1 E lua sefulu ma le lima o tausaga o Amasia ‘ina o fai o ia ma tupu, ‘ua fai fo‘i o ia ma tupu i Ierusalema i tausaga e lua sefulu ma le iva. O le igoa o lona tinā o Ioatana, o le Ierusalema ia.
2 ‘Ua faia e ia le amiotonu i luma o le ALI‘I, a ‘ua lē faia ma le loto ‘ato‘atoa.
3 ‘Ua mau le mālō ‘iā te ia, ‘ona ia fasiotia lea o ana ‘au‘auna ē na fasioti i lona tamā o le tupu.
4 A ‘ua lē fasiotia a latou fānau, a ‘ua faia e pei ‘ona tusia i le tulafono i le tusi a Mose, na poloa‘i mai ai le ALI‘I, ‘ua fa‘apea mai, “‘Aua ne‘i fasiotia tamā e sui a‘i le fānau, ‘aua fo‘i ne‘i fasiotia le fānau e sui a‘i o latou tamā, a ‘ia ta‘itasi le tagata ma fasiotia o ia ‘ona o lana lava agasala.”
5 ‘Ua fa‘apotopotoina e Amasia o Iuta ma na tofia i latou e fai ma ali‘i o ta‘ito‘aafe ma ali‘i o ta‘ito‘aselau, i ‘āiga o latou tamā, i Iuta uma ma Peniamina; ‘ua ia faitauina i latou e āfua i ē na luafulu o latou tausaga ma ē ‘ua matutua ai ma ‘ua iloa o i latou e tolu selau o afe o tagata tau ‘ua filifilia, e ō atu i tau‘a, o ē ‘ave tao ma tali pupuni.
6 ‘Ua fa‘a‘oloatau‘aina fo‘i e ia o toa malolosi e selau o afe mai Isaraelu i taleni ario e tasi le selau.
7 A ‘ua sau le tagata o le Atua ‘iā te ia, ‘ua fa‘apea atu, “Le tupu e, ‘aua ne‘i ō fa‘atasi ma oe ‘au a Isaraelu; auā e lē o i ai le ALI‘I ‘iā Isaraelu, o le fānauga uma ia a Efaraima.
8 ‘Ae ‘āfai ‘e te alu lava oe, ‘ia faia o lea, ‘ia fa‘amalosi i le tau‘a; e fa‘atautevatevaina oe e le Atua i luma o ē ita mai; auā o i ai le malosi i le Atua e fesoasoani ai ma fa‘atautevatevaina ai.”
9 ‘Ona fa‘apea mai lea a Amasia i le tagata o le Atua, “‘Ae fa‘apefea ‘ea taleni e selau ‘ua ‘ou avatu ai i ‘au a Isaraelu.?”‘Ona tali atu lea o le tagata o le Atua, “E mafaia e le ALI‘I ‘ona foa‘i mai ‘iā te oe mea e sili i lenā.”
10 ‘Ona vavae atu lea o i latou e Amasia, o ‘au lava na ō mai ‘iā te ia mai Efaraima, ‘ia ō i lo latou nu‘u; ‘ona matuā tupu tele ai lea o lo latou ita ‘iā Iuta ma ‘ua latou toe fo‘i i lo latou nu‘u ma le ita tele.
11 A ‘ua fa‘amalosi Amasia ma ‘ua ta‘ita‘i atu lona nu‘u ma ‘ua ō atu i le vanu masima ma fasiotia le fānauga a Seira e sefulu afe.
12 A o afe e sefulu o ē ola ‘ua ‘ave fa‘atagataotau‘a e le fānauga a Iuta ma ‘ave ‘iā te i latou i luga o le mato ma lafo i lalo i latou a‘i luga o le mato, ona momomo ai lea o i latou uma.
13 A o tagata o ‘au na toe fa‘afoisia e Amasia, ‘ina ne‘i latou ō ma ia i le tau‘a, na latou osofia ‘a‘ai o Iuta, e gata mai i Samaria e gata atu i Peteorana, ma fasia o latou e tolu o afe ma latou vetea le vete e tele.
14 ‘Ua toe fo‘i mai Amasia nai le fasiga o tagata o Etoma, ‘ona ‘aumai lea e ia o atua o le fānauga a Seira ma ‘ua fa‘atūina e fai mōna atua ma ifo atu i o latou luma ma fa‘amū mea manogi ‘iā te i latou.
