1 Sa tele le ‘oa ma le mamalu ‘iā Iosefatu; ‘ua fetaia‘i fo‘i o lā‘ua gafa ma Aapo.
2 ‘Ua mavae nai tausaga, ‘ona alu ifo ai lea o ia ‘iā Aapo i Samaria. ‘Ona fasia lea e Aapo o mamoe ma povi e tele, e tali ai o ia ma le nu‘u na ‘iā te ia; ma ‘ua fa‘aoso ‘iā te ia ‘ia lā ō a‘e i Ramota-Kiliata.
3 ‘Ua fai mai fo‘i Aapo le tupu o Isaraelu ‘iā Iosefatu le tupu o Iuta, “Tā te ō ‘ea ma a‘u i Ramota-Kiliata?”‘Ona ia tali atu ai lea ‘iā te ia, “O a‘u nei e pei o oe lava, o lo‘u nu‘u e pei o lou nu‘u; tatou te ō atu ma oe i le tau‘a.”
4 ‘Ua fai atu fo‘i Iosefatu i le tupu o Isaraelu, “Se‘i e sā‘ili i le aso nei i se afioga mai le ALI‘I.”
5 ‘Ona fa‘apotopoto mai ai lea e le tupu o Isaraelu o le ‘au perofeta e to‘afa selau o tagata ma ‘ua fai atu ‘iā te i latou, “Pe matou te ō a‘e ‘ea i Ramota-Kiliata e tau ai le tau‘a pe ‘aua?”‘Ona latou fai mai lea, “Maliu a‘e ia, auā e tu‘uina mai ai e le Atua i le ‘a‘ao o le tupu.”
6 ‘Ona fai atu lea o Iosefatu, “E lē o ‘i‘inei ‘ea se perofeta a le ALI‘I, ‘ina ‘ia tatou fesili atu ‘iā te ia?”
7 ‘Ona fai mai lea o le tupu o Isaraelu ‘iā Iosefatu, “‘Ua toe le tasi tagata o Mekaio le atali‘i lea o Imila, tatou te fesili atu ai i le ALI‘I; a ‘ou te ‘ino‘ino ‘iā te ia; auā na te lē vavalo mai ‘iā te a‘u i mea lelei, a o mea leaga e lē aunoa.”‘Ona fai atu lea o Iosefatu, “‘Aua le fetalai fa‘apea mai le tupu.”
8 ‘Ona vala‘au lea o le tupu o Isaraelu i le tasi ‘au‘auna sili, ‘ua fa‘apea atu, “‘Ia fa‘avave mai ‘ia Mekaio le atali‘i o Imila.”
9 O le tupu o Isaraelu ma Iosefatu le tupu o Iuta ‘ua la ti‘eti‘e ta‘itasi i lona nofoāli‘i, sa ‘o‘ofu fo‘i i lā‘ua i o lā‘ua ‘ofu ali‘i ma ‘ua la nonofo ai i le mea e aunoa i le faitoto‘a o Samaria; o lo‘o vavalo fo‘i perofeta uma i o lā‘ua luma.
10 Na faia fo‘i e Setekaia le atali‘i o Kenaana o nifo u‘amea mo ia ma fai atu, “O lo‘o o fa‘apea ‘ona fetalai mai o le ALI‘I, O mea nei ‘e te suatia ai Suria, se‘ia e fa‘aumatia i latou.”
11 ‘Ua fa‘apea ‘ona vavalo o perofeta uma, ‘ua fa‘apea atu, “Maliu a‘e ia i Ramota-Kiliata ma ia manuia; auā e tu‘uina mai ai e le ALI‘I i le ‘a‘ao o le tupu.”
12 O lē na alu i le fe‘au e ‘a‘ami atu ‘iā Mekaio, ‘ua fai atu ‘iā te ia, ‘ua fa‘apea atu, “Fa‘auta mai ‘ea i ‘upu a le ‘au perofeta i le tupu ‘ua tasi, ‘ua lelei; o lenei, se‘i fa‘apea fo‘i lau ‘upu, ‘ia pei o so latou, ‘ia e fai atu se ‘upu lelei.”
13 ‘Ona fai mai lea o Mekaio, “O lo‘o soifua le ALI‘I, o le mea e fetalai mai ai lo‘u Atua, o mea lea ‘ou te fai atu ai.”
14 ‘Ua sau fo‘i o ia i le tupu; ‘ona fai atu lea o le tupu ‘iā te ia, “Mekaio e, matou te ō atu ‘ea i Ramota-Kiliata i le tau‘a, pe ‘aua?”‘Ona fai mai lea o ia, “‘Inā maliu a‘e ia ‘outou ma ia manuia, e tu‘uina mai fo‘i i latou i o ‘outou lima.”
15 ‘Ona fai atu lea o le tupu ‘iā te ia, “Pe fo‘i fa‘afia ‘ea ‘ona ‘ou matuā fai atu ‘iā te oe ‘ia tautō mai, ‘aua ne‘i e fai mai ‘iā te a‘u se mea e tasi, tau lava o le ‘upu moni i le suafa o le ALI‘I?”
16 ‘Ona fai mai lea o ia, “Na ‘ou iloa atu ‘iā Isaraelu uma ‘ua fa‘ata‘ape‘apeina i mauga, e pei o mamoe ‘ua leai so latou leoleo. ‘Ona fetalai mai lea o le ALI‘I, ‘O i latou nā, ‘ua leai so latou ali‘i; ‘ia latou ta‘itasi ma toe fo‘i atu i lona fale ma le filemū.’”
