1 ‘Ua ta‘oto Iosefatu fa‘atasi ma ona tamā, ‘ua tanu fo‘i o ia fa‘atasi ma ona tamā i le ‘a‘ai a Tavita. ‘Ona soloa‘i ane ai lea o Ioramo lona atali‘i e fai ma tupu.
2 Sa ‘iā te ia ona uso, o atali‘i o Iosefatu, o Asaraia ma Ieielu ma Sakaria, ma Asaraio ma Mekaeli, ma Sefatiao; o atali‘i uma ia o Iosefatu le tupu o Isaraelu.
3 Na foa‘iina atu e lo latou tamā ‘iā te i latou mea alofa e tele, o ario ma auro ma ‘oloa tāua, ‘atoa ma ‘a‘ai nofo ‘olo i Iuta; a o le mālō na ia tu‘uina ‘iā Ioramo, auā o ia o le ulumatua.
4 ‘Ua maua e Ioramo le mālō o lona tamā, ‘ona fa‘amalosi ai lea ma na fasioti i ona uso uma i le pelu, ‘atoa ma nisi ali‘i sili o Isaraelu.
5 E tolu sefulu ma le lua o tausaga o Ioramo ‘ina o fai o ia ma tupu; ‘ua fai fo‘i o ia ma tupu i Ierusalema i tausaga e valu.
6 ‘Ua ia savali i le ala o tupu o Isaraelu, e pei ‘ona faia e le ‘āiga o Aapo; auā ‘ua fai māna avā le afafine o Aapo; na fai amio leaga o ia i luma o le ALI‘I.
7 ‘Ae le‘i finagalo le ALI‘I ‘ona fa‘aumatia le ‘āiga o Tavita, ‘ona o le feagaiga na osia ma Tavita, fa‘apei ‘ona fetalai mai o ia, e tu‘uina mai le lamepa ‘iā te ia ma ana fānau i aso uma.
8 O lana nofoa‘iga na fōua ai Iuta e Etoma, ‘ua latou fa‘anofo fo‘i so latou lava tupu.
9 ‘Ona ō atu lea o Ioramo ma ali‘i sili ‘ua ‘iā te ia, ‘atoa ma ana kariota uma fa‘atasi ma ia; ‘ona tula‘i lea o ia i le po ma na fasi ‘iā Etoma na si‘o ‘iā te ia, ‘atoa ma ali‘i o kariota.
10 A ‘ua fōua Iuta e Etoma, ‘ua o‘o lava i ona po nei. O ia ona po na fōua ai o ia e Lipena; auā na tu‘ua e ia o le ALI‘I le Atua o ona tamā.
11 ‘Ua faia fo‘i e ia o mea maualuluga i mauga o Iuta ma fa‘atupu le faita‘aga i ē nonofo i Ierusalema, ma na tōsina ai Iuta.
12 ‘Ua ‘aumai le tusi ‘iā te ia mai ‘iā Elia le perofeta, ‘ua fa‘apea mai, “O lo‘o fa‘apea ‘ona fetalai mai o le ALI‘I le Atua o Tavita lou tamā, ‘Ua e lē savali i ala o Iosefatu lou tamā ma ala o Asa le tupu o Iuta,
13 a ‘ua e savali i le ala o tupu o Isaraelu ma ‘ua e fa‘atupuina le faita‘aga ‘iā Iuta ma ē o nonofo i Ierusalema, e pei o faita‘aga o le ‘āiga o Aapo ma ‘ua e fasiotia fo‘i ou uso o le ‘āiga o lou tamā, o ē ‘ua sili ‘ona lelei ‘iā te oe;
14 fa‘auta, o le mea lea e fa‘ao‘o ai e le ALI‘I le malaia tele i lou nu‘u ma lau fānau ma au avā, ma au ‘oloa uma;
15 o oe fo‘i e ‘iā te oe le ma‘i tele, o le ma‘i e tupu i lou manava, se‘ia pa‘ū i fafo lou ga‘au ‘ona o le ma‘i i lea aso ma lea aso.”
16 ‘Ua fa‘aoso fo‘i e le ALI‘I ‘iā Filisitia ma Arapi, o ē ‘ua latalata ane i Kusa, e tau ma Ioramo.
17 ‘Ona latou ō a‘e lea i Iuta ma osofa‘iina ai ma latou ‘ave ‘oloa uma na maua i le fale o le tupu, o ona atali‘i fo‘i ma ana avā, na lē toe ‘iā te ia se atali‘i, ‘ua na o Ioasasa le aupito itiiti i ona atali‘i.
18 ‘Ua mavae ia mea uma, ‘ona taia lea o ia e le ALI‘I i le ma‘i i lona manava e le mafa‘amalōlōina.
19 ‘Ua o‘o ‘ina mavae o aso e tele, ‘ua ‘atoa tausaga e lua, ‘ona pa‘ū lea i fafo o lona ga‘au ‘ona o lona ma‘i; ‘ona oti ai lea o ia i ma‘i leaga. ‘Ua lē mūina le afi mo ia e lona nu‘u, e pei ‘ona mūina o afi mo ona tamā.
20 E tolu sefulu ma le lua ona tausaga ‘ina o fai o ia ma tupu, na fai fo‘i o ia ma tupu i Ierusalema i tausaga e valu. ‘Ua alu o ia e leai se tausaafi ‘iā te ia. ‘Ua tanu fo‘i o ia i le ‘a‘ai a Tavita, ‘ae lē o i tu‘ugamau o tupu.#