Mattheu

¹⁴Bafarisi ha ba tswile, ba mo rera, kamoo ba ka mmolayang kateng. ¹⁵Empa Jesu a tseba, mme a tloha teng; matshwele a maholo a mo latela, mme a fodisa bohle ba kulang. ¹⁶A ba laya, a re, ba se ke ba mmolela; ¹⁷ho tle ho etsahale ho boletsweng ke moporofeta Esaia, ha a itse: ¹⁸Bonang mohlanka wa ka eo ke ikgethetseng yena, moratuwa wa ka, eo moya wa ka o kgahliswang ke yena; ke tla bea Moya wa ka hodima hae, mme o tla bolella ditjhaba ho loka. ¹⁹Ha a ka ke a omana; a ke ke a peroha; ha ho ya tla utlwa lentswe la hae diterateng; ²⁰ha a ka ke a roba lehlaka le tenyetsehileng, a ke ke a tima lebonenyana le kubellang, e be a etse hore ho loka ho hlole.