1 ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2 Le atali‘i e o le tagata, o fafine e to‘alua, o tama a le fafine to‘atasi,
3 na la talitane i Aikupito; na la talitane a o teine muli i lā‘ua; na ‘omia ai o lā‘ua susu; na tatao ai susu o lā‘ua o taupou.
4 O la igoa fo‘i, o Aola le matua ma Aolipa lona uso; na fai fo‘i i lā‘ua ma a‘u, na la fānanau fo‘i tama tane ma tama teine. A o lā‘ua igoa, o Aola o Samaria lea, o Aolipa o Ierusalema lea.
5 Na mulilua Aola ‘ina o fai ma a‘u; na ia tu‘inanau atu fo‘i i ē na manana‘o ‘iā te ia, o Asuria o ē vāvā lalata ma ia.
6 ‘Ua ‘o‘ofu i latou i ‘ofu uli, o ta‘ita‘i ma faipule, o taulele‘a ‘aulelei i latou uma, o ‘au o ti‘eti‘e i solofanua.
7 Na ia talitane ‘iā i latou, o i latou uma e aupito sili i tagata o Asuria ma i latou uma na ia tu‘inanau i ai; na fa‘aleagaina o ia e ia ‘iā latou tupua uma.
8 Na ia le tu‘ua lona talitane mai Aikupito; auā na latou momoe ma ia ‘ina o teine muli, na latou tatao fo‘i ona susu o taupou o ia ma sasa‘a a latou faita‘aga i luga ‘iā te ia.
9 O le mea lea na ‘ou tu‘uina atu ai o ia i lima o ē na manana‘o ‘iā te ia, o lima lava o tagata o Asuria, na ia tu‘inanau i ai.
10 O i latou na latou fa‘atelenoa ‘iā te ia; na latou ‘ave fo‘i ana tama tane ma ana tama teine; na latou fasioti fo‘i ‘iā te ia i le pelu, ‘ona logologoā lea o ia i fafine ‘ina ‘ua latou fa‘asalaina o ia.
11 ‘Ua iloa e lona uso o Aolipa, ‘ona fa‘asili lea e ia o lona tu‘inanau i le tu‘inanau o lona uso ma lona talitane na sili i le talitane o lona uso.
12 Na ia tu‘inanau i tagata o Asuria, o ē vāvā lalata ma ia, o ta‘ita‘i ma faipule o lo‘o ‘o‘ofu fa‘amatagofie lava, o ‘au o ti‘eti‘e i solofanua, o taulele‘a ‘aulelei i latou uma.
13 ‘Ona ‘ou iloa lea ‘ua leaga o ia, ‘ua tasi lava lo lā‘ua ala.
14 ‘Ua fa‘ateleina e ia lona talitane; auā na ia iloa tane na tusia i le pā, o fa‘atagata fo‘i o Kaletaia, ‘ua tusia i le vali mūmū,
15 ‘ua fusia o latou sulugātiti i fusi, ‘ua i o latou ulu o pulou lanu ‘ese‘ese, e tino mai i ali‘i ta‘ita‘i ‘au i latou uma, e pei o tagata Papelonia o Kaletaia ia, o le nu‘u na fānau ai i latou.
16 ‘Ua ia va‘ai atu i ai, ‘ona ia tu‘inanau atu ai lea ‘iā te i latou; na ia ‘a‘auina atu fo‘i ‘au‘auna ‘iā te i latou i Kaletaia.
17 ‘Ona ō mai ai lea o tagata o Papelonia ‘iā te ia i le moega e fa‘atasi ai, ‘ona latou fa‘aleaga lea ‘iā te ia ‘iā latou faita‘aga, ‘ona leaga ai lea o ia ‘iā te i latou, ‘ona liliu ‘ese ai lea o lona loto ‘iā te i latou.
18 Na ia fa‘aalia lona talitane, na ia fa‘aalia fo‘i lona lē lavalavā; ‘ona liliu ‘ese ai lea o lo‘u loto ‘iā te ia, e pei ‘ona liliu ‘ese o lo‘u loto i lona uso.
19 A ‘ua ia fa‘ateleina lona talitane i lona manatu i ona po ‘ina o teine muli o ia, na ia talitane ai i le nu‘u o Aikupito.
