1 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2 Se a le mea ‘ua ‘outou fai ai lenei fa‘atusa i le lau‘ele‘ele o Isaraelu, e fa‘apea,“‘Ua ‘aina e tamā o vine moto,‘ae māgiagia ai nifo o le fānau?”
3 O lo‘o ola a‘u, o lo‘o fetalai mai le Ali‘i le ATUA, e lē toe fai lava e ‘outou lona fa‘atusa i Isaraelu.
4 Fa‘auta, o agaga uma, o ‘ou lava i latou; e pei o le agaga o le tamā ‘ona fai mo‘u, e fa‘apea fo‘i le agaga o le atali‘i; o le tagata e agasala e oti ia.
5 ‘Ae ‘āfai e amiotonu le tagata ma ‘ua faia e ia le amio e tatau ma le amiotonu,
6 ‘ua ia le ‘ai i luga o mauga, ‘ua ia le tepa a‘e i tupua o le ‘āiga o Isaraelu, ‘ua ia le fa‘aleagaina le avā a le tasi tagata, ‘ua ia le fa‘alatalata ane i se fafine o lo‘o ‘ona o faia le ma‘i,
7 ‘ua ia le fa‘asauā i se tasi, ‘ua ia toe avatu le mea na tu‘u fa‘afa‘atau e lē ‘ua ‘aitalafu ‘iā te ia, ‘ua ia le fao se mea a se tasi, ‘ua avatu ana mea e ‘ai i lē ‘ua fia ‘ai, ‘ua fa‘a‘ofuina fo‘i lē ‘ua lē lavalavā.
8 E le‘i avatu se mea e ‘aumai ai se totogi fa‘asili, e le‘i talia se mea e fa‘asili, ‘ua fa‘afo‘i lona lima a‘i le amioletonu ma ‘ua fai fa‘amasinoga tonu i lea tagata ma lea tagata.
9 ‘Ua ia savali i a‘u tulafono, ‘ua ‘ana‘ana i a‘u fa‘amasinoga; e faia ma le fa‘amaoni, ‘ua amiotonu o ia; e ola lava ia, o lo‘o fetalai mai ai le Ali‘i le ATUA.
10 ‘Āfai e fānaua e ia se atali‘i e sauā ma le fa‘amaligi toto ma ‘ua faia se tasi o ia mea,
11 ‘ua ia le faia fo‘i ia mea tatau uma, a ‘ua ‘ai i luga o mauga ma ‘ua fa‘aleagaina le avā a le tasi tagata.
12 ‘Ua ia fa‘asauā i lē ‘ua puapuagā ma lē ‘ua mativa, ‘ua ia fao mea, e le‘i toe avatu le mea na tu‘u fa‘afa‘atau, ‘ua tepa a‘e i tupua ma ‘ua fai mea e ‘inosia.
13 ‘Ua ia avatu mea e ‘aumai ai se totogi fa‘asili, ‘ua ia talia fo‘i mea e fa‘asili, pe ola ‘ea ia? E lē ola lava; ‘ua ia faia ia mea uma e ‘inosia, e matuā oti lava o ia; e ‘iā te ia lava lona toto.
14 Fa‘auta fo‘i, a fānaua e ia sona atali‘i, a va‘ai e ia i agasala uma e faia e lona tamā ma ‘ua mafaufau ma ‘ua lē faia o ia mea fa‘apea;
15 e le‘i ‘ai i luga o mauga, e le‘i tepa a‘e i tupua o le ‘āiga o Isaraelu, e le‘i fa‘aleagaina le avā a le tasi tagata,
16 e le‘i fa‘asauā fo‘i o ia i se tasi, e le‘i tāofia le mea na tu‘u fa‘afa‘atau, e le‘i faoa fo‘i se mea, a ‘ua foa‘i atu ana mea e ‘ai i lē fia ‘ai ma ‘ua fa‘a‘ofuina e ia lē ‘ua lē lavalavā.
17 ‘Ua ia fa‘afo‘i lona lima a‘i lē ‘ua puapuagātia, ‘ua lē talia se totogi fa‘asili, po o se mea e fa‘asili, ‘ua usiusita‘i i a‘u fa‘amasinoga ma savali i a‘u tulafono; e lē oti o ia ‘ona o le agasala a lona tamā, ‘ae ola lava ia.
