11 ‘Ona si‘i ai lea e Mose o lona lima, ma ta fa‘alua atu i le papa i lona to‘oto‘o; ‘ona tafe tele mai ai lea o le vai, ‘ona feinu ai lea o le fa‘apotopotoga ma a latou manu.
12 ‘Ona fetalai mai ai lea o le ALI‘I ‘iā Mose ma Arona, “Na ‘oulua lē fa‘atuatua ‘iā te a‘u, ‘ia fa‘apa‘iaina ai a‘u i luma o le fānauga a Isaraelu, o le mea lava lea lua te lē fa‘a‘o‘otia ai lenei fa‘apotopotoga i le nu‘u ‘ua ‘ou foa‘iina ‘iā te i latou.”
13 O le vai lenei o Meripa, auā na finau le fānauga a Isaraelu i le ALI‘I, na fa‘apa‘iaina fo‘i o ia i o latou luma.
14 ‘Ua tu‘u le sāvali e Mose a‘i Katesa i le tupu o Etoma e fai atu i ai, o lo‘o fa‘apea mai lou uso o Isaraelu, “‘Ua e silafia le tigā uma lava ‘ua o‘o ‘iā te i matou.
15 Na ō ifo o matou tamā i Aikupito, e tele fo‘i po na matou nonofo ai i Aikupito; a ‘ua agaleaga mai Aikupito ‘iā te i matou, ‘atoa ma o matou tamā.
16 ‘Ona matou ‘alalaga ai lea i le ALI‘I, na fa‘afofogaina fo‘i e ia o matou leo, na ‘auina mai fo‘i e ia le agelu, ma ‘ua ‘aumaia i matou a‘i Aikupito; fa‘auta fo‘i, o lo‘o i Katesa i matou, o le ‘a‘ai lea e tupito lava i le tuā‘oi o lou nu‘u.
17 Matou te ‘ai‘oi atu ‘iā te oe, ‘ia matou ui atu i lou nu‘u; matou te lē ui ane i fanua, po o tōvine, matou te lē feinu fo‘i i vai‘eli; o le ala tele o le tupu matou te ui atu ai; matou te lē afe ane i le itū taumatau po o le itū tauagavale, se‘ia matou tuana‘i atu le tuā‘oi o lou nu‘u.”