1 O oe fo‘i le atali‘i o le tagata, ‘ia e vavalo atu ‘iā Koku, ma fai atu: O lo‘o fa‘apea ‘ona fetalai mai o le Ali‘i le ATUA: Fa‘auta, ‘ou te fai oe mo‘u fili Koku o le ali‘i sili o Rosi ma Meseko ma Tupalu.
2 ‘Ou te fa‘afoisia oe ma ‘ou ta‘ita‘iina oe, ‘ou te fa‘aa‘e mai fo‘i ‘iā te oe a‘i le itū i matū ma ‘aumai ‘iā te oe i mauga o Isaraelu.
3 ‘Ou te ta fo‘i lau ‘aufana ia pa‘ū ‘ese i lou lima tauagavale ma ‘ou fa‘apa‘ū‘eseina au ū fanafana i lou lima taumatau.
4 ‘E te pa‘ū i mauga o Isaraelu, o oe ma au ‘au uma ma nu‘u o lo‘o ‘iā te oe; ‘ou te tu‘uina atu oe i manu fe‘ai felelei uiga ‘ese‘ese ma manu fe‘ai o le vao, ‘ia ‘aina ai lava oe.
5 ‘E te pa‘ū lava i le fogā‘ele‘ele; auā o a‘u lava ‘ua ‘ou fai atu, o lo‘o fetalai mai ai le Ali‘i le ATUA.
6 ‘Ou te lafo atu fo‘i se afi ‘iā Makoku, ‘atoa ma ē o nonofo fa‘atalanoa i nu‘u tu matāfaga; latou te iloa ai o a‘u lava o le ALI‘I.
7 ‘Ou te fa‘ailoa atu fo‘i lo‘u igoa pa‘ia i totonu o lo‘u nu‘u o Isaraelu; ‘ou te lē toe mafai ‘ona ia fa‘aleagaina i lo‘u igoa pa‘ia; e iloa fo‘i e nu‘u ‘ese o a‘u lava o le ALI‘I, o le Pa‘ia o i Isaraelu.
8 Fa‘auta, ‘ua o‘o mai, ‘ua uma ‘ona fai, o lo‘o fetalai mai ai le Ali‘i le ATUA; o le aso lava lea na ‘ou fai atu ai.
9 E ō atu fo‘i e o nonofo i ‘a‘ai o Isaraelu ma latou fa‘amū ma susunu le ‘au‘upega, o talitā ma talipupuni, o ‘aufana fo‘i ma ū fanafana, o tao fo‘i ma tao e velo; latou te fa‘amūina ai i le afi i tausaga e fitu.
10 Latou te lē ‘ave fo‘i ni la‘au a‘i le vao, latou te lē ta fo‘i ni la‘au i le vao matua; auā latou te fa‘amū le ‘au‘upega i le afi; latou te vetea fo‘i mea a latou o ē sa vetea a latou mea, latou te fao fo‘i mea a ē sa faoa a latou mea, o lo‘o fetalai mai ai le Ali‘i le ATUA.
11 O lea aso fo‘i ‘ou te tu‘u atu ai ‘iā Koku i lea lava mea se mea e fai ma tu‘ugamau i Isaraelu, o le vanu e ui ai tagata i le itū i sasa‘e o le sami e punitia ai e o ui atu ai; latou te tatanu fo‘i ‘iā Koku ma lona vao tagata uma i lea mea; latou te fa‘aigoa ai fo‘i, O le vanu o Hamona-Koku.
12 E fitu masina e tatanu ai i latou e le ‘āiga o Isaraelu, ‘ina ‘ia fa‘amamāina ai le lau‘ele‘ele.
13 E tatanu fo‘i i latou e tagata uma o le nu‘u; e fai fo‘i ma mea e ta‘ua ai i latou, o le aso fo‘i e vi‘ia ai a‘u, o lo‘o fetalai mai ai le Ali‘i le ATUA.
14 Latou te tofia fo‘i isi tagata e fai mo latou faiva ‘ona feoa‘i solo i le nu‘u, latou te fa‘atasi ma e ui ane latou te tanumia e o totoe i le fogā‘ele‘ele a fa‘amamāina ai; a mavae masina e fitu ‘ona latou su‘esu‘e lea.
15 A ō atu fo‘i ē ui ane i le nu‘u, a iloa se tasi se ivi o se tagata, ‘ona fa‘atūina ai lea e ia se fa‘ailoga, se‘ia tanu ai e i latou o ē tanumia tagata i le vanu o Hamona-Koku.