20 Auā na ia tu‘inanau atu ‘ia latou momoe ma ia, o latou tino e pei o le tino o le asini ma le sua o latou tino e pei o le sua o le tino o le solofanua.
21 ‘Ua e toe manatua mea leaga na e faia ‘ina o e teine muli, ‘ina ‘ua ‘omia ou susu e tagata o Aikupito ‘ona o ou susu ‘ina o e teine muli.
22 O le mea lea, Aolipa e, o lo‘o fa‘apea ‘ona fetalai mai ai o le Ali‘i le ATUA: Fa‘auta, ‘ou te fa‘aoso e tau ma oe ē sa manana‘o ‘iā te oe, o ē ‘ua liliu ‘ese ai lou loto, ‘ou te ‘aumaia i latou mai itū uma, latou te tau ma oe;
23 o tagata o Papelonia, ‘atoa ma Kaletaia uma, o Pekota ma Soa ma Koa, o tagata uma o Asuria e fa‘atasi ma i latou; o taulele‘a ‘aulelei, o ta‘ita‘i ma faipule i latou uma, o ē ‘ave ‘au ma ē ta‘ua, o ti‘eti‘e i latou uma i solofanua.
24 E ō mai i latou ‘iā te oe ma ‘au‘upega ma kariota ma mea ta‘avavale ma ‘au o nu‘u; latou te vagaia oe ma le talipupuni ma le talitā ma le puloutau; ‘ou te tu‘uina fo‘i le fa‘amasinoga i o latou luma, latou te fa‘amasino ‘iā te oe e tusa ma a latou fa‘amasinoga.
25 ‘Ou te fa‘ao‘o atu lo‘u fuā ‘iā te oe, latou te fa‘asauā lava ‘iā te oe; latou te fisi‘esea lou isu, ma ou taliga; e oti i le pelu ē ‘ua totoe ‘iā te oe; latou te ‘ave au tama tane ma au tama fafine, e fa‘aumatia fo‘i i le afi ē ‘ua totoe ‘iā te oe.
26 Latou te tō‘ese fo‘i ‘iā te oe ou ‘ofu ma ‘ave au teuga matagofie.
27 ‘Ou te fa‘ai‘uina lou leaga ma lou talitane mai le nu‘u o Aikupito; ‘ona e lē toe fa‘asaga a‘e lea o ou mata ‘iā te i latou ma e lē toe manatua lava Aikupito.
28 Auā o lo‘o fa‘apea ‘ona fetalai mai o le Ali‘i le ATUA: Fa‘auta, ‘ou te tu‘uina atu oe i lima o ē ‘ua e ‘ino‘ino i ai, o lima o ē ‘ua liliu ‘ese ai lou loto.
29 Latou te ‘ino‘ino lava ‘iā te oe, latou te ‘ave fo‘i au mea uma sa e tautigā ai, latou te tu‘ua oe e le ufiufitia ma le lē lavalavā; e fa‘aalia fo‘i le leaga o lou talitane, o lou ulavale ‘atoa ma au faita‘aga.
30 ‘Ou te faia ia mea ‘iā te oe, auā ‘ua e mulimuli atu i nu‘u ‘ese e faita‘aga ai, o i latou ia ‘ua leaga ai oe ‘iā latou tupua.
31 ‘Ua e savali i le ala o lou uso; o le mea lea ‘ou te tu‘uina atu ai lana ipu i lou lima.
32 ‘Ua fa‘apea ‘ona fetalai mai o le Ali‘i le ATUA:‘E te inu i le ipu a lou uso,e loloto ma le tele.E fai oe ma mea e featani ai ma tauemuina ai;e tele lava mea o i ai.
33 E fa‘atumuina oe i le ‘onā ma le fa‘anoanoa,o le ipu o le femēmēa‘i ma le fa‘atafunaga,o le ipu a lou uso o Samaria.
34 ‘E te inu ai ma mitia lava,‘e te ta‘ei fo‘i i ona ta‘ega ipu,ma e saeia ou lava susu.Auā o a‘u ‘ua ‘ou fai atu ai,o lo‘o fa‘apea mai ai le Ali‘i le ATUA.
