1 Sa fa‘atumauina Solomona le atali‘i o Tavita i lona mālō, sa ‘iā te ia lona Atua o le ALI‘I, ‘ua na matuā fa‘ateleina fo‘i lona mamalu.
2 ‘Ona fai atu ai lea o Solomona ‘iā Isaraelu uma, o ali‘i o ta‘ito‘aafe ma ta‘ito‘aselau ma fa‘amasino ma ali‘i sili uma o Isaraelu uma, o matai sili.
3 ‘Ona ō atu ai lea o Solomona ma le fa‘apotopotoga uma fa‘atasi ma ia i le mea maualuga sa i Kipeona; auā sa i ai i lea mea o le fale fetāfa‘i o le fa‘apotopotoga o le Atua na faia e Mose le ‘au‘auna a le ALI‘I i le vao.
4 A o le ‘atola‘au a le Atua na ‘aveina a‘e e Tavita mai Kiriata-iarima i le mea na saunia e Tavita mo le ‘atola‘au; auā na ia fai ai le fale ‘ie i Ierusalema.
5 A o le fatafaitaulaga ‘apamemea na faia e Pesaleli le atali‘i o Auri, o le atali‘i lea o Huro, na i ai lea i luma o le malumalu o le ALI‘I; ‘ua sā‘ili‘ili i ai Solomona ma le fa‘apotopotoga.
6 ‘Ona alu a‘e lea o Solomona i lea mea i le fatafaitaulaga ‘apamemea i luma o le ALI‘I, sa i le fale fetāfa‘i o le fa‘apotopotoga ma na fai i ona luga o taulaga mū e afe.
7 ‘Ua fa‘aali mai le Atua i lea lava po ‘iā Solomona ma fa‘apea mai ‘iā te ia, “‘Ia e fai mai se mea ‘ou te avatu ai ‘iā te oe.”
8 ‘Ona fa‘apea atu ai lea o Solomona i le Atua, “Na e alofa tele i lo‘u tamā o Tavita ma ‘ua e fa‘asoloa‘i ane o a‘u e fai ma tupu.
9 O lenei, le ALI‘I e, le Atua, ‘ia fa‘amaonia lau afioga ‘iā Tavita lo‘u tamā; auā ‘ua e tofia a‘u e fai ma tupu o le nu‘u e to‘atele e pei o le efuefu o le lau‘ele‘ele.
10 O lenei, ‘ia e foa‘i mai ‘iā te a‘u le poto ma le atamai, ‘ina ‘ia ‘ou fealua‘i i luma o le nu‘u nei; auā o ai ‘ea sē na te mafaia ‘ona fa‘amasinoina lou nu‘u nei ‘ua tele?”
11 ‘Ona fa‘apea mai ai lea o le Atua ‘iā Solomona, “‘Ua i ai i lou loto lenei mea, ‘ua e le ole mai i ‘oloa, po o le tamao‘āiga po o le mamalu, pe ‘ia oti ē ‘ua ita mai ‘iā te oe, ‘ua e le ole mai fo‘i i le ola tulu‘i; a ‘ua e ole mai i le poto ma le atamai mo oe, ‘ina ‘ia e mafai ‘ona fa‘amasinoina lo‘u nu‘u, ‘ua ‘ou tofia ai oe ma tupu;
12 o le mea lea ‘ua foa‘iina atu ai ‘iā te oe le poto ma le atamai; ‘ou te foa‘iina atu fo‘i ‘iā te oe le ‘oloa ma le tamao‘āiga ma le mamalu, e le‘i fa‘apea ‘ona i ai i tupu na muamua ‘iā te oe, e lē fa‘apea fo‘i i ni ē mulimuli ‘iā te oe.”
13 ‘Ona toe fo‘i mai ai lea o Solomona i Ierusalema nai le mea maualuga sa i Kipeona, a‘i luma o le fale fetāfa‘i o le fa‘apotopotoga; ‘ua fai o ia ma tupu ‘iā Isaraelu.
14 ‘Ua fa‘apotopotoina e Solomona o kariota ma ‘au e ti‘eti‘e i solofanua; sa ‘iā te ia o kariota e tasi le afe ma le fa o selau ma ‘au e ti‘eti‘e i solofanua e sefulu o afe ma afe e lua, na ia tu‘uina i latou i ‘a‘ai o kariota ma ‘ia fa‘atasi ma le tupu i Ierusalema.
15 ‘Ua fa‘ateleina e le tupu o ario ma auro i Ierusalema e pei o ma‘a; ‘ua ia fa‘ateleina fo‘i o arasi e pei o sukamoru ‘ua i le fanua maulalo.
16 Na ‘aumaia solofanua mā Solomona mai Aikupito; na talia fo‘i e le vao tagata fa‘atau o le tupu o le vao solofanua i le tau.
17 Na latou ‘ava‘e ma ‘aumaia fo‘i mai Aikupito se kariota i tupe e ono selau ma se solofanua i le selau ma le limagafulu o tupe; sa fa‘apea fo‘i ‘ona ‘aumaia e i latou o solofanua mā tupu uma o sa Hetī ma tupu o Suria.