1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Inā fai atu ia i le fānauga a Isaraelu ‘ia latou ‘au‘eseina i le toagalauapi o ē lepela uma, ma i latou uma o i ai le gau, ma i latou uma ‘ua leaga i le tagata oti;
3 tou te ‘au‘eseina le tane ‘atoa ma le fafine, tou te ‘au‘eseina atu i latou i tua lava o le toagalauapi; ‘ina ne‘i leaga ‘iā te i latou o a latou toagalauapi ‘ou te nofo ai a‘u.
4 ‘Ona fa‘apea lava lea ‘ona faia e le fānauga a Isaraelu, ‘ua latou ‘au‘eseina i latou i tua o le toagalauapi; e pei ‘ona fetalai mai le ALI‘I ‘iā Mose, ‘ua fa‘apea lava ‘ona faia e le fānauga a Isaraelu.
5 ‘Ua fetalai mai fo‘i le ALI‘I ‘iā Mose, ‘ua fa‘apea mai:
6 ‘Ia e fai atu i le fānauga a Isaraelu, Pe a faia e se tane po o se fafine se agasala o agasala uma a tagata e soli ai tulafono a le ALI‘I, ma nofo sala ai lea tagata;
7 e fa‘aali lava e ia lana agasala na ia faia, na te taui atu fo‘i lana agasala i lona ‘ato‘atoa, ma fa‘aopoopo i ai o lona vaega e lima, ma avatu ai i lē na ia agasala i ai.
8 ‘Ae ‘āfai e leai se ‘āiga o le tagata e taui atu i ai le agasala, ‘ia avatu le taui o le agasala i le ALI‘I, i le ositaulaga lava, e fa‘aopoopo ai i le mamoe po‘a e togiola a‘i, e fai a‘i se togiola mo ia.
9 O taulaga si‘i uma lava i mea pa‘ia uma a le fānauga a Isaraelu e ‘aveina atu ai e i latou i le ositaulaga, e fai māna lava ia.
10 O mea pa‘ia a tagata ta‘itasi e fai māna lava ia; ai se mea e foa‘iina e se tagata i le ositaulaga e fai māna lava ia.
11 ‘Ua fetalai mai fo‘i le ALI‘I ‘iā Mose, ‘ua fa‘apea mai:
12 ‘Ia e fai atu i le fānauga a Isaraelu, ‘ia fa‘apea atu ‘iā te i latou, ‘Ai se tane ‘ua alu lana avā, ma agaleaga ‘iā te ia,
13 ‘ua la momoe ma le tasi tane, ‘ae le‘i iloa e lana tane, ‘ua lilo lava, ‘ua leaga ai o ia, ‘ae leai sē na te molimau ‘iā te ia, e le‘i maua fo‘i o ia;
14 ‘āfai e o‘o le loto fuā ‘iā te ia, ma ‘ua fuā o ia i lana avā, ‘ua leaga fo‘i le fafine; pe o‘o le loto fuā ‘iā te ia, ma ‘ua fuā ia i lana avā, ‘ae le‘i leaga le fafine;
15 ‘ia avatu e le tagata lana avā i le ositaulaga, ‘ia avatu fo‘i e ia lana taulaga ma lana avā, o le omera o falaoa karite; ‘ae ‘aua na te sasa‘a i ai ni suāu‘u, ‘aua fo‘i na te avane i ai pulu lipano; auā o le taulaga o le fuā lea, o le taulaga e fa‘amanatu a‘i, o lo‘o fa‘amanatuina ai le agasala.
