1 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2 O oe na le atali‘i o le tagata, ‘ia e sauni se pese e aualofa a‘i ‘iā Turo;
3 ma ‘ia e fai atu ‘iā Turo, O oe o lē nofo i le mea e ui atu ai i le sami, o le fa‘atau‘oa o nu‘u mo nu‘u tu matāfaga e tele, ‘ua fa‘apea ‘ona fetalai mai o le Ali‘i le ATUA:Turo e, ‘ua e fai mai, “O a‘u ‘ua ‘ato‘atoa lo‘u matagofie.”
4 ‘Ua i totonu o le sami ou tuā‘oi,‘ua fa‘a‘ato‘atoaina e ou tufuga lou matagofie.
5 Na latou faia ou laupapa uma i perosi mai Senira;na latou ‘ave fo‘i arasi mai Lepanona e fai a‘i ou fanā.
6 O aluna mai Vasana na latou fai a‘i ou foe,‘ua faia ou nofoa i nifo elefane‘ua fa‘amatagofie a‘i i tasura mai nu‘u tu loto o Kitimo.
7 O le ‘ie vavae lanu ‘ese‘ese mai Aikupito,na e sisi e fai ai mou la;o le ‘ie uli ma le ‘ie pāulimai nu‘u tuloto o Elisa na ufitia ai oe.
8 O tagata o Saitonu ma Arati,na fai i latou mou ‘auva‘a;o ou tagata popoto,Turo e, o ē na ‘iā te oe, sa fai mou tautai.
9 O toeaina o Kavali ma ona tagata popoto,na fai mou tufuga monomono va‘a;o va‘a uma o le sami ma o latou ‘auva‘ana ‘iā te oe e fa‘atau ai lou ‘oloa.
10 Sa i lou itūtau‘a o tagata o Peresia ma Luti ma Futu e fai mou tagata tau;na latou tautau le talitā ma le puloutau i totonu ‘iā te oe;na latou fa‘amatagofie ai oe.
11 O tagata o Arati ma lou itūtau‘a,sa latou i ai i luga i ou pā i itū uma,na i ai fo‘i o Kamati i ou ‘olo;na latou tautau fa‘ata‘ali‘oli‘o o latou talitā i ou pā;na latou fa‘a‘ato‘atoaina lou matagofie.
12 O Tasesa, o le fa‘atau‘oa lea ‘iā te oe, ‘ina ‘ua tele o ‘oloa uma o ario, o u‘amea, o ‘apa sisina ma pulu, na latou fa‘atau ai i au fa‘ataugā‘oa.
13 O Iavana o Tupalu ma Meseko, o fa‘atau‘oa ia ‘iā te oe, na latou fa‘atau tagata ma ipu ‘apamemea i ou fa‘ataugā‘oa.
14 Na fa‘atau sa Tokaremo i ou fa‘ataugā‘oa, o solofanua ma solofanua e ti‘eti‘e ai ‘atoa ma falata.
15 O le fānauga a Titana o fa‘atau‘oa i latou ‘iā te oe; o nu‘u tu matāfaga e tele na fai ma mea e fa‘atau ai au mea na fai, na latou ‘aumai ‘iā te oe o nifo elefane ma apeni e taui ai.
16 O Suria o le fa‘atau‘oa lea ‘iā te oe ‘ina ‘ua tele o au mea na e faia, na latou fa‘atau i ou fa‘ataugā‘oa, o le nofeka ma ‘ie pāuli ma ‘ofu lanu ‘ese‘ese ma ‘ie vavae ma ramuta ma ma‘a mūmū.
17 O Iuta fo‘i ma le nu‘u o Isaraelu, o fa‘atau‘oa ia ‘iā te oe; na latou fa‘atau i ou fa‘ataugā‘oa o le saito Meniti ma panaka ma meli ma suāu‘u ma pulu pasama.
18 O Tamaseko o le fa‘atau‘oa lea ‘iā te oe i le tele o au mea na e faia, ‘ina ‘ua tele fo‘i o ‘oloa uma, o uaina o Elepona ma fulufulu mamoe sina.