16 E igoa fo‘i le ‘a‘ai ‘iā Hamona. Latou te fa‘amamāina ai fo‘i le nu‘u.
17 ‘Ua fa‘apea fo‘i ‘ona fetalai mai o le Ali‘i le ATUA: O oe le atali‘i o le tagata, ‘ia e fai atu i manu felelei uiga ‘ese‘ese ma manu fe‘ai uma o le vao, ‘Ia aofa‘i mai ‘outou, ‘inā ō mai ia, fa‘apotopoto mai ia ‘outou i itū uma i la‘u faigā‘ai ‘ou te faia ma ‘outou, o le faigā‘ai tele i mauga o Isaraelu tou te ‘a‘ai ai tino ma inu toto.
18 Tou te ‘a‘ai tino o ē malolosi ma inu le toto o ali‘i sili o le lalolagi, o mamoe po‘a ma tama‘i mamoe, ma oti po‘a ma povi po‘a, o manu pepeti o Vasana i latou uma.
19 Tou te ‘a‘ai ga‘o se‘ia ‘outou mā‘o‘ona ma ‘outou inu toto se‘ia ‘outou malilie i la‘u faigā‘ai ‘ou te saunia ma ‘outou.
20 Tou te mā‘o‘ona ai i la‘u la‘o‘ai i solofanua ma ē tau i kariota ma ē malolosi, ‘atoa fo‘i ma le ‘au tau uma lava, o lo‘o fetalai mai ai le Ali‘i le ATUA.
21 ‘Ou te fa‘ailoa atu fo‘i lo‘u mamalu i luma o nu‘u ‘ese; e iloa fo‘i e nu‘u uma la‘u fa‘amasinoga ‘ua ‘ou faia ma lo‘u lima ‘ua ‘ou fa‘ao‘o ‘iā te i latou.
22 E iloa ai fo‘i le ‘āiga o Isaraelu, o a‘u o le ALI‘I lo latou Atua, e amata i lea aso e fa‘apea lava pea.
23 E iloa fo‘i e nu‘u ‘ese na tāfea le ‘āiga o Isaraelu ‘ona o a latou amio leaga, ‘ina ‘ua latou agasala mai ‘iā te a‘u, o le mea lea na ‘alo ai o‘u mata ‘iā te i latou ma ‘ou tu‘uina atu i latou i lima o ē na ita ‘iā te i latou; na oti fo‘i i latou uma i le pelu.
24 ‘Ua ‘ou faia ‘iā te i latou e tusa ma lo latou leaga ma o latou solitulafono, ‘ua ‘alo ai fo‘i o‘u mata ‘iā te i latou.
25 O le mea lea ‘ua fa‘apea ‘ona fetalai mai ai o le Ali‘i le ATUA: ‘Ou te fa‘afoisia nei le tāfeaga a Iakopo, ‘ou te alofa fo‘i i le ‘āiga uma o Isaraelu, ‘ou te fuā fo‘i ‘ona o lo‘u igoa pa‘ia;
26 ‘ina ‘ua uma ‘ona tau‘ave e i latou lo latou fa‘amasiasiga ma a latou amio leaga uma na latou agaleaga mai ai ‘iā te a‘u, ‘ina o latou nonofo ma le filemū i lo latou lau‘ele‘ele, e leai fo‘i sē na fa‘amata‘u ‘iā te i latou.
27 A o‘o ‘ina ‘ou fa‘afoisia mai i latou i nu‘u ‘ese, ma ‘ou fa‘apotopotoina i latou a‘i nu‘u o ē na fai i latou mo latou fili, a fa‘apa‘iaina fo‘i a‘u ‘iā te i latou i luma o nu‘u e tele,
28 ‘ona latou iloa ai lea o a‘u lava o le ALI‘I lo latou Atua, o lē na tāfea ai i latou i nu‘u ‘ese ma ‘ou fa‘apotopotoina i latou i lo latou lava lau‘ele‘ele ma ‘ou le toe tu‘ua lava so latou i ia mea.
29 E lē toe ‘alo lava o‘u mata ‘iā te i latou, ‘ina ‘ua ‘ou liligi ifo lo‘u Agaga i luga o le ‘āiga o Isaraelu, o lo‘o fetalai mai ai le Ali‘i le ATUA.#