Mattheu

⁴⁶Emang, a re yeng; bonang, ya nkekang o se a le haufi. ⁴⁷A re a sa rialo, ha hlaha Judase, e mong wa ba leshome le metso e mmedi, a ena le sehlopha se seholo, se tshwereng disabole le melamu, se romilweng ke baprista ba baholo le baholo ba setjhaba. ⁴⁸Ya mo ekileng o ne a ba neile pontsho, a re: Eo ke tla mo aka, ke yena; le mo tshware. ⁴⁹A phakisa a atamela Jesu, a re: Dumela Rabbi! Mme a mo aka. ⁵⁰Jesu a re ho yena: O tletseng mona, molekana ka? Jwale, ba atamela, ba isa matsoho ho Jesu, ba mo tshwara. ⁵¹Lekgatheng leo, e mong wa ba nang le Jesu a isa letsoho saboleng ya hae, a e tsomola, mme a hlatha mohlanka wa moprista e moholo ka yona, a mo kgaola tsebe. ⁵²Yaba Jesu o re ho yena: Busetsa sabole ya hao selateng sa yona, hobane bohle ba tshwereng sabole, ba tla bolawa ka sabole.