Mattheu

³⁹Empa nna, ke re: Le se ke la hanela ya le etsang hampe; empa ekare ha motho a o jabela lerama le letona, o mo sekehele le lona le leng. ⁴⁰Motho, ha a rata ho o tsekisa le ho o amoha kojwana, o mo tlohelle le yona kobo. ⁴¹Ekare ha motho a o qobella, hore o tsamaye le yena meile e le nngwe, o tsamaye di le pedi. ⁴²Nea ya qelang ho wena, o se ke wa furalla ya ratang ho adima ho wena. ⁴³Le utlwile hoba ho kile ho thwe: Rata wa heno, o hloye eo e leng sera ho wena. ⁴⁴Empa nna, ke re ho lona: Ratang bao e leng dira ho lona, le hlohonolofatse ba le rohakang; ba le hloileng le ba etse hantle, le rapelle ba le tsohelang matla le ba le hlorisang; ⁴⁵le tle le be bana ba Ntata lona ya mahodimong; hobane o tjhabisetsa ba babe le ba batle letsatsi la hae, mme o nesetsa ba lokileng le ba kgopo.