1 O le masina e fitu, o le ulua‘i aso o le masina, ‘ia faia e ‘outou se fa‘apotopotoga pa‘ia; tou te lē fai ai se galuega mamafa e tasi; o le aso o le iligāpu lea ‘iā te ‘outou.
2 Tou te osia fo‘i se taulaga mū e fai ma mea manogi lelei i le ALI‘I; o le povi po‘a ta‘anoa e tasi, o le mamoe po‘a e tasi, ma tama‘i mamoe e fitu e tasi lo latou tausaga, e sao ‘ona lelei.
3 O a latou taulaga i mea e ‘ai, o falaoa lelei e palua ma le suāu‘u, e tolu omera i le povi po‘a; e lua omera i le mamoe po‘a;
4 o le omera e tasi i tama‘i mamoe ta‘itasi e fa‘atatau i tama‘i mamoe e fitu.
5 O le ‘oti po‘a e tasi, o le taulaga mo le agasala, e fai a‘i se togiola mo ‘outou;
6 E fa‘aopoopoina i le taulaga mū o le masina, ma lana taulaga i mea e ‘ai, ‘atoa ma le taulaga mū e lē aunoa, ma lana taulaga i mea e ‘ai, ma a latou taulaga i mea e inu e tusa ma a latou sauniga, e fai ma mea manogi lelei, o le taulaga e fai i le afi i le ALI‘I.
7 ‘Ia faia e ‘outou le fa‘apotopotoga pa‘ia i le aso e sefulu o lea masina e fitu, ‘ia fa‘apuapuagātia ai ‘outou e ‘outou, tou te lē fai ai se galuega e tasi.
8 Tou te avatua fo‘i se taulaga mū i le ALI‘I, o le mea manogi lelei; o le povi po‘a ta‘anoa e tasi, ma le mamoe po‘a e tasi, ma tama‘i mamoe e fitu e tasi lo latou tausaga,
9 ‘ia sao ‘ona lelei mo ‘outou o a latou taulaga i mea e ‘ai, o falaoa lelei e palua ma le suāu‘u, e tolu omera i le povi po‘a; e lua omera i le mamoe po‘a e tasi;
10 o le omera e tasi i tama‘i mamoe ta‘itasi e fa‘atatau i tama‘i mamoe e fitu.
11 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mo le agasala e fai a‘i togiola, ‘atoa ma le taulaga mū e lē aunoa, ma lana taulaga i mea e ai, ma a la taulaga i mea e inu.
12 ‘Ia faia fo‘i e ‘outou le fa‘apotopotoga pa‘ia i le aso e sefulu ma le lima o le masina e fitu, tou te lē fai ai se galuega mamafa e tasi; ‘ae tou te faia le tausamiga i le ALI‘I i aso e fitu.
13 Tou te avatua fo‘i se taulaga mū, o le taulaga e fai i le afi, o le mea manogi lelei i le ALI‘I, o povi po‘a ta‘anoa e sefulu ma le tolu, o mamoe po‘a e lua, ma tama‘i mamoe e sefulu ma le fa o tasi lo latou tausaga, e sao ‘ona lelei i latou.
14 O latou taulaga i mea e ‘ai, o falaoa lelei e palua ma le suāu‘u, e tolu omera i povi po‘a ta‘itasi e fa‘atatau i povi po‘a e sefulu ma le tolu; e lua omera i mamoe po‘a ta‘itasi e fa‘atatau i mamoe po‘a e lua.
15 O le omera e tasi i tama‘i mamoe ta‘itasi e fa‘atatau i tama‘i mamoe e sefulu ma le fa.
16 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.
17 O lona lua o aso tou te avatua ai o povi po‘a ta‘anoa e sefulu ma le lua, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
18 O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe ‘ia fa‘atatauina i lo latou faitau, e tusa ma le sauniga.
19 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai, ma a la taulaga i mea e inu.
20 O lona tolu fo‘i o aso, o povi po‘a e sefulu ma le tasi, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
21 O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.
22 O le ‘oti po‘a e tasi e fai ma taulaga mo le agasala, o fa‘aopoopoina i le taulaga mū e lē aunoa, ma lana taulaga i mea e ‘ai, ma lana taulaga i mea e inu.
23 O lona fa fo‘i o aso, o povi po‘a e sefulu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
24 O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, o fa‘atatau i lo latou faitau, e tusa ma le sauniga.
25 O le ‘oti po‘a e tasi e fai ma taulaga mo le agasala e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.
26 O lona lima fo‘i o aso, o povi po‘a e iva, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
27 O la latou taulaga fo‘i i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.
28 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai, ma lana taulaga i mea e inu.
29 O lona ono fo‘i o aso, o povi po‘a e valu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
30 O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.
31 O le ‘oti po‘a e tasi e fai ma taulaga mo le agasala, e fa‘aopoopoina i taulaga mū e lē aunoa o lana taulaga i mea e ‘ai, ma lana taulaga i mea e inu.
32 O lona fitu fo‘i o aso, o povi po‘a e fitu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.
33 O la latou taulaga fo‘i i mea o ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.
34 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.
35 O lona valu fo‘i o aso ‘ia faia e ‘outou le fa‘apotopotoga, tou te lē fai ai se galuega mamafa e tasi;
36 ‘ae tou te avatua ai se taulaga mū, o le taulaga, e fai i le afi, o le mea manogi lelei i le ALI‘I; o povi po‘a e tasi, o le mamoe po‘a e tasi, ma tama‘i mamoe e fitu e tasi lo latou tausaga, e sao ‘ona lelei.
37 O la latou taulaga i mea e ‘ai, ma a latou taulaga i mea e inu, i le povi po‘a, ma le mamoe po‘a, ma tama‘i mamoe, ia fa‘atatauina i lo latou faitau, ‘ia tusa ma le sauniga.
38 O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai ma lana taulaga i mea e inu.
39 O taulaga ia tou te osia i le ALI‘I i o ‘outou tausamiga, e fa‘aopoopoina i mea ‘ua ‘outou tautō ai, ma taulaga ‘ua ‘outou loto ‘ina fai, e fai ma a ‘outou taulaga mū ma a ‘outou taulaga i mea e le ai ma a ‘outou taulaga i mea e inu, ma a ‘outou taulaga fa‘afetai.
40 ‘Ua fai atu fo‘i Mose i le fānauga a Isaraelu e tusa ma mea uma na fetalai mai ai le ALI‘I ‘iā Mose.