1 ‘Ua si‘itia fo‘i a‘u i luga e le Agaga, ‘ua ia ‘ave ‘iā te a‘u i le faitoto‘a o le fale o le ALI‘I i sasa‘e e fa‘afesaga‘i ma le itū i sasa‘e; fa‘auta fo‘i, o tagata e to‘aluafulu ma le to‘alima i le puipui o le faitoto‘a; ‘ua ‘ou iloa fo‘i o ‘iā te i latou o Iaasenaia le atali‘i o Asura ma Pelatia le atali‘i o Penaia, o ali‘i o le nu‘u.
2 ‘Ona fetalai mai lea o ia ‘iā te a‘u, “Le atali‘i e o le tagata, o tagata ia e tautogafiti i mea leaga ma latou pule i pulega leaga i le ‘a‘ai nei;
3 o ē fa‘apea atu, ‘E lē latalata mai; ‘inā fai fale ia; o le ‘ulo lenei ‘a‘ai, a o le tufa‘aga i tatou.’
4 O le mea lea ‘ia e vavalo atu ai ‘iā te i latou, le atali‘i e o le tagata, ‘ia e vavalo atu ia.”
5 ‘Ona o‘o mai ai lea o le Agaga o le ALI‘I ‘iā te a‘u, ‘ua ia fetalai mai fo‘i ‘iā te a‘u, “Fai atu ia, O lo‘o fa‘apea mai le ALI‘I, ‘Ua fa‘apea ‘ona fai mai ‘outou, le ‘āiga o Isaraelu e; auā ‘ua ‘ou iloa mea uma lava e tutupu i o ‘outou manatu.
6 ‘Ua ‘outou fa‘ato‘ateleina o ‘outou tagata fasiotia i lenei ‘a‘ai, ‘ua ‘outou fa‘atūtūmuina ona ala i ē ‘ua fasiotia.
7 O le mea lea o lo‘o fa‘apea mai ai le Ali‘i le ATUA: O ‘outou tagata ‘ua fasiotia, ‘ua ‘outou tu‘uina ai, o tufa‘aga i latou, a o lenei ‘a‘ai o le ‘ulo lea; ‘ae ‘ou te ‘ave‘eseina ai ‘outou.
8 ‘Ua ‘outou fefefe i le pelu; ‘ou te fa‘ao‘o atu lava le pelu ‘iā te ‘outou, o lo‘o fetalai mai ai le Ali‘i le ATUA.
9 ‘Ou te ‘ave‘eseina ai ‘outou ma ‘ou tu‘uina atu ‘outou i lima o tagata ‘ese, ‘ou te fa‘ao‘oina fo‘i sala ‘iā te ‘outou.
10 E oti ‘outou i le pelu; ‘ou te fa‘asalaina ‘outou i le tuā‘oi o Isaraelu; ‘ona ‘outou iloa ai lea o a‘u lava o le ALI‘I.
11 E lē fai lenei ‘a‘ai ma ‘ulo ‘iā te ‘outou, e lē fai fo‘i ‘outou ma tufa‘aga o i ai; ‘ou te fa‘asalaina ‘outou i le tuā‘oi o Isaraelu;
12 e iloa ai fo‘i e ‘outou o a‘u lava o le ALI‘I; auā ‘ua ‘outou le sāvavali i a‘u tulafono, e le‘i faia fo‘i a‘u fa‘amasinoga, a ‘ua ‘outou fai e tusa ma tu o nu‘u ‘ese e vagavagaia ‘outou.”
13 ‘Ua oti Pelatia le atali‘i o Penaia o lo‘o ‘ou vavalo atu. ‘Ona ‘ou fa‘apa‘ū faō ai lea ma ‘ou ‘alaga atu ‘ua leo tele, ‘ua fa‘apea atu, “Auē, le Ali‘i e, le ATUA e! ‘e te fa‘aumatia ‘ea ē o totoe ‘iā Isaraelu?”
14 ‘Ona o‘o mai lea o le afioga a le ALI‘I ‘iā te a‘u, ‘ua fa‘apea mai:
15 Le atali‘i e o le tagata, o ou uso, o ou uso lava, o tagata o lou ‘āiga, ‘atoa ma le ‘āiga uma o Isaraelu, o i latou uma lava, o i latou ia ‘ua fai atu i ai ē o nonofo i Ierusalema, “‘Inā ō ‘ese atu ia ‘outou, ia mamao i le ALI‘I; ‘ua tu‘uina mai ‘iā i matou le nu‘u nei e fai mo matou.”
16 O le mea lea ‘ia e fai atu ai: O lo‘o fa‘apea mai le Ali‘i le ATUA: E ui ‘ina ‘ua ‘ou ‘avemamaoina i latou i nu‘u ‘ese, e ui ‘ina ‘ua ‘ou fa‘ata‘ape‘apeina i latou i nu‘u ‘ese‘ese, e fai a‘u ma malumalu ‘iā te i latou i nai tausaga i nu‘u latou te o i ai.
17 O le mea lea ‘ia e fai atu ai: O lo‘o fa‘apea mai le Ali‘i le ATUA: ‘Ou te fa‘apotopotoina mai ‘outou nai nu‘u ‘ese ma aofa‘i mai ‘iā te ‘outou ai nu‘u ‘ese‘ese ‘ua fa‘ata‘ape‘apeina ai ‘outou ma ‘ou avatu ‘iā te ‘outou le lau‘ele‘ele o Isaraelu.
18 Latou te ō mai ai, ma latou ‘ave‘eseina mea leaga uma o i ai, ‘atoa ma mea uma e ‘inosia,
19 ‘Ou te foa‘i atu fo‘i ‘iā te i latou le loto e tasi, ma ‘ou foa‘i atu le loto fou i totonu ‘iā te ‘outou; ‘ou te ‘ave‘eseina le loto fatu a‘i totonu i o latou tino ma ‘ou foa‘i atu le loto ‘a‘ano ‘iā te i latou.
20 ‘Ina ‘ia latou sāvavali i a‘u tulafono ma tausi i a‘u fa‘amasinoga ma latou faia; e fai fo‘i i latou mo‘u nu‘u, e fai fo‘i a‘u mo latou Atua.
21 A o i latou o ē mulimuli atu o latou loto i loto o a latou mea leaga ma a latou mea e ‘inosia, ‘ou te taui atu a latou amio i luga i o latou ulu, o lo‘o fetalai mai ai le Ali‘i le ATUA.
22 ‘Ona si‘itia lea i luga e kerupi o latou ‘apa‘au ma mea ta‘avavale i o latou tafatafa; ‘ua i o latou luga a‘e le pupula o le Atua o Isaraelu.
23 ‘Ona alu a‘e lea o le pupula o le ALI‘I nai totonu o le ‘a‘ai, ‘ua tu i luga o le mauga o lo‘o i le itū i sasa‘e o le ‘a‘ai.
24 ‘Ona si‘itia lea o a‘u e le Agaga, ‘ua ‘avea fo‘i a‘u e le Agaga o le Atua i le fa‘aaliga i Kaletaia ‘iā te i latou o le tāfeaga. ‘Ona alu a‘e lea nai ‘iā te a‘u le fa‘aaliga na ‘ou iloa.
25 ‘Ona ‘ou tala atu ai lea ‘iā te i latou o i le tāfeaga o mea uma na fa‘aalia mai e le ALI‘I ‘iā te a‘u.