15 ‘Ona tupu lea o le to‘asā o le ALI‘I ‘iā Amasia, ‘ua ‘auina atu ai fo‘i o ia o le perofeta ‘iā te ia ma ‘ua fa‘apea atu ‘iā te ia, “Se a le mea ‘ua e sā‘ili‘ili ai i atua o le nu‘u ‘ua lē mafaia ‘ona lavea‘i lo latou nu‘u a‘i lou lima?”
16 O lo‘o tautala atu o ia ‘iā te ia, ‘ona fa‘apea mai lea o le tupu ‘iā te ia, “‘Ua tofia ‘ea oe e se tasi o le ‘au faipule a le tupu? Sōia o oe, se a le mea e fasia ai oe.”‘Ona tu‘ua ai lea e le perofeta, a ‘ua fa‘apea atu, “‘Ua ‘ou iloa ‘ua finagalo le Atua ‘ia fano oe, ‘ina ‘ua e taia lenei mea ma ‘ua e lē fa‘alogo i la‘u fa‘atonuga.”
17 ‘Ona filifili ai lea o Amasia le tupu o Iuta ma na ‘auina atu le sāvali ‘iā Ioasa le atali‘i o Ioasasa, le atali‘i ia o Ieu le tupu o Isaraelu, ‘ua fa‘apea atu, “Maliu mai ia, se‘i tā fesilafa‘i.”
18 ‘Ona tali mai lea o Ioasa le tupu o Isaraelu ‘iā Amasia le tupu o Iuta, ‘ua fa‘apea mai, “Na ‘ave le fe‘au a le la‘au talatala o i Lepanona le arasi o i Lepanona, ‘ua fa‘apea atu, ‘‘Aumai ia lou afafine e fai ma avā a lo‘u atali‘i;’ a ‘ua ui ane le manu fe‘ai sa i Lepanona, ‘ua soli i le la‘au talatala.
19 ‘Ua e fa‘apea ane, ‘Fa‘auta, ‘ua fasia e oe o Etoma;’ ‘ua fa‘amaualugaina ai fo‘i lou loto e mitamita ai; o lenei ‘inā nofo ia oe i lou fale; ‘e te fa‘atupu le leaga i se a, ‘ina ‘ia malaia ai oe ‘atoa ma Iuta fa‘atasi ma oe?”
20 A ‘ua lē fa‘alogo Amasia, auā mai le Atua lea mea ‘ina ‘ia tu‘uina atu i latou i le lima o ē ita mai, ‘ina ‘ua latou sā‘ili‘ili atu i atua o Etoma.
21 ‘Ona alu a‘e lea o Ioasa le tupu o Isaraelu ma ‘ua la tau ma Amasia le tupu o Iuta i Petesemesa ‘ua ‘iā Iuta.
22 ‘Ona fasia lea o Iuta i luma o Isaraelu ma ‘ua latou ta‘itasi ma sola i o latou fale ‘ie.
23 ‘Ua pu‘e e Ioasa le tupu o Isaraelu ‘iā Amasia le tupu o Iuta o le atali‘i o Ioasa, o le atali‘i lea o Ioasasa, i Petesemesa, ‘ua ‘aumaia o ia i Ierusalema, ‘ona lepeti ai lea e ia o le pā o Ierusalema, e amata i le faitoto‘a o Efaraima e o‘o atu i le faitoto‘a o le tulimanu, o kupita e fa selau.
24 ‘Ua na ‘ave fo‘i o auro ma ario uma ma ipu uma, ‘ua maua i le fale o le Atua sa ia Opete-etoma ma le ‘oloa o le fale o le tupu, ‘atoa ma ni ali‘i e fai ma fa‘afo‘i ita, ‘ona fo‘i atu ai lea o ia i Samaria.
25 E sefulu ma le lima o tausaga na ola ai Amasia le atali‘i o Ioasa le tupu o Iuta, talu ‘ona mavae ‘ona oti o Ioasa le atali‘i o Ioasasa le tupu o Isaraelu.
26 O toe o mea na faia e Amasia, o mea muamua ma mea mulimuli, fa‘auta, e le‘i tusia ‘ea i le tusi i tupu o Iuta ma Isaraelu?
27 O ia ona po na liliu ‘ese ai o Amasia i lona mulimuli i le ALI‘I, ‘ua latou fōua ai fo‘i o ia i Ierusalema; ‘ona sola lea o ia i Lakisa; a ‘ua ‘a‘auina atu nisi e tuliloa ‘iā te ia i Lakisa ma ‘ua latou fasioti ‘iā te ia i lea mea.
28 ‘Ona latou ‘aumai lea ‘iā te ia i luga o solofanua ma ‘ua latou tanumia o ia fa‘atasi ma ona tamā i le ‘a‘ai o Iuta.