1 ‘Ona ō mai ai lea o afafine o Selofeata, o le atali‘i o Eferu, o le atali‘i ia o Kiliata o le atali‘i ia o Makiro, o le atali‘i ia o Manase, o ‘āiga ia o Manase o le atali‘i o Iosefa; o igoa fo‘i ia o ona afafine, o Maala, ma Noa, ma Hakelu, ma Maleka, ma Tiresa.
2 ‘Ua latou tutū i luma o Mose, ma luma o Eleasaro le ositaulaga, i luma fo‘i o ali‘i, ma le fa‘apotopotoga uma, i le faitoto‘a o le fale fetāfa‘i o le fa‘apotopotoga, ‘ua fa‘apea mai,
3 “‘Ua oti lo matou tamā i le vao, na lē i ai o ia i le fa‘apotopotoga o ē na fa‘apotopoto e tete‘e atu i le ALI‘I, o ē na ‘au fa‘atasi ma Koru a ‘ua oti o ia i lana lava agasala, ‘ua leai fo‘i ni ona atali‘i.
4 Pe tineia i se a le igoa o lo matou tamā i lona ‘āiga ‘ina ‘ua leai sona atali‘i. ‘Inā ‘aumai ia ‘iā te i matou so matou fanua fa‘atasi ma le ‘au uso o lo matou tamā.”
5 ‘Ona avatu ai lea e Mose o la latou ‘upu i luma o le ALI‘I.
6 ‘Ona fetalai mai ai lea o le ALI‘I ‘iā Mose, ‘ua fa‘apea mai:
7 E tonu le ‘upu a afafine o Selofeata ‘e te avatu lava ‘iā te i latou so latou lava tofi fa‘atasi ma le ‘au uso o lo latou tamā; ‘e te tu‘uina atu ‘iā te i latou le tofi o lo latou tamā.
8 ‘ia e fai atu fo‘i i le fānauga a Isaraelu, ‘ia fa‘apea atu, “‘Āfai e oti se tagata, ‘ae leai sona atali‘i, ‘ona ‘outou tu‘uina atu ai lea o lona tofi i lona afafine.
9 ‘Āfai fo‘i e leai sona afafine, ‘ona ‘outou tu‘uina atu ai lea o lona tofi i ona uso.
10 ‘Āfai fo‘i e leai ni ona uso, ‘ona ‘outou tu‘uina atu ai lea o lona tofi i uso, o lona tamā.
11 ‘Āfai fo‘i e leai ni uso o lona tamā, ‘ona ‘outou tu‘uina atu ai lea o lona tofi i se tasi o lona ‘āiga o le ‘ua aupito mai ‘iā te ia i lona ‘āiga, e fai fo‘i mōna. E fai fo‘i lenā mea ma tulafono e fa‘atonu a‘i i le fānauga a Isaraelu, e pei ‘ona poloa‘i mai ai o le ALI‘I ‘iā Mose.”
12 ‘Ua fetalai mai fo‘i le ALI‘I ‘iā Mose, “‘Ia e alu a‘e i lenei mauga o Aperima, ma va‘ava‘ai i le nu‘u ‘ua ‘ou tu‘uina atu i le fānauga a Isaraelu.
13 ‘E te iloa ai, ‘ona fa‘atasiina atu ai lea o oe fo‘i i lou nu‘u, e pei ‘ona fa‘atasiina atu o Arona lou uso.
14 Auā na ‘oulua fouvale i la‘u ‘upu i le vao o Tisina, ‘ina ‘ua finau mai o le fa‘apotopotoga, ‘ua lē fa‘apa‘iaina a‘u i le vai i o latou luma; o le vai o Meripa lea o i Katesa, i le vao o Tisina.”
15 ‘Ona fai atu ai lea o Mose i le ALI‘I, ‘ua fa‘apea atu,
16 “‘Ia tofia e le ALI‘I, le Atua o agaga o tagata uma, se tagata e pule i le fa‘apotopotoga;
17 o lē na te alu atu i o latou luma ma toe sau i o latou luma; o lē na te ta‘ita‘i atu, ma toe ‘aumai ‘iā te i latou; ‘ina ne‘i ‘avea o le fa‘apotopotoga a le ALI‘I, e pei o mamoe ‘ua leai so latou leoleo.”
18 ‘Ona fetalai mai ai lea o le ALI‘I ‘iā Mose, “‘Ia e ‘ave ‘iā Iosua le atali‘i o Nuno, o le tagata lea o i ai le Agaga ma ‘ia e fa‘ae‘e ou lima i luga ‘iā te ia;
19 ‘ia e tu‘u atu fo‘i ‘iā te ia i luma o Eleasaro le ositaulaga, ma luma o le fa‘apotopotoga uma, ma ‘ia e sauni atu se ‘upu ‘iā te ia i o latou luma.
20 ‘ia e tu‘u atu fo‘i ‘iā te ia nisi o lou mamalu, ‘ina ‘ia fa‘alogo ai le fa‘apotopotoga uma o le fānauga a Isaraelu.
21 E tu fo‘i o ia i luma o Eleasaro le ositaulaga, na te fesili fo‘i mo ia i le fa‘atonuga o le Urima i luma o le ALI‘I; o lana ‘upu latou te ō atu ai, o lana ‘upu fo‘i latou te toe fo‘i mai ai, o ia ‘atoa ma le fānauga a Isaraelu uma fa‘atasi ma ia, o le fa‘apotopotoga uma lava.”
22 ‘Ona faia lea e Mose e pei ‘ona fetalai mai ai o le ALI‘I ‘iā te ia; ‘ua na ‘ave ‘iā Iosua, ma na tu‘u atu ‘iā te ia i luma o Eleasaro le ositaulaga, ma luma o le fa‘apotopotoga uma.
23 ‘Ua ia fa‘ae‘e atu fo‘i ona lima i luga ‘iā te ia, ma sauni atu le ‘upu ‘iā te ia, e pei ‘ona fetalai mai o le ALI‘I ‘iā Mose.#