1 ‘Ua fetalai mai fo‘i le ALI‘I ‘iā Mose, ‘ua fa‘apea mai:
2 ‘Ia e faia ni pū ario se lua, ‘ia togitogi fa‘amamanuina; o ia pū fo‘i ‘e te tala‘i atu ai fa‘apotopotoga ma malaga a toagalauapi.
3 Pe a ilia uma le lua, ‘ona fa‘apotopoto mai ai lea o le fa‘apotopotoga uma lava ‘iā te oe i le faitoto‘a o le fale fetāfa‘i o le fa‘apotopotoga.
4 ‘Ae ‘āfai ‘ua latou ilia na o le pū e tasi, ‘ona potopoto mai ai lea o ali‘i sili ‘iā te oe, o matai o afe o Isaraelu.
5 Pe a ‘outou ilia le leo fa‘atetetete, ‘ona ō malaga ai lea o le toagalauapi o i le itū i sasa‘e.
6 Pe a ‘outou ilia fa‘alua i le leo fa‘atetetete, ‘ona ō malaga ai lea o le toagalauapi o i le itū i saute; latou te ilia le leo fa‘atetetete pe a latou ō malaga.
7 Peita‘i a fa‘apotopotoina le fa‘apotopotoga, tou te ili, ‘ae ‘aua le ilia le leo fa‘atetetete.
8 O atali‘i o Arona o ositaulaga la te ilia pū; e fai fo‘i lenei ma tulafono ‘iā te ‘outou ‘iā ‘outou tupulaga a le tu a le tu lava.
9 ‘Āfai fo‘i tou te ō e tau i lo ‘outou lau‘ele‘ele ma e fai ‘outou ma fili, o ē sauā mai ‘iā te ‘outou, ‘ona ‘outou ili ai lea o pū i le leo fa‘atetetete; ‘ona manatua ai lea e ‘outou i luma o le ALI‘I lo ‘outou Atua, e fa‘aolaina fo‘i ‘outou a‘i ē ‘ua ita mai ‘iā te ‘outou.
10 O le aso fo‘i tou te fiafia ai, ma aso o ‘outou tausamiga, ma amataga o ‘outou masina, tou te ili ai pū i luga o a ‘outou taulaga mū ma luga o a ‘outou taulaga fa‘afetai; e fai fo‘i lea ‘iā te ‘outou ma fa‘amanatuga i luma o lo ‘outou Atua; o a‘u lava o le ALI‘I lo ‘outou Atua.
11 ‘Ua o‘o i le aso e luafulu o le masina e lua, o le tausaga e lua, ‘ona si‘itia ai lea o le ao a‘i luga o le malumalu ‘ua i ai le tulafono.
12 ‘Ona ō ai lea o le fānauga a Isaraelu i la latou malaga a‘i le vao o Sinai; ‘ua nofo fo‘i le ao i le vao o Parana.
13 O la latou fa‘ato‘ā ō malaga lea i le afioga a le ALI‘I ‘iā Mose.
14 E muamua atu le tagāvai o toagalauapi o le fānauga a Iuta ‘iā latou ‘au; o lē na pule fo‘i i ana ‘au, o Naasona lea o le atali‘i o Aminatapu.
15 O lē na pule fo‘i i ‘au a le itū‘āiga o le fānauga a Isakara, o Natanielu lea o le atali‘i o Suaro.
16 O lē na pule fo‘i i ‘au a le itū‘āiga o le fānauga a Sepulona, o Eliapo lea o le atali‘i o Holona.
17 ‘Ua tatalaina fo‘i le malumalu, ‘ona ō ai lea o le fānauga a Keresoma ma le fānauga a Merari, ‘ua latou ‘ave le malumalu.
18 ‘Ona ‘ave ai lea o le tagāvai o le toagalauapi o Reupena ‘iā latou ‘au; o lē na pule fo‘i i ana ‘au, o Elisura lea o le atali‘i o Seturo.
