1 ‘Ona ‘ou va‘ai lea, fa‘auta fo‘i i le vā i lagi ‘ua i luga o ulu o kerupi, e peiseaī o le ma‘a safaira, e tino mai e peiseaī o le fa‘atusa o le nofoāli‘i ‘ua tu mai i luga ‘iā te i latou.
2 ‘Ua fetalai atu fo‘i o ia i le tagata ‘ua ‘ofu i le ‘ie lino, ‘ua fa‘apea atu, “Ulu atu ia i le vā o mea ta‘avavale i lalo o le kerupi ma e fa‘atumuina lou lima i malala ola a‘i le vā o kerupi, ma sa‘alu‘u solo ai i luga o le ‘a‘ai.”‘Ona ulu ane lea o ia o lo‘o ‘ou va‘ai atu.
3 ‘Ua tutū fo‘i kerupi i le itū taumatau o le fale, ‘ina o ulu atu ai le tagata; ‘ua fa‘atumuina le lotoā tuloto i le ao.
4 ‘Ona alu a‘e lea o le pupula o le ALI‘I nai luga o le kerupi, ‘ua o‘o i le faitoto‘a o le fale; ‘ua fa‘atumuina fo‘i le fale i le ao, ‘ua tumu fo‘i le lotoā i le pupula matagofie o le ALI‘I.
5 ‘Ua lagona fo‘i le ta‘alili o ‘apa‘au o kerupi, ‘ua o‘o lava i le lotoā aupito i fafo, ‘ua pei o le si‘ufofoga o le Atua e ona le malosi uma lava pe a fetalai mai o ia.
6 ‘Ua uma fo‘i ‘ona ia fetalai atu i le tagata ‘ua ‘ofu i le ‘ie lino, ‘ua fa‘apea atu, “‘Inā ‘ave ia se afi a‘i le vā o mea ta‘avavale, a‘i le vā o kerupi;” ‘ona ulu ane lea o ia ma tu e lata ane i le mea ta‘avale.
7 ‘Ona tago atu lea o le lima o le kerupi a‘i le vā o kerupi i le afi a‘i le vā o kerupi, ‘ua ‘ava‘e ai ma avane i lima o lē ‘ua ‘ofu i le ‘ie lino; ‘ua talia e ia, ‘ona alu atu lea o ia.
8 ‘Ua iloa i kerupi le fa‘atusa o le lima o le tagata i lalo o latou ‘apa‘au.
9 ‘Ona ‘ou va‘ai lea fa‘auta, o mea ta‘avavale e fa i tafatafa o kerupi, ta‘itasi le mea ta‘avale i tafatafa o kerupi ta‘itasi; ‘ua tino mai fo‘i o mea ta‘avavale e pei o le tino o le ma‘a tasesa.
10 O latou tino mai fo‘i, ‘ua tino fa‘atasi i latou uma e fa, ‘ua peiseaī o le mea ta‘avale i totonu o le mea ta‘avale.
11 A latou o, ‘ua latou o i o latou itū e fa, ‘ua latou le liliu ‘ina ‘ua latou o, a o le mea na fa‘asaga i ai le ulu ‘ua latou mulimuli atu i ai; ‘ua latou le liliu ‘ina ‘ua latou o.
12 O latou tino uma ma o latou tua ma o latou lima ma o latou ‘apa‘au, ‘atoa ma mea ta‘avavale ‘ua tūtūmu ia i mata, ‘ua so‘o lava, o mea ta‘avavale lava na ‘iā te i latou e fa.
13 A o mea ta‘avavale, ‘ua vala‘au le tasi ‘iā te i latou, o lo‘o ‘ou fa‘alogo atu, “le mea ta‘avale e.”
14 ‘Ua tofu i latou ta‘itasi ma mata e fa; o lē ‘ua muamua i mata, o mata o le kerupi lea, o lona lua o mata, o mata o le tagata lea, o lona tolu, o mata o le leona lea, o lona fa, o mata o le aeto lea.
15 ‘Ua si‘itia fo‘i kerupi i luga. (O le mea ola lea na ‘ou iloa i le vaitafe o Kepara.)
16 A ō fo‘i kerupi, ‘ua ō fo‘i mea ta‘avavale i o latou tafatafa; a fāloina i luga e kerupi o latou ‘apa‘au ‘ina ‘ia ō a‘e i luga nai le lalolagi, e le liliu ‘ese i o latou tafatafa ia lava mea ta‘avavale.
17 A tutū i latou, ‘ona tutū lea o i latou nei; a ‘aveina a‘e fo‘i i latou i luga, ‘ona ‘aveina a‘e lea o i latou nei; auā ‘ua i ai le agaga o le mea ola ‘iā te i latou.
18 ‘Ona alu atu lea o le pupula o le ALI‘I a‘i le faitoto‘a o le fale ma ‘ua tu i luga a‘e o kerupi.
19 ‘Ona fāloina lea i luga e kerupi o latou ‘apa‘au, ‘ua ō a‘e mai le lalolagi, o lo‘o ‘ou va‘ai i ai; ‘ua latou ō atu ‘ua fa‘atasi ma i latou mea ta‘avavale, ‘ua latou tutū fo‘i i le puipui o le faitoto‘a o le fale o le ALI‘I e fa‘asaga i sasa‘e; ‘ua i luga lava ‘iā te i latou le pupula o le Atua o Isaraelu.
20 O le mea ola lea na ‘ou iloa i lalo o le Atua o Isaraelu i le vaitafe o Kepara; na ‘ou iloa o kerupi lava i latou.
21 ‘Ua ta‘itasi ma ona mata e fa, e ta‘itasi fo‘i ma ona ‘apa‘au e fa; o le fa‘atusa fo‘i o lima o le tagata na i lalo o latou ‘apa‘au lea.
22 O le fa‘atusa fo‘i o latou mata, o mata ia na ‘ou iloa e lata ane i le vaitafe o Kepara, o latou tino mai, ma i latou lava; e ta‘itasi ma alu tonu atu i ona luma.#