Mattheu

⁵Empa ba re: A e se be mohla mokete, esere mohlomong moferefere wa eba teng hara setjhaba. ⁶Yare ha Jesu a le Bethania, tlung ya Simone, molepera, ⁷ha tla ho yena mosadi ya nang le pitsa ya alebastera, e tletseng setlolo se theko e thata, mme a se tshela hloohong ya Jesu ha a dutse dijong. ⁸Barutuwa ba hae, ha ba bona hoo, ba hlonama, ba re: Tshenyeho eo e thusang? ⁹Athe setlolo seo se ka be se rekile tjhelete tse ngata, tsa newa bafumanehi. ¹⁰Empa Jesu a lemoha hoo, a re ho bona: Le utlwisetsang mosadi eo bohloko? Athe o nkentse ketso e molemo. ¹¹Hobane haele bafumanehi, le tla nne le be le bona kamehla, empa nna, le ke ke la ba le nna kamehla.