1 ‘Ona soloa‘i ane lea o Iosefatu lona atali‘i e fai ma tupu, ‘ua fa‘amalosia o ia e ia e tete‘e atu ‘iā Isaraelu.
2 ‘Ua ia tofia fo‘i ‘au i ‘a‘ai uma o Iuta ‘ua nofo ‘olo ‘ua ia tofia fo‘i o leoleoga i le nu‘u o Iuta ma ‘a‘ai o Efaraima na faoa e Asa lona tamā.
3 Na i ai le ALI‘I ‘iā Iosefatu, auā ‘ua ia savali i ulua‘i ala o lona tamā o Tavita, na ia le sā‘ili atu ia Paala;
4 a ‘ua sā‘ili atu i le Atua o lona tamā ma ‘ua savali i ana poloa‘iga, ‘ae le‘i pei o mea na faia e Isaraelu.
5 ‘Ona fa‘atumauina ai lea e le ALI‘I le mālō i lona lima; ‘ua ‘aumai fo‘i e Iuta uma o mea alofa ‘iā Iosefatu; sa ‘iā te ia le ‘oloa ma le mamalu e tele.
6 ‘Ua fa‘amalosia fo‘i lona loto i ala o le ALI‘I; ‘ua ‘ave‘eseina fo‘i e ia o mea maualuluga ma tupua o Asaira i Iuta.
7 O le tolu o tausaga o lana nofoa‘iga ‘ua ia ‘a‘auina atu ai ali‘i ‘ua ‘iā te ia, o Peneaila ma Opetaia ma Sakaria ma Natanielu ma Mekaio, e a‘oa‘o atu i ‘a‘ai o Iuta.
8 ‘Ua fa‘atasi ma i latou o sa Levī o Semaia ma Netanaia ma Sepatia ma Asaelu ma Semiramota, ma Ionatana, ma Atonia, ma Topaia ma Topa-atonia, o sa Levī ia; ‘ua fa‘atasi fo‘i ma i latou e Elisama ma Iorama, o ositaulaga.
9 ‘Ua latou a‘oa‘o atu i Iuta, sa ‘iā te i latou fo‘i le tusi o le tulafono a le ALI‘I ma ‘ua latou fa‘ata‘amilo i ‘a‘ai uma o Iuta ma ‘ua a‘oa‘o atu i le nu‘u.
10 Sa i ai le mata‘u i le ALI‘I i mālō uma o nu‘u ‘ua vagavagai ‘iā Iuta, o le mea lea na latou le si‘i mai ai se tau‘a ‘iā Iosefatu.
11 ‘Ua ‘aumai ‘iā Iosefatu e nisi Filisitia o mea alofa ma ario o le taulaga; ‘ua ‘aumai fo‘i ‘iā te ia e tagata o Arapi o lafu, e fitu o afe ma le fitu o selau o mamoe po‘a ma le fitu o afe ma le fitu o selau o ‘oti po‘a.
12 ‘Ua tuputupu tele ai lava le mamalu o Iosefatu; ma ‘ua faia e ia i Iuta o ‘olo ma ‘a‘ai e tu‘u ai ‘oloa.
13 ‘Ua tele lava le galuega sa ‘iā te ia i ‘a‘ai o Iuta; sa i Ierusalema fo‘i le ‘au tau, o toa malolosi.
14 O le faitau lenei o i latou i ‘āiga o latou tama; o ē pule i ‘au e ta‘ito‘aafe o sa Iutā; o Atana o le ali‘i sili ia, ‘ua ‘iā te ia e tolu selau o afe o toa malolosi.
15 E aupito ane ‘iā te ia o Ioanana o le ali‘i sili ia, ma ‘ua ‘iā te ia e lua selau o afe ma afe e valu sefulu o tagata.
16 E aupito ane ‘iā te ia o Amasia o le atali‘i o Sekari, o lē ‘ua ofo fua mai e tu‘uina atu o ia i le ALI‘I; ‘ua ‘iā te ia fo‘i e lua selau o afe o toa malolosi.
17 O lo sa Peniaminā fo‘i, o Eliata, o le toa malosi, ‘ua ‘iā te ia fo‘i o tagata e lua selau o afe ‘ua i ai ‘aufana ma talitā.
18 E aupito ane ‘iā te ia o Iosapa, ‘ua ‘iā te ia fo‘i o ē o sauni i le tau‘a e selau o afe ma afe e valu sefulu.
19 ‘Ua ‘au‘auna i latou nei i le tupu, ‘ae ‘ese i latou na tofia e le tupu i ‘a‘ai nofo ‘olo i Iuta uma.