1 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2 Le atali‘i e, o le tagata, ‘ia e fa‘asaga atu ‘iā Koku, o le nu‘u o Makoku, le ali‘i sili o Rosi ma Meseko ma Tupalu ma vavalo atu ‘iā te ia,
3 ma e fai atu: ‘Ua fa‘apea ‘ona fetalai mai o le Ali‘i le ATUA, Fa‘auta, ‘ua fai oe mo‘u fili, Koku e, o le ali‘i sili o Rosi ma Meseko ma Tupalu.
4 ‘Ou te fa‘afo‘i ‘iā te oe ma tu‘uina mama i ou ‘auvae ma ‘ou ta‘ita‘i atu ‘iā te oe ma lau itūtau‘a uma, o solofanua ma ē o ti‘eti‘e i solofanua, o i latou uma e ‘o‘ofu i ‘ofutau ‘ato‘atoa, o le vao tagata e to‘atele lava ma talitā ma talipupuni, ‘ua u‘u i latou uma i pelu;
5 o Peresia ma Aitiope ma Futu, fa‘atasi ma i latou; ‘ua tofu i latou uma ma le talipupuni ma le puloutau.
6 O Komeru ma ana ‘au uma; o le ‘āiga fo‘i o Tokaremo mai le itū i matū ma ana ‘au uma, o nu‘u e tele lava e fa‘atasi ma oe.
7 Sauni ia, ‘inā e sauni ia oe, o oe ma lou vao tagata uma, o ē ‘ua fa‘apotopoto mai ‘iā te oe, ‘ia fai fo‘i oe ma leoleo ‘iā te i latou.
8 A mavae aso e tele ‘ona asia ai lea o oe; o ona tausaga amulī ‘e te sau ai i le nu‘u ‘ua fa‘afoisia nai le pelu, ‘ua fa‘apotopotoina nai nu‘u e tele i mauga o Isaraelu, ‘ua fa‘atafunaina pea lava; ‘ae ‘aumaia mai nu‘u ‘ese‘ese, latou te nonofo ma le filemū o i latou uma.
9 ‘E te alu a‘e, ‘e te o‘o mai e pei o se afā; e tusa oe ma le ao e ufitia ai le nu‘u, o oe ma au ‘au uma ma nu‘u e tele e fa‘atasi ma oe.
10 ‘Ua fa‘apea ‘ona fetalai mai o le Ali‘i le ATUA, O ona po lava ia, e tutupu ai mea i lou loto, ‘e te mafaufau fo‘i i se manatu leaga;
11 ‘e te fa‘apea ifo, “‘Ou te alu a‘e i le nu‘u o ‘a‘ai e lē nofo ‘olo; ‘ou te alu ‘iā te i latou o ē o fīfīlemū, o ē nonofo fa‘atalanoa, o i latou uma o nonofo ‘ua leai so latou pā, e leai fo‘i ni a latou fa‘amaufa‘alava, po o puipui,”
12 ‘ina ‘ia ‘avea le vete, ‘ia ‘avea fo‘i mea e faoa; e fa‘asaga lou lima i mea sa fa‘atafunaina, o lo‘o ‘ainā, o le nu‘u fo‘i ‘ua fa‘apotopotoina nai nu‘u ‘ese, ‘ua i ai manu ma ‘oloa, o lo‘o nonofo i le totonugalemū o le lalolagi.
13 O Seepa ma Titana ma ē fa‘atau‘oa o Tasesa, ma ana leona ta‘anoa uma, e fai atu latou ‘iā te oe, “‘Ua e sau ‘ea e ‘ave vete? ‘ua e fa‘apotopotoina ‘ea au ‘au e ‘ave mea ‘ua fao? e ‘ave ario ma auro, e ‘ave manu ma ‘oloa, e ‘ave ai le vete tele?”
14 O le mea lea, le atali‘i e o le tagata, ‘ia e vavalo atu ai ma ‘ia e fai atu ‘iā Koku, ‘Ua fa‘apea ‘ona fetalai mai ai o le Ali‘i le ATUA: O ona po o nonofo ai ma le filemū lo‘u nu‘u o Isaraelu, ‘e te lē iloa ‘ea?
15 E sau lava oe ai lou nu‘u i le itū i matū, o oe ma nu‘u e tele e fa‘atasi ma oe, ē ti‘eti‘e uma i latou i solofanua, o le vao tagata e to‘atele lava ma le itūtau‘a e matuā tele.
16 ‘E te alu a‘e fo‘i e tau ma lo‘u nu‘u o Isaraelu, e pei o le ao e ufitia ai le nu‘u; o ona aso amulī e taunu‘u ai; ‘ou te ‘aumaia fo‘i oe i lo‘u lau‘ele‘ele, ‘ina ‘ia iloa ai a‘u i nu‘u ‘ese, pe a fa‘apa‘iaina a‘u ‘iā te oe Koku e, i o latou luma.
17 ‘Ua fa‘apea ‘ona fetalai mai o le Ali‘i le ATUA: E lē o oe ‘ea o lē na ‘ou fai atu ai anamua i a‘u ‘au‘auna o le ‘au perofeta o Isaraelu, o ē na vavalo i ia ona po o tausaga, ‘Ou te ‘aumai ai oe e tau ma i latou?
18 O lo‘o fetalai mai fo‘i le Ali‘i le ATUA, O ia lava ona po e alu atu ai Koku i le lau‘ele‘ele o Isaraelu, e matuā tupu ai lo‘u ita tele.
19 O lo‘u fuā fo‘i, o le afi lava o lo‘u ita ‘ua ‘ou fai atu ai, O le aso lea e i ai lava le mafui‘e tele i le nu‘u o Isaraelu;
20 ‘ona gatete ai lea i o‘u luma o i‘a o le sami ma manu felelei ma manu fe‘ai o le vao ma mea fetolofi uma e fetolofi i le ‘ele‘ele, ‘atoa ma tagata uma o i le fogā‘ele‘ele, e solo fo‘i mauga, e mafuli fo‘i mea matomato, e sōloia fai pā uma e o‘o i le ‘ele‘ele.
21 ‘Ou te vala‘au fo‘i i le pelu i o‘u mauga uma ‘ia o‘o ‘iā te ia, o lo‘o fetalai mai ai le Ali‘i le ATUA; e ta‘ito‘atasi fo‘i ma fa‘asaga lana pelu i le tasi.
22 ‘Ou te fa‘asala fo‘i ‘iā te ia i le fa‘ama‘i ma le toto; ‘ou te fa‘atotō ifo fo‘i i luga ‘iā te ia ma ana ‘au, ‘atoa ma nu‘u e tele ‘ua ‘iā te ia le timuga tetele ma uato‘a tetele, o le afi, ma le teiō.
23 ‘Ou te fa‘asilisiliina o a‘u e a‘u ma ‘ou fa‘apa‘iaina o a‘u; e iloa fo‘i a‘u i luma o nu‘u e tele, e iloa ai lava e i latou o a‘u lava o le ALI‘I.#