18 A o lona tamā ‘ona ‘ua ia matuā fa‘asauā, ‘ua ia faoa mea a le tasi tagata ma ‘ua fai le mea e lē lelei i lona nu‘u, fa‘auta, e oti o ia i lana agasala.
19 A ‘ua ‘outou fai mai, “E lē tauia i se a i le atali‘i le agasala a le tamā?” ‘Āfai e faia e le atali‘i le amio tatau ma le amiotonu, ‘ua tausi i a‘u tulafono uma, ma ‘ua faia, e ola lava ia.
20 O le tagata e agasala e oti lava ia; e lē tauia le agasala a le tamā i le atali‘i, e lē tauia fo‘i le agasala a le atali‘i i le tamā; o le amiotonu a lē ‘ua amiotonu e i ona luga lava lea, o le amio leaga fo‘i a lē ‘ua amio leaga e i ona luga lava lea.
21 ‘Ae ‘āfai e liliu ‘ese lē ‘ua amio leaga ai ana agasala uma ‘ua na faia ma tausi i a‘u tulafono uma, ma faia e ia le amio tatau ma le amiotonu, e ola lava ia, e lē oti.
22 O ana solitulafono uma na ia faia e le ta‘uta‘ua ‘iā te ia; o lana amiotonu ‘ua ia faia, e ola ai o ia.
23 O lo‘o fetalai mai le Ali‘i le ATUA, ‘Ou te fiafia ‘ea i le oti o lē ‘ua amio leaga? ‘ou te lē fiafia ‘ea pe a liliu ‘ese i lona ala ‘ia ola ai o ia?
24 ‘Ae ‘āfai o liliu ‘ese lē ‘ua amiotonu i lana amiotonu ma ‘ua fai amio leaga ma ‘ua fai e tusa ma mea uma e ‘inosia e faia e lē ‘ua amio leaga, e ola ‘ea ia? O lana amiotonu uma na ia faia, e lē manatua; o lana agasala ‘ua ia agasala ai ma ona sesē ‘ua ia sesē ai, ‘ona o ia mea e oti ai o ia.
25 A ‘ua ‘outou fai mai, “E lē tusa le ala o le Ali‘i.” ‘Inā fa‘alogologo mai ia, le ‘āiga o Isaraelu e, E lē tusa ‘ea lo‘u ala? E lē ‘ua lē tutusa ‘ea o ‘outou ala?
26 A liliu ‘ese lē ‘ua amiotonu i lana amio ma ‘ua fai amio leaga ma oti ai; o lana lava amio leaga ‘ua ia fai e oti ai o ia.
27 A liliu ‘ese fo‘i lē ‘ua amio leaga i lana amio leaga na ia faia ma ‘ua fai le amio tatau ma le amiotonu, e fa‘aolaina e ia lona agaga.
28 Auā ‘ua ia mafaufau ma liliu ‘ese i lona solitulafono uma na ia faia, e ola lava ia, e lē oti.
29 A ‘ua fai mai le ‘āiga o Isaraelu, “E lē tusa le ala o le Ali‘i.” Le ‘āiga o Isaraelu e, e lē tutusa ‘ea o‘u ala? E lē ‘ua lē tutusa ‘ea o ‘outou ala?
30 O le mea lea ‘ou te fa‘amasino ai ‘iā te ‘outou, le ‘āiga o Isaraelu, ta‘ito‘atasi e tusa ma ona ala, o lo‘o fetalai mai ai le Ali‘i le ATUA. Liliu mai ia, ‘inā liliu ‘ese i o ‘outou solitulafono uma; ‘ona lē faia lea o le agasala ma mea e tausuai ai ‘outou.
31 ‘Inā lafoa‘i ia o ‘outou solitulafono uma ‘ua ‘outou solitulafono ai ma ia fai mo ‘outou se loto fou, ma se agaga fou; auā pe se a ‘ea le mea tou te fia oti ai, le ‘āiga o Isaraelu e?
32 Auā ‘ou te lē fiafia lava i le oti o lē oti, o lo‘o fetalai mai ai le Ali‘i le ATUA. O lenei, liliu mai ia ‘outou tou te ola ai.#