Zenbakiak

Sakrifizioei buruzko arauak liturgi egutegiaren araberaZen 28—29 kap.ek Lb 23 kap.an kultuari buruz esana argitasun eta zehaztasun handiagoz garatzen dute.

¹Honela mintzatu zitzaion Jauna Moisesi: ²«Agindu israeldarrei izan daitezela arduratsu dagozkidan eskaingaiak, nire ohorez erretzeko opariak, ezarritako egunetan aurkezten; atseginez onartuko ditut. ³Esaiezu:«Hona hemen Jaunaren ohorez egunero erreko dituzuen opariak: urtebeteko bi arkume akats gabe eguneroko erre-opari gisa;

Egunerokoa

⁴bata goizean eskainiko da eta ilunabarrean bestea; ⁵eta labore-opari gisa, litro eta erdiren bat oliotan oraturiko lau kilo ogi-irin garbi. ⁶Hori da eguneroko erre-oparia, Sinai mendian egin ohi zenaren erakoa: Jaunaren ohorez erretako oparia da, berak atseginez onartzen duena. ⁷Lehenengo arkumearekin batera, litro eta erdi ardo eskainiko da isur-oparitzat; isur-oparia santutegian eskainiko zaio Jaunari. ⁸Bigarren arkumea ilunabarrean eskainiko da isur-opari berarekin, eta Jaunak atseginez onartuko du bere ohorez erretako oparia.

Larunbatekoa

⁹«Larunbatez, urtebeteko bi arkume akats gabe eskainiko dira, oliotan oraturiko zortzi kilo irinen labore-oparia eta haiei dagozkien isur-opariak. ¹⁰Hau da larunbatero eskaini beharreko erre-oparia, eguneroko erre-opari eta isur-opariez gain.

Hilaren lehen egunekoa

¹¹«Hilaren hasieran, bi zekor, ahari bat eta urtebeteko zazpi arkume —denak akats gabeak— aurkeztuko dizkiozue Jaunari erre-oparitzat. ¹²Oliotan oraturiko irina eskainiko duzue labore-oparitzat: zekor bakoitzeko hamabi kilo, ahariarekin zortzi kilo ¹³eta arkume bakoitzeko lau kilo. Jaunaren ohorez erretako oparia da, berak atseginez onartzen duena. ¹⁴Oparigaiei isur-opari hauek dagozkie: zekor bakoitzari hiru litro ardo, ahariari bi litro eta arkume bakoitzari litro eta erdi. Hori da hil guztien hasieran eskainiko den erre-oparia. ¹⁵Gainera, aker bat eskainiko zaio Jaunari barkamen-oparitzat, eguneroko erre-opari eta isur-opariez gain.

Pazko-jaikoa

¹⁶«Lehen hilaren hamalauan Pazkoa ospatuko duzue Jaunaren ohorez, ¹⁷eta hilaren hamabostean zazpi eguneko jaia hasten da: egun horietan legamia gabeko ogia jango duzue. ¹⁸Astearen lehen egunean batzar sakratua izango duzue eta ez da ohiko lan arruntik egingo. ¹⁹Opariak erreko dituzue Jaunaren ohorez: bi zekor, ahari bat eta urtebeteko zazpi arkume —denak akats gabeak—, ²⁰eta dagokien labore-oparia, oliotan oraturiko irina, alegia: zekor bakoitzeko hamabi kilo, ahariarekin zortzi kilo ²¹eta arkume bakoitzeko lau kilo. ²²Gainera, aker bat barkamen-oparitarako, zeuen bekatuen barkamen-ohikunea egiteko. ²³Hori guztia eginen duzue goizero egin beharreko erre-opariaz gain. ²⁴Zazpi jaiegunetan, egunero eskainiko dituzue Jaunaren ohorez erretzeko opariak eta hark atseginez onartuko ditu. Opariok, eguneroko erre-opari eta isur-opariez gain eginen dituzue. ²⁵Zazpigarren egunean batzar sakratua izango duzue berriro eta ez da ohiko lan arruntik egingo.

Mendekoste-jaikoa

²⁶«Asteen Jaian, lehen fruituen egunean uzta berriko fruituen oparia Jaunari aurkeztean, batzar sakratua izango duzue eta ez da ohiko lan arruntik egingo. ²⁷Bi zekor, ahari bat eta urtebeteko zazpi arkume eskainiko dituzue erre-oparitzat, eta Jaunak atseginez onartuko ditu. ²⁸Oliotan oraturiko irina eskainiko duzue labore-oparitzat: zekor bakoitzeko hamabi kilo, ahariarekin zortzi kilo ²⁹eta arkume bakoitzeko lau kilo. ³⁰Gainera, aker bat zeuen bekatuen barkamen-ohikunea egiteko. ³¹Opariok eginen dituzue eguneroko erre-opari eta labore-opariez gain. Abere akats gabeak aukeratuko dituzue eta dagozkien isur-opariak erantsiko.