16 ‘Ona fa‘alatalataina ai lea o ia e le ositaulaga, ma tu‘uina atu o ia i luma o le ALI‘I;
17 e ‘ave fo‘i e le ositaulaga ni vai pa‘ia i le ipu ‘omea, e ‘ave fo‘i e le ositaulaga ni efuefu a‘i le efuefu o i le loto fale o le malumalu, ma tu‘u i le, vai;
18 ‘ona tu‘uina atu lea e le ositaulaga o le fafine i luma o le ALI‘I, ma tō ‘ese le ufiufi i le ulu o le fafine, e tu‘u fo‘i e ia i ona lima le taulaga e fa‘amanatu a‘i, o le taulaga o le fuā lea; e i le lima fo‘i o le ositaulaga le vai ‘o‘ona e malaia ai;
19 ‘ona fai atu ai lea o le ositaulaga i le fafine ‘ia tautō mai, ‘ua fa‘apea atu ‘iā te ia, “‘Āfai e leai se tane ‘ua ‘oulua momoe ma oe, ‘āfai fo‘i ‘ua e lē alu ‘ese, ‘ua e lē leaga oe i se tasi e lē o lau tane, ‘ia sao oe i lenei vai ‘o‘ona e malaia a‘i.
20 ‘Ae ‘āfai ‘ua e alu ‘ese i le tasi e lē o lau tane, ‘āfai fo‘i na leaga oe, ma ‘ua ‘oulua momoe ma le tasi tane e lē o lau tane;”
21 ‘ona fai atu ai lea o le ositaulaga i le fafine i le tautō e fa‘afano ai, e fai atu fo‘i le ositaulaga i le fafine, “‘Ia tu‘uina atu oe e le ALI‘I ‘ia fa‘afano oe ma fetu‘uina i lou nu‘u, pe a fa‘ao‘o e le ALI‘I i lou ‘ogāvae ia pa‘ū ‘ese ma lou manava ‘ia fula;
22 o lenei vai fo‘i e malaia a‘i e alu ifo lea i lou manava, ‘ina ‘ia fula ai lou manava, ma ‘ia pa‘ū ‘ese ai lou ‘ogāvae.”‘Ona tali mai ai lea o le fafine, “Amene, Amene.”
23 ‘Ona tusi ai lea e le ositaulaga o nei fa‘afano i le tusi, na te sōloi fo‘i i le vai ‘o‘ona;
24 e avatu fo‘i e ia i le fafine le vai ‘o‘ona e malaia a‘i e inu ai, e o‘o fo‘i i totonu ‘iā te ia le vai e malaia a‘i ‘ina ‘ia ‘onā ai.
25 E ‘ave‘esea fo‘i e le ositaulaga i le lima o le fafine le taulaga o le fuā, ma lūlūina le taulaga i luma o le ALI‘I, ‘ona avatu ai lea i le fatafaitaulaga;
26 e ‘ave fo‘i e le ositaulaga le lu‘utaga a‘i le taulaga, o lona fa‘amanatuga lea, ‘ona susunu ai lea i luga o le fatafaitaulaga, e mulimuli ane ‘ona avatu lea e ia i le fafine le vai e inu.
27 Pe a uma ‘ona fa‘ainua o ia i le vai, ‘āfai ‘ua leaga o ia, ma ‘ua agaleaga i lana tane, e o‘o lava i totonu ‘iā te ia le vai e malaia a‘i, ‘ina ‘ia ‘onā ai, ‘ona fula lava lea o lona manava, e pa‘ū ‘ese fo‘i lona ‘ogāvae; ‘ona ‘avea lea o le fafine ma lē ‘ua fetu‘uina i lona nu‘u.
28 ‘Ae ‘āfai e le‘i leaga le fafine, a ‘ua lelei o ia, ‘ona sao lava lea o ia, e tō fo‘i o ia.
29 O le tulafono lea i le fuā, pe a alu ‘ese le fafine i le tasi e lē o lana tane, ma ‘ua leaga ai o ia;
30 i le ma lea fo‘i pe a o‘o le loto fuā i le tane, ma ‘ua fuā o ia i lana avā, ma tu‘uina atu e ia le fafine i luma o le ALI‘I, ‘ona faia lea e le ositaulaga ‘iā te ia lenei tulafono uma.
31 ‘Ona sao lea o le tane a‘i le agasala, ‘ae nofo sala le fafine.#