Mattheu

²⁴Haele Mora motho, o ikela jwalokaha ho ngodilwe bakeng sa hae; empa ho madimabe motho eo Mora motho a ekang ke yena; ho ka be ho le molemo ho motho eo hola a sa ka a tswalwa. ²⁵Judase, e leng yena ya mo ekang, a araba, a re: Na ke nna, Rabbi? Jesu a re ho yena: O boletse teng. ²⁶Ba re ba sa ja, Jesu a nka bohobe, mme eitse hobane a boke, a bo ngwatha, a bo nea barutuwa ba hae, a re ho bona; Nkang, le je; hona ke mmele wa ka. ²⁷A nka le senwelo, a leboha, a ba nea sona, a re: Nwelang ho sona bohle; ²⁸hobane hona ke madi a ka a selekane se setjha, a tshollelwang ba bangata tshwarelong ya dibe. ²⁹Empa ke re ho lona: Ho qala nakong yona ena, ha ke sa tla hlola ke enwa se behwang ke morara, ho tla be ho fihle tsatsi leo ke tla se nwa le lona se le setjha, mmusong wa Ntate. ³⁰Eitse hobane ba bine dithoko, ba ya thabeng ya Mehlwaare.