1 E luafulu ma le lima o tausaga o Iotama ‘ina ‘ua fai o ia ma tupu; ‘ua fai fo‘i o ia ma tupu i Ierusalema i tausaga e sefulu ma le ono. O le igoa fo‘i o lona tinā o Ierusa o le afafine o Satoka.
2 ‘Ua faia e ia le amiotonu i luma o le ALI‘I, e tusa ma mea uma na faia e Usia lona tamā; a ‘ua lē ulufale atu o ia i le malumalu o le ALI‘I. ‘Ua fai pea fo‘i mea leaga e le nu‘u.
3 ‘Ua faia e ia le faitoto‘a aupito i luga o le fale o le ALI‘I ma ‘ua faia fo‘i galuega e tele i le pā o Ofele.
4 ‘Ua ia faia fo‘i ‘a‘ai i mauga o Iuta, ‘ua faia fo‘i ‘olo ma fale leoleo i vao matua.
5 ‘Ua ia tau fo‘i ma le tupu o le fānauga a Amoni, ma ‘ua mālō ‘iā te i latou. ‘Ona ‘aumai lea ‘iā te ia e le fānauga a Amoni i lea tausaga e selau taleni o ario ma le sefulu o afe o kori o saito ma le sefulu o afe o kori o karite. Sa fa‘apea ‘ona ‘aumai ‘iā te ia e le fānauga a Amoni i lona lua o tausaga ma lona tolu.
6 Sa fa‘amalosia Iotama, auā na ia saunia ona ala i luma o le ALI‘I lona Atua.
7 O toe o mea na faia e Iotama ma ona tau‘a uma, ma ana amio, fa‘auta, ‘ua tusia i le tusi i tupu o Isaraelu ma Iuta.
8 E luafulu ma le lima ona tausaga ‘ina ‘ua fai o ia ma tupu; o tausaga fo‘i e sefulu ma le ono na fai ai o ia ma tupu i Ierusalema.
9 ‘Ona ta‘oto lea o Iotama fa‘atasi ma ona tamā, ma ‘ua latou tanumia o ia i le ‘a‘ai Tavita. ‘Ona soloa‘i ane ai lea o Aasa lona atali‘i e fai ma tupu.#