe; o lenei, ‘ou te, mafaia ‘ea se ‘upu e tasi ‘ona fai atu o le ‘upu e tu‘u mai e le Atua i lo‘u gutu, ‘ou te fai atu ai lava.”
39 ‘Ona ō ai lea o Palaamo ma Palako, ‘ua la o‘o atu i Kiriatausota.
40 ‘Ua fasi fo‘i e Palako o povi ma mamoe, ‘ua ia avatu fo‘i le fe‘au ‘iā Palaamo ma ali‘i sa ‘iā te ia.
41 ‘Ua o‘o i le taeao, ‘ona ‘ave ai lea e Palako ‘iā Palaamo, ma la ō a‘e ma ia i mea maualuluga a Paala ‘ina ‘ia iloa atu ai e ia o le nu‘u ‘ia o‘o i ē aupito mamao.