8 O le mea lea o lo‘o fa‘apea ‘ona fetalai mai ai o le Ali‘i le ATUA Fa‘auta, ‘ou te fa‘ao‘oina atu le pelu ‘iā te oe ma ‘ou fa‘aumatia ai tagata ‘atoa ma manu o ‘iā te oe.
9 E fa‘atafunaina ma fa‘agaogaoina le nu‘u o Aikupito; latou te iloa ai fo‘i o a‘u lava o le ALI‘I; auā na ia fai ane, “O lo‘u vaitafe le Naila, na ‘ou faia.”
10 Fa‘auta, o le mea lea ‘ou te fai ai oe mo‘u fili ‘atoa ma ou vaitafe; ‘ou te matua fa‘agaogaoina ma fa‘atafunaina le nu‘u o Aikupito, e pau atu i Mekatala e pau mai i Seveni, e o‘o lava i le tuā‘oi o Aitiope.
11 E lē ui atu ai vae o tagata; e lē ui atu ai fo‘i vae o manu; e lē ‘ainā fo‘i ia i tausaga e fagafulu.
12 ‘Ou te fa‘atafunaina le nu‘u o Aikupito fa‘atasi ma nu‘u ‘ua fa‘atafunaina; o ona ‘a‘ai fo‘i fa‘atasi ma ‘a‘ai ‘ua fa‘agaogaoina; e fa‘atafunaina ai i tausaga e fagafulu; ‘ou te fa‘ata‘ape‘apeina Aikupito i nu‘u ma ou fa‘asalalauina i latou i nu‘u ‘ese‘ese.
13 A ‘ua fa‘apea ‘ona fetalai mai o le Ali‘i le ATUA, A mavae tausaga e fagafulu, ‘ona ‘ou fa‘apotopotoina lea o Aikupito ai nu‘u na fa‘ata‘ape‘apeina ai i latou.
14 ‘Ou te fa‘aea le tāfeaga o Aikupito ma ‘ou fa‘afoisia i latou i le nu‘u o Patoro, o le nu‘u o lo latou tupu‘aga, e ‘avea fo‘i i latou i lea mea ma mālō fa‘atauva‘a.