1 ‘Ona o‘o ai lea o le fānauga a Isaraelu, o le fa‘apotopotoga uma i le vao o Tisina, i le masina muamua; ‘ona nonofo ai lea o le nu‘u i Katesa; ‘ua oti ai fo‘i Miriama, ma ‘ua tanu ai i lea mea.
2 E leai fo‘i ni vai mo le fa‘apotopotoga; ‘ona latou fa‘apotopoto mai ai lea e finau ‘iā Mose ma Arona.
3 ‘Ona finau mai lea o le nu‘u ‘iā Mose, ma latou fai mai ‘ua fa‘apea mai, “E lelei pe ‘ana matou oti ‘ina ‘ua ‘oti o matou uso i luma o le ALI‘I.
4 Se a ‘ea le mea ‘ua ‘oulua ‘aumai ai le fa‘apotopotoga a le ALI‘I i lenei vao, ‘ina ‘ia oti ai o i matou, ‘atoa fo‘i ma a matou manu?
5 Se a fo‘i le mea na ‘oulua ‘aveina a‘e ai i matou nai Aikupito, e fa‘ao‘o ‘iā te i matou i lenei mea leaga? e lē se mea o i ai ni fua, po o mati, po o vine, po o rimoni; e leai fo‘i ni vai e inu ai.”
6 ‘Ona ō ai lea o Mose ma Arona nai luma o le fa‘apotopotoga i le faitoto‘a o le fale fetāfa‘i o le fa‘apotopotoga; ‘ona la fa‘apa‘u‘ū faō ai lea; ‘ona fa‘aali mai ai lea o le pupula o le ALI‘I ‘iā te i lā‘ua.
7 ‘Ona fetalai mai lea o le ALI‘I ‘iā Mose, ‘ua fa‘apea mai:
8 ‘Ia e ‘ave le to‘oto‘o, ma ‘ia e aofa‘i mai le fa‘apotopotoga, o oe ma Arona lou uso, ma ‘ia ‘oulua tautala atu i le papa i o latou luma, ‘ona foa‘iina mai ai lea e ia o lona vai ‘e te fa‘atafe mai fo‘i le vai ‘iā te i latou ai le papa, ‘e te fa‘ainua fo‘i le fa‘apotopotoga, ‘atoa ma a latou manu.
9 ‘Ona ‘ave ai lea e Mose o le to‘oto‘o a‘i luma o le ALI‘I, e pei ‘ona poloa‘i mai ai o ia ‘iā te ia.
10 ‘Ona aofa‘i lea e Mose ma Arona o le fa‘apotopotoga i luma o le papa, ‘ona fai atu ai lea o ia ‘iā te i latou, “‘Inā fa‘alogologo mai ia o ‘outou ē ‘ua fouvale; ma te fa‘atāfeina mai ‘ea le vai a‘i lenei papa mo ‘outou?”
11 ‘Ona si‘i ai lea e Mose o lona lima, ma ta fa‘alua atu i le papa i lona to‘oto‘o; ‘ona tafe tele mai ai lea o le vai, ‘ona feinu ai lea o le fa‘apotopotoga ma a latou manu.
12 ‘Ona fetalai mai ai lea o le ALI‘I ‘iā Mose ma Arona, “Na ‘oulua lē fa‘atuatua ‘iā te a‘u, ‘ia fa‘apa‘iaina ai a‘u i luma o le fānauga a Isaraelu, o le mea lava lea lua te lē fa‘a‘o‘otia ai lenei fa‘apotopotoga i le nu‘u ‘ua ‘ou foa‘iina ‘iā te i latou.”
13 O le vai lenei o Meripa, auā na finau le fānauga a Isaraelu i le ALI‘I, na fa‘apa‘iaina fo‘i o ia i o latou luma.
14 ‘Ua tu‘u le sāvali e Mose a‘i Katesa i le tupu o Etoma e fai atu i ai, o lo‘o fa‘apea mai lou uso o Isaraelu, “‘Ua e silafia le tigā uma lava ‘ua o‘o ‘iā te i matou.
