1 ‘Ua ia faia fo‘i le fatafaitaulaga ‘apamemea, e luafulu kupita lona umi, e luafulu kupita lona lautele, e sefulu fo‘i kupita lona maualuga.
2 ‘Ua ia faia fo‘i le vai ‘apamemea e sefulu kupita lona fua, e āfua mai i le tasi itū lau e o‘o i le isi itū lau; o le mea fa‘ata‘ali‘oli‘o lava; e lima kupita lona maualuga; o le fua e tolu sefulu ona kupita na fa‘ata‘ali‘oli‘oina ai.
3 Sa i ona lalo o fa‘atusa o povi, e fa‘ata‘ali‘oli‘oina e so‘o ai; e sefulu i le kupita e tasi, e fa‘ata‘ali‘oli‘oina e so‘o ai le vai. O atu povi e lua sa gaosia ‘ina o gaosia le vai.
4 ‘Ua fa‘ae‘e ai i luga o povi e sefulu ma le lua, ‘ua fa‘asaga le tolu i le itū i matū, ‘ae fa‘asaga le tolu i sisifo, ‘ae fa‘asaga le tolu i le itū i saute, ‘ae fa‘asaga le tolu i sasa‘e; ‘ua i ai fo‘i le vai i o latou luga, ‘ua u i totonu o latou tua uma.
5 O lona mafiafia fo‘i o le alofilima lea ‘ua faia fo‘i o lona lau e pei o le lau o se ipu, ‘ua fai ai fuga o le susana; o lona tumu e tolu afe o paita lea.
6 ‘Ua ia faia fo‘i o tanoa e mulumulu ai e sefulu, o le lima ‘ua ia tu‘u i le itū taumatau ma le lima i le itū tauagavale, e mulumulu ai; na latou mulumulu i ai mea e fai a‘i taulaga mū; a o le vai mo le ‘au ositaulaga lea e mulumulu ai.
7 ‘Ua ia faia fo‘i o tu‘ugālamepa auro e sefulu, e tusa ma o latou tu ma ‘ua tu‘u ai i le malumalu, e lima i le itū taumatau ma le lima le itū tauagavale.
8 ‘Ua ia faia laulau e sefulu ma ‘ua tu‘u ai i le malumalu, o le lima i le itū taumatau ma le lima i le itū tauagavale. ‘Ua ia faia fo‘i ipu auro e selau.
9 ‘Ua ia faia fo‘i le lotoā o le ‘au ositaulaga ma le lotoā tele ma puipui o le lotoā ma ‘ua ufiufi puipui i le ‘apamemea.
10 ‘Ua ia tu‘u fo‘i le vai i le itū taumatau i sasa‘e, ‘ua feagai ma le itū i saute.
11 Na faia e Hiramo o ‘ulo ma suō ma ipu. ‘Ua uma ‘ona faia e Hiramo le galuega na na faia mo le tupu o Solomona mo le fale o le Atua;
12 o pou e lua ma mea lapotopoto ma kapetala ‘ua i luga o pou e lua ma mea fa‘a‘upega e lua e ufiufi a‘i mea lapotopoto e lua o kapetala ‘ua i luga o pou;
13 e fa selau o rimoni i mea fa‘a‘upega e lua; e lua atu rimoni i le mea fa‘a‘upega e tasi, e ufiufi a‘i mea lapotopoto e lua na i ai i kapetala i luga o pou.
14 Na faia fo‘i e ia tu‘ugātanoa, na ia faia fo‘i o tanoa e mulumulu ai i luga o tu‘uga;
15 o le vai e tasi ma povi e sefulu ma le lua i ona lalo.
16 O ‘ulo ma suō ma tui, ‘atoa ma a latou mea uma, na faia e Hiramo lona tamā i ‘apamemea pupula mo le tupu o Solomona mo le fale o le ALI‘I.
17 Na faia ia mea e le tupu i le ‘ele‘ele laugatasi o Ioritana, i le ‘ele‘ele ‘omea i le vā o Sukota ma Saretana.
18 Na faia e Solomona o ia mea uma e matuā tele lava; auā na lē masino lava le fua o le mamafa o ‘apamemea.
19 Na faia e Solomona o mea uma o le fale o le Atua, o le fatafaitaulaga auro ma laulau ‘ua fa‘ae‘e i ai le areto e laulauina i luma;
20 o tu‘ugālamepa ‘atoa ma o latou lamepa auro lelei, e mū ai e pei o le tu, i luma o le mea e fetalai mai ai;
21 o fuga ma lamepa ma i‘ofi, na faia e ia i auro, o auro e sili ‘ona lelei;
22 o sele lamepa ma ipu ma ipu e asu a‘i ma salefu o auro lelei ia. O le faitoto‘a o le fale, o ona puipui aupito i totonu mo le mea e sili ‘ona pa‘ia, ‘atoa ma puipui o le fale o le malumalu, o auro ia.