24 O i ai Elama ma lona vao tagata uma o lo‘o vagavagai i lona tu‘ugamau, ‘ua fasia uma i latou, ‘ua oti i le pelu, o ē ‘ua ō ifo ‘ua lē peritomeina i mea maulalo i le ‘ele‘ele; o ē na fa‘atupuina lo latou mata‘utia i le nu‘u o tagata ola; a ‘ua o‘o ‘iā te i latou lo latou mā e fa‘atasi ma ē ‘ua ō ifo i le lua.
25 ‘Ua fai e i latou lona moega fa‘atasi ma ē ‘ua fasia, ‘atoa ma lona vao tagata uma; ‘ua vagavagai ona tu‘ugamau ‘iā te ia; o i latou uma e le peritomeina, ‘ua fasia i le pelu; auā sa i ai lo latou mata‘utia i le nu‘u o tagata ola; na o‘o fo‘i ‘iā te i latou lo latou mā e fa‘atasi ma ē ō ifo i le lua; ‘ua tu‘uina atu o ia fa‘atasi ma ē ‘ua fasia.
26 O i ai Meseko ma Tupalu ma lona vao tagata uma; o lo‘o vagavagai o latou tu‘ugamau ‘iā te ia; o i latou uma e le peritomeina, ‘ua fasia i le pelu; auā sa i ai lo latou mata‘utia i le nu‘u o tagata ola.
27 Latou te lē ta‘atitia ‘ea fa‘atasi ma ē malolosi ē ‘ua pa‘u‘ū ‘ua lē peritomeina, o ē ‘ua ō ifo i seoli ma a latou ‘au‘upega? ‘ua avane a latou pelu e aluga a‘i, a ‘ua i ai a latou agasala i luga o latou ivi; auā sa i ai lo latou mata‘utia i ē malolosi i le nu‘u o tagata ola.
28 E gāugau lava oe e fa‘atasi ma ē ‘ua lē peritomeina, ‘e te ta‘atia fa‘atasi ma ē ‘ua fasia i le pelu.
29 E i ai Etoma ma ‘ona tupu ma ona ali‘i sili uma o ē ‘ua tu‘uina ma lo latou malosi fa‘atasi ma ē ‘ua fasia i le pelu; latou te ta‘atitia fa‘atasi ma ē ‘ua lē peritomeina, ‘atoa ma i latou o ē ō ifo i le lua.
30 O i ai fo‘i ali‘i o le itū i matū, o i latou uma, ‘atoa ma Saitonu uma, o ē ‘ua ō ifo fa‘atasi ma ē ‘ua fasia; o lo latou mata‘utia ‘ona o lo latou malosi ‘ua latou māsiasi ai; ‘ua latou ta‘atitia fo‘i ‘ua lē peritomeina, fa‘atasi ma ē ‘ua fasia i le pelu, ‘ua o‘o fo‘i ‘iā te i latou lo latou mā fa‘atasi ma ē ‘ua ō ifo i le lua.