1 E sefulu ma le lua tausaga o Manase, ‘ina ‘ua fai o ia ma tupu ma ‘ua fai o ia ma tupu i tausaga e limagafulu ma le lima i Ierusalema;
2 na ia faia le amio leaga i luma o le ALI‘I, e pei o mea leaga a nu‘u na tulia e le ALI‘I i luma o le fānauga a Isaraelu.
3 ‘Ua ia toe faia fo‘i o mea maualuluga na lepetia e Esekia lona tamā ma ‘ua fa‘atū e ia o fatafaitaulaga mo Paala ma ‘ua faia tupua o Asaira ma ‘ua ifo i ‘au uma a le lagi ma ‘au‘auna i ai.
4 ‘Ua faia fo‘i e ia o fatafaitaulaga i le fale o le ALI‘I, o le mea na fetalai mai ai le ALI‘I, “E i ai lo‘u igoa i Ierusalema e fa‘avavau.”
5 ‘Ua faia e ia o fatafaitaulaga mo ‘au uma a le lagi i lotoā uma e lua o le fale o le ALI‘I.
6 ‘Ua ia fa‘aui ane ana fānau i le afi i le vanu o le atali‘i o Hinoma; ‘ua ‘i‘ite fo‘i i ao o le lagi ma fai togafiti fa‘ataulāitu ma tautala fa‘ataulāitu ma sā‘ili i aitu vavalo ma taulāitu; ‘ua faia mea leaga e tele i luma o le ALI‘I e fa‘a‘ono‘ono ‘iā te ia.
7 O le tupua ‘ua ta fo‘i na ia faia, ‘ua ia fa‘atūina ai i le fale o le Atua, i le mea na fetalai mai ai le Atua ‘iā Tavita ma Solomona lona atali‘i, “O le fale nei ma Ierusalema, ‘ua ‘ou filifilia i itū‘āiga uma o Isaraelu, ‘ou te tu‘u ai lo‘u igoa e fa‘avavau;
8 ‘ou te lē toe fa‘ate‘a ‘iā Isaraelu i le lau‘ele‘ele na ‘ou tofia mo ‘outou tamā; tau lava ‘ina ne‘i latou lē ‘ana‘ana ia fai mea uma na ‘ou poloa‘i atu ai ‘iā te i latou ‘iā Mose e tusa ma tulafono uma ma sauniga, ma fa‘amasinoga.”
9 ‘Ua fa‘asesē fo‘i e Manase ‘iā Iuta ma ē ‘ua nonofo i Ierusalema, e fai le amio leaga e sili i le amio a nu‘u na fa‘aumatia e le ALI‘I i luma o le fānauga a Isaraelu.
10 ‘Ua fetalai mai le ALI‘I ‘iā Manase ma lona nu‘u; ‘ae latou te le‘i fa‘alogo ai lava.
11 ‘Ona fa‘ao‘o mai lea e le ALI‘I ‘iā te i latou o ali‘i e pule i ‘au a le tupu o Asuria, ‘ua latou maua Manase i mātau ma ‘ua latou noanoa ‘iā te ia i fa‘amau ‘apamemea ma ‘ave ‘iā te ia i Papelonia.
12 Sa puapuagātia o ia, ‘ona matuā fa‘atoga atu ai lea o ia i le ALI‘I lona Atua ma ‘ua matuā fa‘amaulalo o ia i luma o le Atua o ona tamā,
13 na ia tatalo fo‘i ‘iā te ia; ‘ona fa‘afofoga mai ai lea o ia ‘iā te ia ma na talia lana ‘ai‘oi ma ‘ua fa‘afo‘i mai ‘iā te ia i Ierusalema i lona mālō. ‘Ona iloa ai lea e Manase, o le ALI‘I o le Atua lava ia.
14 ‘Ua mavae ia mea, ona ati a‘e lea e ia o le pā i tua o le ‘a‘ai a Tavita, i le itū i sisifo o Kiona, i le alia e o‘o atu i le faitoto‘a o i‘a ma fa‘ata‘amilo i Ofele ma ati a‘e ai ‘ua maualuga lava ma ‘ua tofia ē pule i ‘au i ‘a‘ai nofo ‘olo uma o Iuta.
15 ‘Ua ia ‘ave ‘ese fo‘i o atua ‘ese ma le tupua nai le fale o le ALI‘I ma fatafaitaulaga uma na ia faia i le mauga o le fale o le ALI‘I ma Ierusalema ma na lafo atu ai i tua o le ‘a‘ai.
16 ‘Ua ia faia fo‘i le fatafaitaulaga o le ALI‘I ma osi i ona luga o taulaga fa‘afetai ma taulaga fa‘ane‘ene‘e, ‘ua ia fai atu fo‘i ‘iā Iuta ‘ia ‘au‘auna atu i le ALI‘I le Atua o Isaraelu.
17 ‘Ae peita‘i ‘ua fai taulaga pea le nu‘u i mea maualuluga, ‘ae na o le ALI‘I lo latou Atua na latou fai taulaga i ai.
18 O toe o mea na faia e Manase ma lana tatalo i lona Atua ma ‘upu a tagata va‘ai na latou fai mai ‘iā te ia i le suafa o le ALI‘I le Atua o Isaraelu, fa‘auta, ‘ua tusia i le tala i tupu o Isaraelu.
19 O lana tatalo fo‘i ma le fa‘afofogaina o ia ma lana agasala ma ana amio leaga uma ma mea na ia fai ai mea maualuluga ma fa‘atū ai tupua o Asaira ma tupua ‘ua ta, a o le‘i fa‘amaulaloina o ia, fa‘auta, ‘ua tusia i tala a Hosai.
20 ‘Ua ta‘oto fo‘i Manase fa‘atasi ma ona tamā ma latou tanumia o ia i lona fale. ‘Ona soloa‘i ane ai lea o Amone lona atali‘i e fai ma tupu.
21 E lua sefulu ma le lua o tausaga o Amone ‘ina ‘ua fai o ia ma tupu; e lua fo‘i tausaga na fai ai o ia ma tupu i Ierusalema.
22 Na faia fo‘i e ia o amio leaga i luma o le ALI‘I, e pei ‘ona faia e Manase lona tamā; auā ‘ua fai taulaga Amone i tupua uma ‘ua ta na faia e Manase lona tamā ma ‘ua ‘au‘auna i ai;
23 a ‘ua lē fa‘amaulalo o ia i luma o le ALI‘I, e pei ‘ona fa‘amaulalo o Manase lona tamā; a o Amone ‘ua fa‘atele e ia ana agasala.
24 ‘Ona fōua lea o ia e ana ‘au‘auna ma latou fasioti ‘iā te ia i lona fale.
25 A ‘ua fasia e tagata o le nu‘u o i latou uma na fōua le tupu o Amone; ‘ua tofia fo‘i e tagata o le nu‘u lona atali‘i o Iosia e fai ma tupu o sui a‘i o ia.