1 A ‘outou vaevaeina le lau‘ele‘ele i le vili e fai ma tofi, tou te avatua se taulaga i le ALI‘I, o le mea pa‘ia mai le lau‘ele‘ele; o lona umi e lua sefulu o afe ma afe e lima o u, o lona umi lea, o lona lautele fo‘i e sefulu afe. E pa‘ia fo‘i lea i ona itū uma e so‘o ai.
2 E i ai i lea mea se fasi fanua mo le malumalu, ta‘ilima selau o u i ona itū, e gatasitasi ona itū e fa; e lima sefulu fo‘i o kupita e fai mōna tuāfanua e fa‘ata‘ali‘oli‘o ai.
3 O lenei fua fo‘i ‘e te fuatia mai ai se mea, o lona umi e lua sefulu afe ma afe e lima, a o le lautele e sefulu afe; e i ai le malumalu, o le mea e sili ‘ona pa‘ia.
4 E fai lenei tofi pa‘ia o le lau‘ele‘ele mo le ‘au ositaulaga, o ē ‘au‘auna i le malumalu, o ē fa‘alatalata atu e ‘au‘auna i le ALI‘I; e fai fo‘i ma mea e tutū ai o latou fale, o le mea pa‘ia fo‘i e tu ai le malumalu.
5 O le lua sefulu o afe ma afe e lima o lona umi, ma le sefulu afe o lona lautele, e fai lea mo sa Levī, o ē ‘au‘auna i le fale, e fai ma tofi e fai ai potu e lua sefulu.
6 Tou te tu‘u ane fo‘i le tofi o le ‘a‘ai e lima gaafe lona lautele, e lua sefulu afe ma afe e lima lona umi, e fa‘afesaga‘i ma le taulaga o le tofi pa‘ia, e fai fo‘i lea mo le ‘āiga uma o Isaraelu.
7 E i ai fo‘i se tofi mo le ali‘i sili i le tasi itū ma le isi itū o le taulaga o le tofi pa‘ia ma le tofi o le ‘a‘ai i luma o le taulaga o le tofi pa‘ia i luma fo‘i o le tofi o le ‘a‘ai, e pau mai i le itū i sisifo, e pau mai fo‘i i le itū i sasa‘e; o lona umi fo‘i e fa‘afeagai lea ma le tasi tofi, e pau mai i le tuā‘oi i sisifo, e pau mai i le tuā‘oi i sasa‘e.
8 E fai lona tofi i le lau‘ele‘ele o Isaraelu; e lē toe fa‘asauā fo‘i a‘u ali‘i i lo‘u nu‘u; o le lau‘ele‘ele fo‘i latou te tu‘uina atu i le ‘āiga o Isaraelu, e fa‘atatau i o latou itū‘āiga.
9 ‘Ua fa‘apea ‘ona fetalai mai o le Ali‘i le ATUA, Sōia, ‘outou ali‘i o Isaraelu e; ‘inā tu‘u ia le fa‘asauā ma le fa‘asaunoa, a ‘ia fai amio tatau ma amiotonu; sōia tou te tulia o‘u tagata, o lo‘o o fetalai mai ai le Ali‘i le ATUA.
10 ‘Ia ‘iā te ‘outou le fua fa‘atautau e tatau ma le efa e tatau ma le paita e tatau.
11 O le efa ma le paita e tasi lo lā‘ua fua, ‘ina ‘ia i ai somera e sefulu i le paita, ‘ia i ai fo‘i efa e sefulu i le somera; e fa‘atatauina lona fua i le somera.
12 O le sekeli e lua sefulu o kire ia; e lua sefulu o sekeli, e lua sefulu ma le lima o sekeli, e tasi le sefulu ma le lima o sekeli, e fai ia mo ‘outou mina.
13 O le taulaga lenei tou te avatua; o vaega e ono o le efa a‘i le somera o saito ma vaega e ono o le efa a‘i le somera o karite.
14 O le tulafono fo‘i i le suāu‘u, o le paita o suāu‘u tou te avatua vaega e sefulu o le paita a‘i le kori, o le somera e i ai paita e sefulu; auā o le sefulu o paita o le somera lea.
15 O se tama‘i mamoe e tasi mai le lafu mai le lua o selau mai taaga lelei o Isaraelu, e fai ia ma taulaga i mea e ‘ai ma taulaga mū ma taulaga fa‘afetai, e fai fo‘i ma togiola mo i latou, o lo‘o fetalai mai ai le Ali‘i le ATUA.
16 O tagata uma o le nu‘u, latou te faia lenei taulaga fa‘atasi i le ali‘i sili o Isaraelu.
17 E a le ali‘i sili ‘ona avatu o taulaga mū ma taulaga i mea e ‘ai ma taulaga i mea e inu i tausamiga ma masina fa‘ato‘ā va‘aia ma sapati ma tausamiga uma o le ‘āiga o Isaraelu; na te saunia le taulaga mo le agasala ma le taulaga i mea e ‘ai ma le taulaga mū ma taulaga fa‘afetai, e fai ai se togiola mo le ‘āiga o Isaraelu.
18 ‘Ua fa‘apea ‘ona fetalai mai o le Ali‘i le ATUA: O le ulua‘i masina, o le aso muamua o le masina, ‘e te ‘ave ai se povi po‘a ta‘anoa e sao ‘ona lelei, ‘e te fa‘amamāina a‘i le malumalu;
19 e ‘ave fo‘i e le ositaulaga nisi toto o le taulaga mo le agasala ma avane ai i pou o le fale ma tulimanu e fa o le tafatafa fa‘asili o le fatafaitaulaga ma pou o le faitoto‘a o le lotoā tuloto.
20 E fa‘apea ‘ona e faia i le aso fitu o le masina mo le tagata e sesē, ‘atoa ma lē ‘ua valea; e fa‘apea ‘ona ‘outou fai ai se togiola mo le fale.
21 O le masina muamua, o lona aso e sefulu ma le fa o le masina, tou te fai ai le paseka, o le tausamiga e fitu ona aso; tou te ‘a‘ai ai areto e le fa‘afefeteina.
22 E saunia e le ali‘i sili i lea aso mo ia ma tagata uma o le nu‘u o se povi po‘a e fai ma taulaga mo le agasala.
23 O aso e fitu o le tausamiga na te sauni ai se taulaga mū i le ALI‘I, o povi po‘a ma mamoe po‘a e sao ‘ona lelei, ‘ia ta‘ifitu i aso i aso lava e fitu; ma se tama‘i ‘oti i lea aso ma lea aso e fai ma taulaga mo le agasala.
24 Na te saunia fo‘i le taulaga i mea e ‘ai, o le efa e tasi i le povi po‘a, o le efa fo‘i i le ‘oti po‘a ma le sinu o suāu‘u i le efa.
25 O le masina e fitu, o lona aso e sefulu ma le lima o le masina, na te faia e tusa ma ia mea, i le tausamiga i aso e fitu, e tusa ma le taulaga mo le agasala, e tusa fo‘i ma le taulaga mū, e tusa ma le taulaga i mea e ‘ai, e tusa fo‘i ma le suāu‘u#