19 O lē na pule fo‘i i ‘au a le itū‘āiga o le fānauga a Simeona, o Selumielu lea o le atali‘i o Surisatai.
20 O lē na pule fo‘i i ‘au a le itū‘āiga o le fānauga a Kato, o Eliasafo lea o le atali‘i o Tuelu.
21 ‘Ona ō ai lea o sa Koatō, ‘ua latou ‘ave mea pa‘ia; a ‘ua uma ‘ona fa‘atūina o le malumalu e i latou na muamua ‘ina ‘ua latou o‘o atu.
22 ‘Ona ‘ave ai lea o le tagāvai o le toagalauapi o le fānauga a Efaraima ‘iā latou ‘au; o lē na pule fo‘i i ana ‘au, o Elisama lea o le atali‘i o Ameuta.
23 O lē na pule fo‘i i ‘au a le itū‘āiga o le fānauga a Manase, o Kamalielu lea o le atali‘i o Petasura.
24 O lē na pule fo‘i i ‘au a le itū‘āiga o le fānauga a Peniamina, o Apitano lea o le atali‘i o Kitione.
25 ‘Ona ‘ave ai lea o le tagāvai o le toagalauapi o le fānauga a Tanu, e muli‘au lava lea i toagalauapi uma, ‘iā latou ‘au; o lē na pule fo‘i i ana ‘au, o Aisera lea o le atali‘i o Amisatai.
26 O lē na pule fo‘i i ‘au a le itū‘āiga o le fānauga a Asera, o Pagielu lea o le atali‘i o Okirano.
27 O lē na pule fo‘i i ‘au a le itū‘āiga o le fānauga a Nafatali, o Akira lea o le atali‘i o Enano.
28 ‘Ua fa‘apea malaga a le fānauga a Isaraelu ‘iā latou ‘au ‘ina o latou ō malaga.
29 ‘Ua fai ane Mose ‘iā Opapo le atali‘i o Reuelu o le Mitiana, o le tamā o le avā a Mose, “O lo‘o ō nei i matou i le mea na fetalai mai ai le ALI‘I. ‘‘Ou te foa‘iina atu ai ‘iā te ‘outou;’ ‘inā tatou ō ia ma oe, matou te agalelei ‘iā te oe, auā ‘ua folafola mai le ALI‘I mea lelei ia Isaraelu.”
30 A ‘ua tali mai o ia ‘iā te ia, “‘Ou te lē alu; ‘ae ‘ou te alu i lo‘u lava nu‘u ma lo‘u ‘āiga.”
31 ‘Ona fai atu ai lea o ia, “‘Ou te ‘ai‘oi atu lava, ‘aua ‘e te tu‘ua i matou, auā ‘ua e iloa mea matou te tolauapi ai i le vao, e fai fo‘i oe mo matou mata.
32 ‘Āfai fo‘i tatou te ō ma oe, ‘ona matou agalelei ai lea ‘iā te oe i mea lelei uma e agalelei mai ai le ALI‘I ‘iā te i matou.”
33 ‘Ona latou ō malaga ai lea i le mauga o le ALI‘I, ‘ua po tolu la latou malaga o ia po fo‘i e tolu na muamua atu ai ‘iā te i latou i le malaga o le ‘atola‘au o le feagaiga a le ALI‘I, e sā‘ili‘ili se mapusaga mo i latou.
34 Sa i luga ‘iā te i latou i lea aso ma lea aso le ao mai le ALI‘I, ‘ina o latou ō atu nai le toagalauapi.
35 A ‘ave le ‘atola‘au, ‘ona fai ane ai lea o Mose, “Le ALI‘I e, ‘inā tula‘i ia oe, ma ‘ia fa‘ata‘ape‘apeina o ē fai oe mo latou fili; ‘ia sōsōla fo‘i i ou luma o ē ita ‘iā te oe.”
36 A tu‘u i lalo ‘ona fai ane ai lea o ia, “Le ALI‘I e, ‘inā fo‘i mai ia i manomānō o Isaraelu.”