35 ‘Ona latou fai ane lea, “O lenei lau‘ele‘ele sa fa‘atafunaina, ‘ua ‘avea e pei o le fa‘ato‘aga o Etena; o ‘a‘ai fo‘i sa gaogao ma fa‘atafunaina ma lepetia, ‘ua nofo ‘olo i latou ‘ua ‘ainā.”
36 ‘Ona iloa ai lea o nu‘u ‘ese o ē totoe i o ‘outou itū uma, o a‘u o le ALI‘I ‘ua ‘ou atiina a‘e mea sa lepetia ma fa‘ato‘aina le mea sa fa‘atafunaina; o a‘u o le ALI‘I ‘ua ‘ou fai atu ai, ‘ou te faia lava.
37 O lo‘o fa‘apea ‘ona fetalai mai o le Ali‘i le ATUA: E ui i lea, ‘ae sā‘ilia mai pea o a‘u e le ‘āiga o Isaraelu, ‘ia faia ia mea mo i latou; ‘ou te fa‘ato‘ateleina fo‘i i latou e pei se lafu tagata.
38 E pei o le lafu pa‘ia, e pei o le lafu o Ierusalema i ona tausamiga, e fa‘apea ‘ona fa‘atūtūmuina o ‘a‘ai gaogao i lafu tagata; latou te iloa ai o a‘u lava o le ALI‘I.