1 ‘Ua o‘o mai le afioga a le ALI‘I ‘iā te a‘u, ‘ua fa‘apea mai:
2 Le atali‘i e o le tagata, ‘ia e fai atu se tupua, ma sauni atu se fa‘ata‘oto i le ‘āiga o Isaraelu,
3 ‘ia fa‘apea atu: O lo‘o fa‘apea ‘ona fetalai mai o le Ali‘i le ATUA:O le aeto tele, ‘ua tetele ona ‘apa‘au,ma fulu ‘apa‘au ‘u‘umi,‘ua uluulu ona fulufulu ma pulepule,na sau i Lepanona ma na ‘ave le moemoe o le arasi.
4 Na ia fati le tumutumu o ona moemoema na ‘avea i le nu‘u fa‘atau‘oa;‘ua ia tu‘u ai i le ‘a‘ai o tagata fa‘atau‘oa.
5 Na ia ‘ave fo‘i nisi fatu o le nu‘u,ma na totōina ai i le fanua lafulemū,‘ua ia tu‘uina i tafatafa o le vai tele,‘ua tu‘u ai e pei o se sapasapa.
6 ‘Ua tupu fo‘i ma ‘ua ‘avea ma vine sosolo,‘ua maulalo lona tumutumu,‘ua sasau ane ‘ona la ‘iā te ia,‘ua i ai fo‘i ona a‘a i lalo ‘iā te ia;‘ua ‘avea ma vine, ‘ua tutupu ai la ma matala mai ona lau.
7 Na i ai fo‘i le tasi aeto tele,‘ua tetele ona ‘apa‘au,e tele fo‘i ona fulufulu;fa‘auta fo‘i, o lea vine ‘ua sosolo atu ona a‘a ‘iā te ia,‘ua sasau atu fo‘i ‘ona la ‘iā te ia,‘ia na fa‘asūsū i ai i utu o lana fa‘ato‘aga.
8 Na totōina i le fanua lelei e lata ane i le vai tele,‘ina ‘ia tutupu ‘ona la ma ‘ia fua mai,‘ia fai fo‘i ia ma vine tele.
9 ‘Ia e fai atu, o lo‘o fa‘apea ‘ona fetalai mai o le Ali‘i le ATUA:E manuia ‘ea ia?E le lia‘iina ‘ea e ia ona a‘a ma sala‘esea ona fua, ‘ina ‘ia mago ai?E mago lau uma lava i ‘ona la la‘au,‘ae lē o le lima malosi,po o tagata e to‘atele e lia‘iina ai ona a‘a.
10 Fa‘auta fo‘i, e manuia ‘ea ia ‘ina ‘ua totōina?E lē matuā mago ‘ea pe a agi mai i ai le matagi mai sasa‘e?E mago lava i utu na ia tupu ai.
11 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
12 ‘Inā fai atu ia i le ‘āiga fouvale, ‘Ua ‘outou lē iloa ‘ea le uiga o ia mea? fai atu ia, Fa‘auta, na sau le tupu o Papelonia i Ierusalema, na ia ‘avea lona tupu, ma ona ali‘i, na ia ‘ave ‘iā te i latou fa‘atasi ma ia i Papelonia;
13 na ia ‘ave fo‘i le tasi o le fānau a le tupu ma osia le feagaiga ma ia ma fai atu ‘iā te ia ‘ia tautō; na ia ‘avea fo‘i ali‘i sili o le nu‘u;
14 ‘ina ‘ia fai ma mālō fa‘atauva‘a, ia le toe fa‘amaualuga o ia, a ‘ia tumau pe a ‘ana‘ana i lana feagaiga.
15 A ‘ua ia fouvale ‘iā te ia i lona ‘a‘auina atu o lana sāvali i Aikupito ‘ina ‘ia tu‘u mai ‘iā te ia o solofanua ma tagata e to‘atele. E manuia ‘ea ia? E sao ‘ea lē fai mea fa‘apea? E soli ‘ea e ia le feagaiga ‘ae fa‘asaoina?
16 ‘Ua fetalai mai le Ali‘i le ATUA, O lo‘o ola a‘u, e moni o le mea o i ai le tupu na tofia o ia ma tupu, e ana le tautoga na ia fa‘alēaogā i ai, e ana fo‘i le feagaiga na ia solia, e oti o ia i Papelonia i le mea o i ai o ia.
17 O Farao fo‘i ma lana itūtau‘a e to‘atele ma ana ‘au e tele, e lē aogā ia ‘iā te ia i le tau‘a i le tanu o mea mauti‘eti‘e ma le faiga o ‘olo e fa‘aumatia ai tagata e to‘atele.
18 ‘Ua ia fa‘alēaogā le tautō i lona soli o le feagaiga; fa‘auta fo‘i, na ia avatu lava lona lima, ‘ua ia faia ia mea uma, na te lē sao lava.
19 O le mea lea ‘ua fa‘apea ‘ona fetalai mai ai o le Ali‘i le ATUA, O lo‘o ola a‘u, e moni, o le tautō i lo‘u igoa ‘ua ‘ia fa‘alēaogāina ma la‘u feagaiga ‘ua ia solia, ‘ou te matuā taui atu ai i lona ulu.
20 ‘Ou te folasia la‘u ‘upega ‘iā te ia, e lavea o ia i la‘u mailei, ‘ou te ‘ave fo‘i ‘iā te ia i Papelonia ma ‘ou fa‘asalaina o ia i lea mea, ‘ona o lana agasala ‘ua ia agasala mai ai ‘iā te a‘u.
21 O ona tagata uma e sōsōla ma ana ‘au uma e oti i latou i le pelu; e fa‘ata‘ape‘apeina fo‘i e o totoe i matāmatagi uma, tou te iloa ai o a‘u lava o le ALI‘I ‘ua ‘ou fai atu ai.
22 ‘Ua fa‘apea ‘ona fetalai mai o le Ali‘i le ATUA:‘Ou te ‘ave e a‘u le moemoe o le arasi maualuga,ma ‘ou totōina;‘ou te fati fo‘i se mea mu‘amu‘a a‘i le tumutumu o ona moemoe,ma ‘ou totōina i le mauga e sili ‘ona maualuga.
23 O le mauga maualuga o Isaraelu‘ou te totōina ai;e tutupu ai la ma fua mai,e ‘avea fo‘i ma arasi tele.E i ona lalo ifo o manu felelei uma e uiga ‘ese‘ese,latou te aofaga i le paolo o ona la.
24 E iloa ai la‘au uma o le vao,o a‘u i o le ALI‘I.‘Ua ‘ou fa‘amaulaloina le la‘au maualuga,ma ‘ou fa‘amaualugaina le la‘au maulalo.‘Ua ‘ou fa‘amagoina le la‘au mata,ma ‘ou fa‘alauolaolaina le la‘au na mago.O a‘u o le ALI‘I, na ‘ou fai atu ma ‘ou faia lava.