1 ‘Ua o‘o mai fo‘i le afioga a le ALI‘I ‘iā te a‘u i le iva o tausaga i le sefulu o masina, i le aso e sefulu o le masina, ‘ua fa‘apea mai:
2 Le atali‘i e o le tagata, ‘ia e tusia le igoa o le aso, o lenei lava aso; na papa‘i le tupu o i Papelonia i Ierusalema i lenei lava aso.
3 Sauni atu ia se fa‘ata‘oto i le ‘āiga fouvale ma fai atu ‘iā te i latou, O lo‘o fa‘apea ‘ona fetalai mai o le Ali‘i le ATUA:Fa‘ae‘e ia se ‘ulo,‘inā fa‘ae‘e ia ma liligi i ai se vai.
4 Fa‘apotopoto i ai ona tufa‘aga, o tufa‘aga lelei uma;o le ālagavae ma le ālagalima,‘ina fa‘atumu ia i ivi e sili ‘ona lelei.
5 ‘Inā ‘ave ia e ‘ua sili ‘ona lelei o le lafu mamoe,ma fa‘aputuina ivi i ona lalo.‘Ia fa‘avevela ia, ‘ia pupuna,ma ‘ia latou tunua ivi o i ai.
6 O le mea lea ‘ua fa‘apea ‘ona fetalai mai ai o le Ali‘i le ATUA:‘Oi talofa i le ‘a‘ai o ē totolima,o le ‘ulo ‘ua i ai lona otaotama ‘ua lē te‘a ‘ese ai lona otaota.‘Inā tō a‘e ia tufa‘aga ta‘itasi,‘aua ne‘i fai i ai se vili.
7 Auā o lo‘o i totonu ‘iā te ia le toto o lana fasi;na ia tu‘u ai i luga lava o le papa ‘i‘ila;‘ua ia le sasa‘a i ai i le ‘ele‘ele e ufitia ai i le efuefu.
8 ‘Ua ‘ou tu‘uina le toto o lana fasi i luga o le papa ‘i‘ila,‘ia lē ufitia, ‘ina ‘ia fa‘atupuina ai le ita,‘ia matuā taui atu ai.
9 O le mea lea o lo‘o fa‘apea ‘ona fetalai mai ai o le Ali‘i le ATUA:‘Oi talofa i le ‘a‘ai o ē totolima;o a‘u, ‘ou te fa‘ateleina le fa‘aputugafafie.
10 La‘u tele ane ia o fafie,‘inā fa‘amumū ia le afi,‘ia fa‘aumatia le ‘a‘ano,‘ia matuā fa‘amanogi i ai,o ivi fo‘i ia susunuina.
11 I le fa‘ae‘e ane ai e le sua, i luga i ona malala,‘ina ‘ia vevela lona ‘apamemea,ma ‘ia ‘a‘asa, ‘ia usi ai lona leaga i totonu,‘ia fa‘aumatia lona otaota.
12 ‘Ua lailoa lava ia i galuega mamafa,‘ae le‘i mavae atu lona otaota tele ‘iā te ia;e i le afi lona otaota.
13 E i ai le ulavale i lou leaga,auā ‘ua ‘ou fa‘amamāina oe,‘ae le‘i mamā oe;e lē toe fa‘amamāina lava oe i lou leaga,se‘ia ‘ou fa‘ataunu‘u atu lo‘u ita ‘iā te oe.
14 O a‘u o le ALI‘I ‘ua ‘ou fai atu, e o‘o lava, ‘ou te faia lava; ‘ou te lē tu‘ua, ‘ou te lē fa‘asaoina, ‘ou te lē salamō; latou te fa‘amasino ‘iā te oe e tusa ma ou ala ma au mea ‘ua e faia, ‘ua fetalai mai ai le Ali‘i le ATUA.
15 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
16 Le atali‘i e o le tagata, fa‘auta, o le a ‘ou ‘ave‘eseina ‘iā te oe, i le mala, lē ‘ua e fiafia i ai; a ‘e te lē tagitu‘i, ‘e te lē tagi, e le maligi ifo fo‘i ou loimata.
17 ‘Ia e ōi lemū, ‘aua le fa‘anoanoa i ē ‘ua oti, nonoa ia lou pale ‘iā te oe, ma fa‘ase‘e ou vae, ‘aua le ufitia lou laugutu aupitoaluga, ‘aua fo‘i ‘e te ‘ai le mea e ‘ai a tagata.
18 ‘Ona ‘ou tautala atu lea i nu‘u i le taeao, na oti fo‘i la‘u avā i le afiafi; ‘ona ‘ou fai lea i le taeao e pei ‘ona poloa‘iina mai ai o a‘u.
19 ‘Ona fai mai ai lea o le nu‘u ‘iā te a‘u, “‘E te lē fa‘aali mai ‘ea ‘iā te i matou, po o a ‘ea ia mea ‘iā te i matou ‘ua e faia?”
20 ‘Ona ‘ou fai atu ai lea ‘iā te i latou: Na o‘o mai le afioga a le ALI‘I ‘iā te a‘u, ‘ua fa‘apea mai:
21 Fai atu ia i lea ‘āiga o Isaraelu, O lo‘o fa‘apea ‘ona fetalai mai o le Ali‘i le ATUA: Fa‘auta, ‘ou te fa‘aleagaina lo‘u malumalu, o lo ‘outou malosi tou te mitamita ai, o le mea ‘ua ‘outou fiafia i ai ma le mea ‘ua naunau i ai o ‘outou loto; o ‘outou atali‘i fo‘i ma o ‘outou afafine o ē ‘ua tu‘ua e ‘outou, e oti i latou i le pelu.
22 Tou te fai fo‘i e pei ‘ona faia e a‘u; tou te lē ufitia o ‘outou laugutu aupitoaluga, tou te lē ‘a‘ai fo‘i le mea e ‘ai a tagata.
23 E i ai o ‘outou pale i o ‘outou ulu ma o ‘outou se‘evae i o ‘outou vae; tou te lē tagitu‘i, tou te lē fētāgisi; ‘ae tauāu ‘ina fa‘aumatia ‘outou ‘ona o a ‘outou agasala, tou te feoi fo‘i le tasi i le tasi.
24 O lea e fai ai Esekielu ma fa‘ailoga ‘iā te ‘outou; e fa‘apei o mea uma ‘ua faia e ia e fa‘apea fo‘i ‘ona faia e ‘outou; a o‘o mai lea mea, ‘ona ‘outou iloa ai lea o a‘u lava o le Ali‘i le ATUA.
25 O oe na fo‘i le atali‘i o le tagata, o le aso ‘ou te ‘ave‘eseina ai ‘iā te i latou lo latou malosi, o le fiafia i lo latou mamalu, o le mea ‘ua latou fiafia i ai, o le mea ‘ua naunau i ai o latou loto, o latou atali‘i ma o latou afafine.
26 E lē sau ‘ea ‘iā te oe lē ‘ua sao i lea aso e logologo ai ‘iā te oe?
27 O le aso lea e fa‘agaganaina ai oe i le ‘ua sao mai, ‘ona e tautala lea ma e lē toe fa‘alologo; e fai fo‘i oe ma fa‘ailoga ‘iā te i latou; ‘ona iloa ai lea e i latou o a‘u lava o le ALI‘I.