10 ‘Ua fa‘alogo Mose i le fētāgisi o le nu‘u i o latou ‘āiga, e ta‘ito‘atasi le tagata i faitoto‘a o latou fale ‘ie; ‘ona matuā tupu tele ai lea o le to‘asā o le ALI‘I, ‘ua leaga fo‘i i le manatu o Mose.
11 ‘Ona fai atu ai lea o Mose i le ALI‘I, “Se a le mea ‘ua e agaleaga mai ai i lau ‘au‘auna se a fo‘i le mea ‘ua lē alofagia ai a‘u i ou luma, ‘ina ‘ua e fa‘ae‘e mai le avega o lenei nu‘u uma i luga ‘iā te a‘u?
12 Na tō ‘ea a‘u i lenei nu‘u uma? pe na ‘ou fānauina i latou, ‘ina ‘ua e fetalai mai ai ‘iā te a‘u, ‘‘Ia e ‘ave ‘iā te i latou i lou lava fatafata, e pei o le tausi tama ‘ona ‘ave i le tama meamea,’ se‘ia latou o‘o i le lau‘ele‘ele na e tautō ai i o latou tamā?
13 ‘Ou te maua ‘ea i fea manu ‘ou te avatu ai i lenei nu‘u uma auā latou te fētāgisi mai ‘iā te a‘u, ‘ua fa‘apea mai, ‘‘Inā ‘aumai ia ‘iā te i matou o manu, matou te ‘a‘ai ai.’
14 ‘Ou te lē lavā lava e a‘u e to‘atasi ‘ona ‘ave i le avega o lenei nu‘u uma, auā e mafatia ai a‘u.
15 ‘Āfai fo‘i ‘e te fai fa‘apea ‘iā te a‘u, ‘ou te ‘ai‘oi lava, ‘āfai ‘ua alofagia a‘u e oe ‘ia e fasioti lava ‘iā te a‘u, ‘ae ‘aua ‘ou te iloa lo‘u puapuagā.”
16 ‘Ona fetalai mai ai lea o le ALI‘I ‘iā Mose, “‘Ia fa‘apotopoto mai ia ‘iā te a‘u o tagata e to‘afitugafulu, o toeaina o Isaraelu, o ē ‘ua e iloa lava o toeaina i latou o le nu‘u ma o latou faipule; ‘ia e ‘aumai fo‘i ‘iā te i latou i le fale fetāfa‘i o le fa‘apotopotoga, ‘ina ‘ia latou tutū ai fa‘atasi ma oe.