1 O oe fo‘i le atali‘i o le tagata, ‘inā ‘aumai ia se ma‘a‘omea ma tu‘u ai i ou luma ma e tusi i ai le ‘a‘ai o Ierusalema;
2 ‘ia e vagaia ma ‘ia e fai se ‘olo e tau ai ma e tanu ai se mea mauti‘eti‘e, ‘ia e tolauapi fo‘i i ai ma avane i ai mea e lepeti a‘i, ‘ia so‘o ai.
3 ‘Ia e ‘aumai fo‘i se u‘amea salafa ma e fa‘atū ai e fai ma pā u‘amea i lo ‘oulua vā ma le ‘a‘ai; ia e matuā fa‘asaga i ai, e vagaia fo‘i ia, e vagaia fo‘i e oe. E fai lea ma fa‘ailoga i le ‘āiga o Isaraelu.
4 O oe fo‘i ia e ta‘oto i lou itū tauagavale, ma ‘ia e fa‘ae‘etia ai le amio leaga a le ‘āiga o Isaraelu, o ona aso ‘atoa ‘e te ta‘oto ai e taui ai ‘iā te oe a latou amio leaga,
5 Auā ‘ua ‘ou fa‘atatau atu ‘iā te oe tausaga o a latou amio leaga, o ona aso ‘atoa e tolu selau ma le ivagafulu o aso, e taui ai ‘iā te oe le amio leaga a le ‘āiga o Isaraelu.
6 A fa‘ai‘uina ia aso ‘ona e toe ta‘oto lea i lou itū taumatau, ia taui ai ‘iā te oe le amio leaga a le ‘āiga o Iuta i aso e fagafulu; ‘ua ‘ou fa‘atatauina atu ‘iā te oe o le aso ma le tausaga o le aso ma le tausaga.
7 ‘E te matuā fa‘asaga atu ai i le vagaia o Ierusalema, ‘e te tō ‘ese le ‘ofu i lou lima ma e vavalo i lona malaia.
8 Fa‘auta fo‘i, ‘ou te fusifusi ‘iā te oe i maea, ‘e te lē feliuliua‘i ai se‘ia fa‘a‘atoaina e oe o aso ‘e te vagai ai.
9 ‘Ia e avane mā oe o saito ma karite ma fua o fue ma atasema ma tokana ma kaseme ma e tu‘u ai i se tanoa e tasi ma fai a‘i ni mea e ai mā oe, e fa‘atatau i ona aso ‘atoa ‘e te ta‘oto ai i lou itū; e tolu selau ma le ivagafulu o aso ‘e te ‘ai ai.
10 O lau mea e ‘ai fo‘i ‘e te ‘ai ai, e fuatia lea o le aso ma sekeli e lua sefulu; ‘e te ‘ai ai e auaua‘i i aso.
11 E fuatia fo‘i le vai ‘e te inu ai, o lona vaega e ono o le sinu; ‘e te inua e auaua‘i i aso.
12 O pōtoi karite ‘e te ‘ai ai, ‘e te tunua fo‘i i otaota mai tagata i o latou luma.
13 ‘Ua fetalai mai fo‘i le ALI‘I, “E fa‘apea lava ‘ona ‘a‘ai o le fānauga a Isaraelu ‘iā latou mea e ‘ai e leaga i nu‘u ‘ese ‘ou te tulia ai i latou.”
14 ‘Ona ‘ou fai atu ai lea, “Auē le Ali‘i e, le ATUA fa‘auta, e le‘i leaga lava a‘u i se mea e ‘ai, auā talu ‘ina ‘ou itiiti ‘ua o‘o mai i nei ona po ‘ou te le‘i ‘ai se mea na mate fua, po o se mea na saeia, e le‘i toia lava lo‘u gutu i se tufa‘aga o manu leaga.”
15 ‘Ona fetalai mai ai lea o ia ‘iā te a‘u, “Fa‘auta, ‘ua ‘ou avatu ‘iā te oe otaota o povi e sui a‘i otaota o tagata, ‘e te sauni ai au mea e ‘ai.”
16 ‘Ua fetalai mai fo‘i o ia ‘iā te a‘u: Le atali‘i e o le tagata, fa‘auta, ‘ou te gausia le to‘oto‘o o le mea e ‘ai i Ierusalema, latou te ‘a‘ai ma le atuatuvale a latou mea e ‘ai ‘ua fuatia; latou te inu fo‘i ma le femēmēa‘i o latou vai ‘ua fuatia;
17 ‘ina ‘ia oge i latou i mea e ‘ai ma vai, e ta‘itasi fo‘i ma femēmēa‘i uma, ma tauāu ‘ina fa‘aumatia i latou ‘iā latou amioleaga.#