1 ‘Ua manatu Solomona e fai se fale mo le suafa o le ALI‘I ma se fale mo lona mālō.
2 ‘Ona faitauina lea e Solomona o tagata e fitu sefulu o afe e ‘ave avega ma tagata e valu sefulu o afe e talai ma‘a i le mauga ma ē pule ‘iā te i latou e tolu o afe ma le ono o selau.
3 ‘Ua ‘ave fo‘i le fe‘au a Solomona ‘iā Hiramo le tupu o Turo, ‘ua fa‘apea atu, “E pei ‘ona e faia ‘iā Tavita lo‘u tamā, na e ‘aumai ‘iā te ia o arasi e fai a‘i lona fale e nofo ai, ‘ia e fa‘apea ‘ona fai ‘iā te a‘u.
4 Fa‘auta, ‘ou te faia se fale mo le suafa o le ALI‘I lo‘u Atua, e fa‘apa‘iaina mo ia, e fa‘amū ai i ona luma o mea manogi lelei ma le areto fo‘i e laulauina i luma e lē aunoa ma taulaga mū i le taeao ma le afiafi ma sapati ma masina fa‘ato‘ā va‘aia ma tausamiga i le ALI‘I lo matou Atua. O le tulafono lenei ‘iā Isaraelu e fa‘avavau.
5 O le fale ‘ou te faia e telē lava; auā e sili lo matou Atua i atua uma.
6 A o ai ‘ea sē na te mafaia ‘ona fai o se fale mo ia, auā o le lagi ma le lagi o lagi e le ofi ai o ia? O ai fo‘i a‘u nei ‘ou te faia se fale mo ia, tau lava o se fale e mū ai mea manogi i ona luma?
7 O lenei, ‘ia e ‘auina mai ‘iā te a‘u se tagata poto e galue i auro ma ario ma ‘apamemea ma u‘amea ma ‘ie pāuli ma le mūmū ma le uli ma ‘ua iloa togitogi mea, ‘ia fa‘atasi ma ē ‘ua popoto ‘ua ‘iā te a‘u i Iuta ma Ierusalema, o ē na filifilia e Tavita lo‘u tamā.
8 ‘ia e ‘aumai fo‘i ‘iā te a‘u, mai Lepanona, o la‘au o arasi ma perosi ma alemuka; auā ‘ua ‘ou iloa o au ‘au‘auna e popoto e ta la‘au i Lepanona; fa‘auta fo‘i, o a‘u ‘au‘auna latou te fa‘atasi ma au ‘au‘auna,
9 ‘Ia sauniuni fo‘i ma a‘u la‘au ‘ia tele; auā o le fale ‘ou te faia e matuā telē lava.
10 Fa‘auta fo‘i, ‘ou te avatu i au ‘au‘auna, o tufuga ta la‘au, e lua sefulu o afe o kori o saito ‘ua solia ma le lua sefulu o afe o kori o karite ma le lua sefulu o afe o paita o uaina ma le lua sefulu o afe o paita o suāu‘u.”
11 ‘Ona fai mai lea o Hiramo le tupu o Turo i le tusi na ia avatua ‘iā Solomona, “‘Ua alofa mai le ALI‘I i lona nu‘u, o le mea lea ‘ua ia fai ai oe ma tupu ‘iā te i latou.”
12 ‘Ua fa‘apea mai fo‘i o Hiramo, “‘Ia fa‘amanū i le ALI‘I le Atua o Isaraelu, o lē na faia le lagi ma le lalolagi, o lē ‘ua foa‘i mai ‘iā Tavita le tupu le atali‘i poto, o lē iloa mafaufau ma le fa‘autauta, e fai ai se fale mo le ALI‘I ma se fale mo lona mālō.
13 “O lenei, ‘ua ‘ou ‘auina atu le tagata poto, ‘ua iloa fa‘autauta, sa ‘iā Hiramo lo‘u tamā.
14 O le tama a le fafine o le fānauga a Tanu, a o lona tamā o le tagata o Turo, e poto i galuega i auro ma ario ma ‘apamemea ma u‘amea ma ma‘a ma la‘au ma ‘ie pāuli ma le uliuli ma le ‘ie vavae ma le ‘ie mūmū; e togitogi fo‘i mea uma e togitogi ma le mafaufau i galuega faigatā uma e tu‘uina atu ‘iā te ia, e fa‘atasi ma ou tagata popoto ma tagata popoto o lo‘u ali‘i o Tavita lou tamā.
15 O lenei fo‘i, o le saito ma le karite ma le suāu‘u ma le uaina, na fetalai mai ai lo‘u ali‘i, ‘ia ‘aumaia i ana ‘au‘auna.
16 Matou te ta la‘au mai Lepanona e fa‘atatau i mea uma ‘ua e lē maua; matou te momoli atu ‘iā te oe fa‘ava‘ala‘au i le sami i Iopa; ‘ona o ‘ava‘e ai lea i Ierusalema.”
17 ‘Ua faitauina e Solomona o tagata ‘ese uma sa i ai i le nu‘u o Isaraelu, e mulimuli i le faitau na faitauina ai i latou e Tavita lona tamā; ‘ua iloa ai e selau afe ma afe e lima sefulu ma le tolu o afe ma le ono o selau i latou.
18 ‘Ua tofia e ia le fitu sefulu o afe e ‘ave avega, ma le valu sefulu o afe e talai ma‘a i le mauga ma le tolu o afe ma le ono o selau o ē pule i le nu‘u ‘ina ‘ia latou faia le galuega.