15 ‘Ua fa‘apea ‘ona fetalai mai o le Ali‘i le ATUA: O le aso na alu ifo ai o ia i seoli na ‘ou fa‘atupuina ai le fa‘anoanoa; na ‘ou ufiufitia vai loloto ‘ona o ia, na ‘ou tāofi ona tāfega, na punitia fo‘i vai tetele, na ‘ou fa‘atupuina fo‘i le fa‘anoanoa o Lepanona ‘ona o ia; na matapogia ai la‘au uma o le vao ‘ona o ia.
16 Na ‘ou fa‘agateteina fo‘i nu‘u i le ta‘alili o lona pa‘ū, ‘ina ‘ua ‘ou lafoina o ia i lalo i seoli fa‘atasi ma ē ō ifo i le lua; o la‘au uma fo‘i o Etena o ē silisili ma lelei i Lepanona, o i latou uma e inu vai, ‘ua fa‘amafanafanaina i latou i mea maulalo o le lalolagi.
17 O i latou lava, na latou ō ifo fa‘atasi ma ia i seoli ‘iā te i latou o ē ‘ua fasia i le pelu; o lona lima fo‘i, o ē sa nonofo i lalo ifo o lona paolo i nu‘u.
18 Pe fa‘atusaina oe ‘iā te ai i le mamalu ma le tele i la‘au o Etena? ‘ae lafoina oe i lalo fa‘atasi ma la‘au o Etena i mea maulalo o le lalolagi; ‘e te ta‘atia fa‘atasi ma ē le peritomeina ma ē ‘ua fasia i le pelu. O Farao lea ma lona vao tagata uma, o lo‘o fetalai mai ai le Ali‘i le ATUA.#