35 O le mea lea o lo‘o fa‘apea ‘ona fetalai mai ai o le Ali‘i le ATUA: ‘Ua e fa‘agalogalo mai ‘iā te a‘u, ma ‘ua e lafoa‘iina a‘u i ou tua, o le mea lea ‘ia taui ai ‘iā te oe o lou ulavale ma au faita‘aga.
36 ‘Ua fetalai mai fo‘i le ALI‘I ‘iā te a‘u: Le atali‘i e o le tagata, ‘e te lē fa‘amasino ‘ea ‘iā Aola ma Aolipa ma e fa‘aali ‘iā te i lā‘ua a lā‘ua mea e ‘inosia?
37 Auā ‘ua la mulilulua, ‘ua i ai fo‘i le toto i o lā‘ua lima; ‘ua la mulilulua ‘iā la tupua; o a lā‘ua fānau fo‘i na la fānau mai ai ‘iā te a‘u, ‘ua la fa‘aui ane i le afi, ‘ia fa‘aumatia ai mo i latou.
38 ‘Ua la faia fo‘i lenei mea ‘iā te a‘u; ‘ua la fa‘aleagaina lo‘u malumalu i lea lava aso ma o‘u sapati ‘ua la solia;
39 ‘ua la fasia a lā‘ua fānau mo tupua, ‘ona ō mai ai lea o i lā‘ua i lo‘u malumalu i lea lava aso e soli ai; fa‘auta fo‘i, na fa‘apea ‘ona la faia i totonu o lo‘u fale.
40 I le ma lea fo‘i, ‘ua ‘oulua fe‘auina tane ‘ia ō mai i le mea mamao, na ‘auina atu ‘iā te i latou le ‘au‘auna, fa‘auta fo‘i, na latou ō mai; na e tā‘ele ‘ona o i latou ma e valia ou mata ma e teuteu i mea e fa‘amatagofie a‘i.
41 Na e nofo fo‘i i luga o le moega lālelei ‘ua saunia le laulau i ona luma, na e fa‘ae‘eina i ona luga a‘u mea manogi ma a‘u suāu‘u.
42 Na ‘iā te ia fo‘i le leo o le vao tagata ‘ua nonofo fa‘atalanoa; na ‘aumaia fo‘i ‘iā te ia e fa‘atasi ma tagata lautele, o tagata Sepea mai le vao, sa i ai taulima i o latou lima ma pale matagofie i o latou ulu.
43 ‘Ona ‘ou fai atu ai lea ‘iā te ia le ‘ua loa ‘ona fai pea o muliluaga, Latou te faita‘aga lava ‘ea ma ia, o ia fo‘i ma i latou?
44 A ‘ua latou ō ane lava ‘iā te ia, e pei ‘ona latou ō ane i le fafine talitane, na fa‘apea ‘ona latou ō ane ‘iā Aola ma Aolipa, o fafine ulavavale.
45 O tagata amiotonu latou te fa‘amasino ‘iā te i lā‘ua, e pei ‘ona fa‘amasino o fafine mulilulua, e pei ‘ona fa‘amasino fo‘i o fafine e fa‘amaligi toto; auā o fafine mulilulua i lā‘ua, ‘ua i ai fo‘i i le toto i o lā‘ua lima.
46 Auā o lo‘o fa‘apea ‘ona fetalai mai o le Ali‘i le ATUA: ‘Ou te ‘aveina a‘e le motu o tagata ‘iā te i lā‘ua, ‘ou te tu‘uina atu fo‘i i lā‘ua ia fa‘asaunoaina, ma ia vetea a lā‘ua mea.
47 E fetogia i lā‘ua e le motu o tagata i ma‘a, e taia i lā‘ua ‘iā latou pelu; latou te fasiotia fo‘i a lā‘ua tama tane ma a lā‘ua tama fafine ma susunuina o lā‘ua fale i le afi.
48 ‘Ona ‘ou fa‘agataina lea o le ulavale i le nu‘u, ‘ina ‘ia a‘oa‘o ai fafine uma ‘ia lē toe fai e pei o lo ‘oulua ulavale.
49 Latou te taui atu lava lo ‘oulua ulavale ‘iā te ‘oulua, e taui fo‘i ‘iā te ‘oulua le agasala ‘iā ‘oulua tupua; ‘ona ‘oulua iloa ai lea o a‘u lava o le Ali‘i le ATUA.#