19 O Vetana ma Iavanameusala, na latou fa‘atau i ou fa‘ataugā‘oa, o u‘amea gaosia ma kesia ma kani sa i ai i ou fa‘ataugā‘oa.
20 O Titana o le fa‘atau‘oa lea ‘iā te oe i ‘ofu matagofie mo e ti‘eti‘e i solofanua.
21 O Arapi ma ali‘i uma o Kitara, o fa‘atau‘oa ia ‘iā te oe, o tama‘i mamoe ma mamoe po‘a ma oti po‘a; o mea ia na latou fa‘atau ai ‘iā te oe.
22 O tagata fa‘atau‘oa o Seepa ma Ragama, o fa‘atau‘oa ia ‘iā te oe; o mea manogi uma e sili ma ma‘a tāua uma ma auro na latou avane i ou fa‘ataugā‘oa.
23 O Karana ma Kane ma Etena, o fa‘atau‘oa o Seepa ma Asura ma Kilemata, o fa‘atau‘oa ia ‘iā te oe.
24 O i latou ia na fa‘atau ‘iā te oe o mea matagofie, o ‘ofu uli ma ‘ofu lanu ‘ese‘ese ma ‘ofu lelei silisili ‘ua saisaitia i maea, ‘ua mau sa i ai i au mea fa‘atau.
25 O va‘a o Tasesa na latou pepese ‘iā te oe i lou fa‘ataugā‘oa;na fa‘atamao‘āigaina fo‘i oe,na matuā mamalu lava oe i totonu o le sami.
26 O lou ‘auva‘a ‘ua latou ‘aveina oe i le moana sausau;‘ua lepetia lava oe i totonu o le sami i le matagi mai sasa‘e.
27 O lou ‘oloa ma ou fa‘ataugā‘oa,o au mea fa‘atau, o lou ‘auva‘a,ma ou tautai, o ou tufuga monomono va‘a,ma tagata e fa‘atau lou ‘oloa,ma ou tagata tau uma o ‘iā te oe,‘atoa ma ou tagata uma lava o lo‘o ‘iā te oe,e fano i latou i totonu o le sami i le aso e malaia ai oe.
28 O le ta‘alili o le ‘alaga o ou tautai e lūlūina ai ou tuāfanua.
29 O i latou uma fo‘i o ē alo foe,o ‘auva‘a ma tautai uma o le samie ō a‘e i latou a‘i o latou va‘a,ma tutū i le lau‘ele‘ele.
30 Latou te leo tetele ‘ona o oe,ma tagiauē fa‘alotulotu,latou te asu a‘e le efuefu i o latou ululatou te ta‘afilifili i le lefulefu.
31 Latou te selemamāina o latou lauulu ‘ona o oe,ma latou lavalava i ‘ie talatala;latou te fētāgisi fo‘i ‘ona o oe ma le tigā tele o le loto,ma le tagitu‘i fa‘alotulotu.
32 Latou te faia le pese e aualofa a‘i ‘ona o oe,o latou o pepese, e fa‘apea ane,“O se fea nu‘u e tusa ma Turo,e tusa ma le ‘ua fano i totonu o le sami?
33 O le tautu‘u a‘e o lou ‘oloa a‘i le samina e fa‘amalilie ai nu‘u e tele;o lou ‘oloa ma au mea fa‘atau‘ina tele na e fa‘atamao‘āigaina ai tupu o le lalolagi.
34 A ‘ua lepetia nei oe i le sami i le loloto o le moana;‘ua fano ai au mea fa‘atau,ma ou tagata uma i totonu ‘iā te oe.
35 O i latou uma o ē nonofo i nu‘u tu matāfaga‘ua femēmēa‘i i latou ‘ona o oe,o latou tupu fo‘i ‘ua matuā fefefe,‘ua so‘ona gatete lava.
36 O tagata fa‘atau‘oa i nu‘u ‘ua uisa i latou ‘iā te oe;‘ua ‘avea oe ma mea e ala ai le mata‘u,e lē toe i ai lava oe e fa‘avavau.”#