Zenbakiak

Irteerako etapen zerrenda

¹Hona, israeldarrek, Moises eta Aaronen gidaritzapean Egiptotik gudari-taldeka banaturik atera zirenean, egin zituzten bideko etapak. ²Moisesek idatziz jaso zituen Jaunaren agindura egin zuten ibilaldiko abiapuntu eta helmugak. Hona hemen horien zerrenda: ³Ramsestik abiatu ziren lehenengo hilaren hamabostean, Pazko biharamunean; israeldarrak libre irten ziren egiptoarren begi-bistan, ⁴hauek Jaunak hilarazitako lehen-semeak ehorzten ari zirela —horrela eman zien Jaunak epaia egiptoarren jainkoei—. ⁵Ramsestik abiaturik, Sukoten kanpatu ziren hurrengo; ⁶Sukotetik abiatu eta, basamortu-ertzean, Etamen kanpatu ziren; ⁷Etamdik abiaturik, Baal-Tzefon parean dagoen Pi-Hirotera itzuli ziren eta Migdol aurrean etxolatu; ⁸Pi-Hirotetik abiaturik, itsasoa zeharkatu eta basamortura iritsi ziren eta, Etam basamortuan hiru eguneko bidea egin ondoren, Maran kanpatu; ⁹Mara ere utzi eta, Elimera, hamabi iturburu eta hirurogeita hamar palmondo zituen oasira, iritsiz, bertan etxolatu ziren; ¹⁰Elimdik Itsaso Gorri ondora joan ziren hurrengo; ¹¹Itsaso Gorritik, Sin basamortura; ¹²Sin basamortutik, Dofkara, ¹³eta Dofkatik Aluxera; ¹⁴Aluxetik abiaturik, Refidimera iritsi ziren; baina ez zen han urik herriak edateko. ¹⁵Refidimdik abiaturik, Sinai basamortura heldu ziren; ¹⁶Sinai basamortutik Kibrot-Taabara; ¹⁷Kibrot-Taabatik Hatzerotera; ¹⁸Hatzerotetik Ritmara; ¹⁹Ritmatik Rimon-Peretzera; ²⁰Rimon-Peretzetik Libnara; ²¹Libnatik Risara; ²²Risatik Kehelatara; ²³Kehelatatik Xefer mendira; ²⁴Xefer menditik Haradara; ²⁵Haradatik Makhelotera; ²⁶Makhelotetik Tahatera; ²⁷Tahatetik Terahera; ²⁸Terahetik Mitkara; ²⁹Mitkatik Haxmonara; ³⁰Haxmonatik Moserotera; ³¹Moserotetik Bene-Jaakanera; ³²Bene-Jaakanetik Hor-Gidgadera; ³³Hor-Gidgadetik Jotbatara; ³⁴Jotbatatik Abronara; ³⁵Abronatik Etzion-Geberrera, ³⁶eta Etzion-Geberretik Tzin basamortura, hau da, Kadexera; ³⁷Kadexetik abiaturik Edom lurraldeko mugan dagoen Hor mendian etxolatu ziren hurrengo. ³⁸Aaron apaiza Hor mendira igo zen Jaunaren aginduz eta bertan hil zen, israeldarrak Egiptotik irten eta berrogei urtera, bosgarren hilaren lehen egunean. ³⁹Ehun eta hogeita hiru urte zituen Aaronek Hor mendian hil zenean. ⁴⁰Orduan jakin zuen Kanaango Negeven bizi zen Aradeko kanaandar erregeak israeldarren etorreraren berri. ⁴¹Israeldarrak, Hor menditik abiaturik, Tzalmonara iritsi ziren; ⁴²Tzalmonatik Punonera; ⁴³Punonetik Obotera; ⁴⁴Obotetik Moabeko mugaldean dagoen Iie-Abarimera; ⁴⁵Iie-Abarimdik Dibon-Gadera; ⁴⁶Dibon-Gadetik Almon-Diblataimera; ⁴⁷Almon-Diblataimdik Nebo parean dauden Abarim mendietara; ⁴⁸eta Abarim mendietatik abiaturik, Moabeko lautadara iritsi ziren eta han kanpatu, Jordan ondoan, Jeriko parean. ⁴⁹Moabeko lautadan, Jordan ondoan etxolatu ziren, Bet-Jeximotetik Abel-Xitim bitartean.

Kanaan lurraldea banatzeko Jaunaren agindua

⁵⁰Jaunak esan zion Moisesi Moabeko lautadan, Jordan ondoan, Jeriko parean: ⁵¹«Esan israeldarrei: Jordan igaro eta Kanaan lurraldean sartzean, ⁵²bota egingo dituzue hango biztanleak, beraien harrizko eta metal urtuzko idoloak desegin eta kultu-leku guztiak suntsitu. ⁵³Lurraldearen jabe egingo zarete eta bertan biziko, zeuei eman baitizuet haren jabe izan zaitezten. ⁵⁴Zozketaz banatuko duzue lurraldea leinu eta senitarteen artean: senitartea ugaria bada, ondare-zatia ere handiagoa emango zaio, eta urria bada txikiagoa. Senitarte bakoitzak zozketan egokituriko ondarea jasoko du. ⁵⁵Alabaina, lurraldeko biztanleak botatzen ez badituzue, geldituko direnak begian arantza nahiz saihetsean eztenkada bezain mingarri izango dituzue: erasoka ariko zaizkizue biziko zareten lurraldean bertan. ⁵⁶Orduan, haiekin egin asmo nuena, zuekin egingo dut».