1 O le ono o tausaga, o lona ono o masina, o lona lima o aso o le masina na ‘ou nofo ai i lo‘u fale, sa nonofo fo‘i toeaina o Iuta i o‘u luma, na o‘o mai ai le ‘a‘ao o le Ali‘i le ATUA i luga ‘iā te a‘u.
2 ‘Ona ‘ou va‘ai lea, fa‘auta, o le fa‘atusa e tino mai ‘ua pei o le afi; ‘ua tino mai lona sulugātiti e o‘o i lalo e pei o le afi; ‘ua tino mai fo‘i lona sulugātiti e o‘o a‘e i luga ‘ua pei o le pupula o le lagi, e pei o le tino o le ‘apa pupula.
3 Na ia tu‘u mai le fa‘atusa o le lima ma tago mai ‘iā te a‘u i le fuafuati lauulu o lo‘u ulu; ‘ona si‘itia lea o a‘u e le Agaga i luga i le vā o le lagi ma le lalolagi ma ‘ua ‘ave ‘iā te a‘u i fa‘aaliga mai le Atua i Ierusalema, i le puipui o le faitoto‘a aupito i totonu e fa‘asaga i le itū i matū, o le mea e nofo ai le tupua o le fuā, o lē na te fa‘atupuina le fuā.
4 Fa‘auta fo‘i, sa i ai le pupula o le Atua o Isaraelu, ‘ua tino mai ia e pei ‘ona ‘ou iloa i le fanua laugatasi.
5 ‘Ona fetalai mai lea o ia ‘iā te a‘u, “Le atali‘i e o le tagata, ‘inā tepa a‘e ia i le ala i le itū i matū.” ‘Ona ‘ou tepa a‘e lea i le ala i le itū i matū, fa‘auta fo‘i i le itū i matū, i le faitoto‘a o le fatafaitaulaga, o lenā tupua o le fuā i le mea e ui atu ai.
6 ‘Ua fetalai mai fo‘i o ia ‘iā te a‘u, “Le atali‘i e o le tagata, ‘ua e iloa ‘ea mea o lo‘o faia e i latou; o mea tetele e ‘inosia o lo‘o faia e le ‘āiga o Isaraelu ‘i‘inei, ‘ina ‘ia ‘ou fa‘amamao ma lo‘u malumalu? A ‘ia e toe liliu ane ‘e te iloa ai mea e ‘inosia e sili.”
7 ‘Ua ia ‘aumai fo‘i ‘iā te a‘u i le faitoto‘a o le lotoā, ‘ona ‘ou va‘ai lea, fa‘auta, o le pū i le pā.
8 ‘Ona fai mai lea o ia ‘iā te a‘u, “Le atali‘i e o le tagata, ‘inā ‘eli ia i le pā;” ‘ona ‘ou ‘elia lea o le pā, fa‘auta fo‘i, o le faitoto‘a.
9 ‘Ona fetalai mai lea o ia ‘iā te a‘u, “‘Inā ulu atu ia, ‘inā va‘ai i mea leaga e ‘inosia ‘ua latou faia ‘i‘inei.”
10 ‘Ona ‘ou ulu atu ai lea, ‘ona ‘ou va‘ai lea; fa‘auta fo‘i, o fa‘atusa o mea fetolofi ma manu vaefā leaga uma ma tupua uma a le ‘āiga o Isaraelu, ‘ua tusia i le pā na matuā so‘o ai lava.
11 O lo‘o tutū fo‘i i o latou luma o tagata e to‘afitugafulu o toeaina o le ‘āiga o Isaraelu, o lo‘o tu fo‘i Iaasenaia le atali‘i o Safana i totonu ‘iā i latou; o le tagata ma lana ipu e mū ai mea manogi ‘ua i lona lima, o lo‘o alu a‘e fo‘i le asuasu tele o mea manogi.
12 ‘Ona ia fetalai mai lea ‘iā te a‘u, “Le atali‘i e o le tagata, ‘ua e iloa ‘ea le mea o lo‘o faia e toeaina o le ‘āiga o Isaraelu i le pouliuli, ta‘ito‘atasi le tagata i potu o ana fa‘atagata? auā ‘ua latou fa‘apea. ‘E lē iloa i tatou e le ALI‘I; na lafoa‘iina e le ALI‘I le lalolagi.’”
13 ‘Ua ia fetalai mai fo‘i ‘iā te ia, “‘Ia e toe liliu ane ‘e te iloa ai mea e ‘inosia e sili o lo‘o latou o faia.”
14 ‘Ona ia ‘avea lea o a‘u i le puipui o le faitoto‘a o le fale o le ALI‘I e fesagai ma le itū i matū; fa‘auta, o lo‘o nonofo ai fafine, o lo‘o fētāgisi ‘ona o Tamusa.
15 ‘Ona ia fetalai mai lea ‘iā te a‘u: Le atali‘i e o le tagata, “‘Ua e iloa ‘ea lenā, ‘ia e toe liliu ane, ‘e te iloa ai mea e ‘inosia e sili i nā mea.”
16 ‘Ona ia ‘avea lea o a‘u i le lotoā tuloto i le fale o le ALI‘I, fa‘auta i le faitoto‘a o le malumalu o le ALI‘I, i le vā o le fa‘apaologa ma le fatafaitaulaga, o tagata pe to‘aluafulu ma le to‘alima, ‘ua u atu o latou tua i le malumalu o le ALI‘I, a ‘ua ua‘i o latou mata i sasa‘e, o latou ifo atu i le lā i sasa‘e.
17 ‘Ona fetalai mai lea o ia ‘iā te a‘u, “Le atali‘i e o le tagata, ‘ua e iloa ‘ea lenā? se mea māmā ‘ea i le ‘āiga o Iuta ‘ina ‘ua faia o mea e ‘inosia o lo‘o latou o faia ‘i‘inā? auā ‘ua latou fa‘atumuina le nu‘u i le sauā, ‘ua latou toe liliu fo‘i e fa‘a‘ono‘ono mai ‘iā te a‘u; fa‘auta fo‘i, ‘ua latou ‘ava‘e le la la‘au i o latou isu.
18 O le mea lea ‘ou te taui atu ai ma le ita tele; ‘ou te lē fa‘asaoina, ‘ou te lē fa‘apelepeleina; e ui ‘ina latou vala‘au mai ‘iā te a‘u ma le leo tele, ‘ou te lē fa‘alogo atu lava ‘iā te i latou.”#