17 ‘Ona fai atu lea o le tupu o Isaraelu ‘iā Iosefatu, “Na ‘ou le fai atu ‘ea ‘iā te oe, na te lē vavalo mai ‘iā te a‘u se mea lelei, na o le mea leaga?”
18 ‘Ua toe fai mai Mekaio, “O lenei, ‘inā fa‘afogafoga mai ia i le afioga a le ALI‘I. Na ‘ou iloa atu i le ALI‘I o lo‘o ti‘eti‘e i lona nofoāli‘i, sa tutū fo‘i ‘au uma a le lagi i lona itū taumatau ma lona itū tauagavale.
19 ‘Ua fetalai atu fo‘i le ALI‘I, ‘Po o ai ‘ea na te fa‘a‘ole‘ole ‘iā Aapo le tupu o Isaraelu ‘ina ‘ia alu a‘e o ia ma oti i Ramota-Kiliata?’ ‘Ona fai mai lea o le tasi e fa‘apea, ‘ae fai mai le isi e fa‘apea.
20 ‘Ona alu ane ai lea o le tasi agaga ma tu mai i luma o le ALI‘I, ‘ua fai mai, ‘‘Ou te fa‘a‘ole‘ole ‘iā te ia.’ ‘Ua fetalai atu, le ALI‘I ‘iā te ia, ‘I ni a ‘ea?’
21 ‘Ona fai mai lea o ia, ‘‘Ou te alu atu ma ‘ou fai ma agaga pepelo i gutu o ana perofeta uma.’ ‘Ona fetalai atu lea o le ALI‘I, ‘‘E te fa‘a‘ole‘ole ‘iā te ia, ‘e te mālō ai fo‘i; ‘inā alu ia ma e fa‘apea ‘ona fai.’
22 O lenei, fa‘auta, ‘ua tu‘uina e le ALI‘I le agaga pepelo i gutu o au perofeta nei ma ‘ua fetalai mai e le ALI‘I ‘ia o‘o le leaga ‘iā te oe.”
23 ‘Ona fa‘alatalata mai lea o Setekaia le atali‘i o Kenaana ma na tu‘i mai ‘iā Mekaio i lona alafau ma fai mai, “Po o fea na ui ai le Agaga o le ALI‘I nai ‘iā te a‘u, e tautala atu ‘iā te oe?”
24 ‘Ona fai atu ai lea o Mekaio, “Fa‘auta, ‘e te iloa i lea lava aso ‘e te alu atu ai i le afeafe tuloto ‘e te lafi ai.”
25 ‘Ona fai ane lea o le tupu o Isaraelu, “‘Inā ‘outou ‘ave ia ‘iā Mekaio ma toe fa‘afo‘i ‘iā te ia ‘iā Amone le ali‘i o le ‘a‘ai ma Ioasa le atali‘i o le tupu;
26 ma fai atu, ‘O lo‘o o fa‘apea ‘ona fai mai o le tupu: ‘Inā tu‘uina atu ia o lenei tamaloa i le fale puipui ma fafaga ‘iā te ia i le mea e ‘ai a ē ‘ua tigāina ma le vai a ē ‘ua tigāina, se‘ia ‘ou toe fo‘i mai ma le manuia.’”
27 ‘Ona fai mai lea o Mekaio, “‘Āfai lava ‘e te toe maliu mai ma le manuia, ‘ua ‘ou lē tautala i le afioga mai le ALI‘I.” ‘Ua fai ane fo‘i o ia, “‘Inā fa‘alogologo mai ia o ‘outou le nu‘u uma.”
28 ‘Ona ō a‘e lea o le tupu o Isaraelu ma Iosefatu le tupu o Iuta i Ramota-Kiliata.
29 ‘Ua fai atu le tupu o Isaraelu ‘iā Iosefatu, “‘Ou te ‘ofu ‘ese a‘u ma alu i le tau‘a; a ‘ia e ‘ofu oe i lou lava ‘ofu.” ‘Ona ‘ofu lea o le tupu o Isaraelu ‘ofu ‘ese; ‘ona latou ō lea i le tau‘a.
30 ‘Ua fai atu le tupu o Suria i ali‘i o kariota sa ‘iā te ia, ‘ua ia fa‘apea atu, “‘Aua ne‘i tou tau ma se tagatanu‘u, po o se ali‘i, tau lava o le tupu o Isaraelu.”
31 ‘Ua iloa atu e ali‘i e pule i kariota ‘iā Iosefatu, ‘ona latou fa‘apea ane lea, “O le tupu o Isaraelu lenā.” ‘Ona latou sisi‘o ai lea ‘iā te ia e tau; a ‘ua ‘alaga Iosefatu, ‘ona fesoasoani mai ai lea o le ALI‘I ‘iā te ia; ‘ona fa‘aliliu‘eseina lea o i latou e le Atua ‘iā te ia.
32 ‘Ua iloa e ali‘i e pule i kariota o le tupu o Isaraelu lea, ‘ona latou toe fo‘i atu lea, ‘ua lē toe tuliloa ‘iā te ia.
33 ‘Ua so‘ona fana e le tasi tagata lana u, ‘ua lavea ai le tupu o Isaraelu i le so‘o o le ‘ofutau u‘amea. ‘Ona fai atu lea o ia i le ta‘ita‘i o lona kariota, “‘Inā liliu ane ia o lou lima, ‘ina ‘ia e ‘ave ‘iā te a‘u i tua o ‘au; auā ‘ua ‘ou manu‘a.”
34 ‘Ua fa‘atetele le tau‘a i lea aso; ‘ua i ai pea fo‘i le tupu o Isaraelu i lona kariota fa‘afeagai ma Suria, ‘ua o‘o i le afiafi. ‘Ona oti lea o ia i le itū aso e goto ai le la.