23 ‘Ua lē mafai Sekono ‘ona ui atu o Isaraelu i lona nu‘u; a ‘ua fa‘apotopotoina e Sekono lona nu‘u uma, ‘ua alu atu fo‘i o ia e tete‘e ‘iā Isaraelu i le vao; ‘ua o‘o atu ‘iā i Iaesa, ‘ua tau ai ma Isaraelu.
24 ‘Ona fasia lea o ia e Isaraelu i le pelu, ‘ua fai fo‘i mo latou lona nu‘u, e amata i Arinona e o‘o atu i Iapoka, e o‘o atu lava i le nu‘u o le fānauga a Amoni; auā sa faigatā le tuā‘oi o le fānauga a Amoni.
25 ‘Ua ā‘ea fo‘i e Isaraelu ia ‘a‘ai uma, ‘ua mau fo‘i Isaraelu i ‘a‘ai uma o sa Amorī; o Hesepona ma ona faoa ‘a‘ai uma lava.
26 Auā o Hesepona o le ‘a‘ai lea o Sekono le tupu o sa Amorī; o ia fo‘i sa mua‘i tau ma le tupu o Moapi, ma faoa lona nu‘u uma ‘ua pa‘i atu i Arinona.
27 O le mea lea ‘ua fa‘apea mai ai o ē fai fa‘ata‘oto,“‘Inā ō mai ia i Hesepona, se‘i atiina a‘e,ma teuteua le ‘a‘ai o Sekono.
28 Auā ‘ua alu atu le afi nai Hesepona,o le afi mumū nai le ‘a‘ai o Sekono,‘ua susunuina ai Aro o Moapi,o ali‘i o mea maualuluga i Arinona.
29 ‘Oi talofa ‘iā te oe, Moapi e,‘ua fano oe, le nu‘u o Kimosa;‘ua tu‘uina e ia ona atali‘i na sao,ma ona afafine e fai ma tagata o tau‘a ‘iā Sekono le tupu o sa Amorī.