Mattheu

²⁰Ka nako ya shwalane, Jesu a dula dijong le barutuwa ba leshome le metso e mmedi. ²¹Ba ntse ba eja, a re ho bona: Kannete ke re ho lona: E mong wa lona o tla nkeka. ²²Yaba ba swaba haholo, mme e mong le e mong a qala ho mmotsa, a re: A ke nna, Morena? ²³A araba a re: Ya kentseng letsoho morifing le nna, ke yena ya tla nkeka. ²⁴Haele Mora motho, o ikela jwalokaha ho ngodilwe bakeng sa hae; empa ho madimabe motho eo Mora motho a ekang ke yena; ho ka be ho le molemo ho motho eo hola a sa ka a tswalwa. ²⁵Judase, e leng yena ya mo ekang, a araba, a re: Na ke nna, Rabbi? Jesu a re ho yena: O boletse teng. ²⁶Ba re ba sa ja, Jesu a nka bohobe, mme eitse hobane a boke, a bo ngwatha, a bo nea barutuwa ba hae, a re ho bona; Nkang, le je; hona ke mmele wa ka.