15 Na ō ifo o matou tamā i Aikupito, e tele fo‘i po na matou nonofo ai i Aikupito; a ‘ua agaleaga mai Aikupito ‘iā te i matou, ‘atoa ma o matou tamā.
16 ‘Ona matou ‘alalaga ai lea i le ALI‘I, na fa‘afofogaina fo‘i e ia o matou leo, na ‘auina mai fo‘i e ia le agelu, ma ‘ua ‘aumaia i matou a‘i Aikupito; fa‘auta fo‘i, o lo‘o i Katesa i matou, o le ‘a‘ai lea e tupito lava i le tuā‘oi o lou nu‘u.
17 Matou te ‘ai‘oi atu ‘iā te oe, ‘ia matou ui atu i lou nu‘u; matou te lē ui ane i fanua, po o tōvine, matou te lē feinu fo‘i i vai‘eli; o le ala tele o le tupu matou te ui atu ai; matou te lē afe ane i le itū taumatau po o le itū tauagavale, se‘ia matou tuana‘i atu le tuā‘oi o lou nu‘u.”
18 A ‘ua tali mai Etoma ‘iā te ia, “‘E te lē ui lava i lo‘u nu‘u, ne‘i ‘ou alu atu e tete‘e ‘iā te oe i le pelu.”
19 ‘Ona fai atu ai lea o le fānauga a Isaraelu ‘iā te ia, “O le ala tele matou te ui atu ai; ‘āfai fo‘i matou te feinu i ni ou vai, o a‘u nei ma a‘u manu, ‘ona ‘ou avatu ai lea o sona taui; e leai se tasi mea ‘ou te faia, nā ‘ona ui atu lava o‘u vae.”
20 ‘Ona tali mai ai lea o ia, “‘E te lē ui mai lava.” ‘Ona ō atu ai lea o Etoma ma tagata e to‘atele e tete‘e ‘iā te ia ma le lima malosi.
21 ‘Ua lē mafai lava ia Etoma ‘ona ui atu o Isaraelu, i lona nu‘u; ‘ona ‘alo ‘ese ai lea o Isaraelu ‘iā te ia.
22 ‘Ona ō ‘ese lea i Katesa o le fānauga a Isaraelu, o le fa‘apotopotoga uma, ‘ua o‘o atu i le mauga o Horo.
23 ‘Ua fetalai mai fo‘i le ALI‘I ‘iā Mose ma Arona i le mauga o Horo, i le tuā‘oi o le nu‘u o Etoma, ‘ua fa‘apea mai,
24 “E fa‘atasiina atu Arona i lona nu‘u; auā na te lē o‘o atu lava i le nu‘u na ‘ou foa‘iina atu i le fānauga a Isaraelu, auā ‘ua ‘oulua fouvale i la‘u ‘upu, i le vai o Meripa.
25 ‘Ia e ‘ave ‘iā Arona ma Eleasaro lona atali‘i, ma ‘ia ‘outou ō a‘e ma i lā‘ua i le mauga o Horo;
26 i le e tō ‘ese ai ‘ofu o Arona, ma fa‘a‘ofuina ai Eleasaro lona atali‘i; ‘ona fa‘atasiina atu lea o Arona i lona nu‘u, e oti lava o ia i lea mea.”
27 ‘Ona faia lava lea e Mose e pei ‘ona poloa‘i mai ai le ALI‘I; ‘ua latou ō a‘e i le mauga o Horo i luma o le fa‘apotopotoga uma.
28 ‘Ona tō ‘ese ai lea e Mose o ‘ofu o Arona, ma ‘ua fa‘a‘ofuina ai Eleasaro lona atali‘i; ‘ona oti ai lea o Arona i lea mea i le tumutumu mauga; ‘ona ō ifo lea o Mose ma Eleasaro i le mauga.
29 ‘Ua iloa e le fa‘apotopotoga uma ‘ua oti Arona, ‘ona fētāgisi ai lea o le ‘āiga uma lava o Isaraelu ‘ona o Arona i aso e tolugafulu.