1 ‘Ua fa‘atumauina le mālō e Reopoamo ma ‘ua fa‘amalosia o ia e ia, ‘ona tu‘ua lea e ia ma Isaraelu uma fa‘atasi ma ia o le tulafono a le ALI‘I.
2 O le lima o tausaga o le tupu o Reopoamo na alu a‘e ai o Sesaka le tupu o Aikupito e tau ma Ierusalema, auā na latou agasala atu i le ALI‘I,
3 ma kariota e tasi le afe ma le lua o selau ma ‘au ē ti‘eti‘e i solofanua e ono sefulu o afe, ‘ae lē mafaitaulia o tagata na ō mai ma ia mai Aikupito; o tagata Lipua ma Suki ma Aitiope.
4 ‘Ua ā‘ea e ia o ‘a‘ai nofo ‘olo sa ‘iā Iuta, ‘ona o‘o mai lea o ia i Ierusalema.
5 ‘Ona alu atu lea o Semaia le perofeta ‘iā Reopoamo ma ali‘i sili o Iuta sa fa‘apotopotoina i Ierusalema ‘ona o Sesaka ma ‘ua fa‘apea atu ‘iā te i latou, “O lo‘o fa‘apea ‘ona fetalai mai o le ALI‘I, ‘Ua ‘outou tu‘ua a‘u, o le mea lea ‘ua ‘ou tu‘ua ai ‘outou i le lima o Sesaka.”
6 ‘Ona fa‘amaulalo ai lea o ali‘i sili o Isaraelu ma le tupu, ‘ua latou fa‘apea atu, “O lo‘o amiotonu le ALI‘I.”
7 ‘Ua silafia e le ALI‘I ‘ua fa‘amaulalo i latou, ‘ona tulei mai ai lea o le afioga a le ALI‘I ‘iā Semaia, ‘Ua fa‘apea mai, “‘Ua fa‘amaulalo i latou; ‘ou te lē fa‘aumatia i latou, a ‘ou te tu‘uina atu sina lavea‘iina mo i latou; e le sasa‘aina atu fo‘i lo‘u ita i luga o Ierusalema i le lima o Sesaka.
8 ‘Ae peita‘i e ‘avea ai i latou māna ‘au‘auna; latou te iloa ai le ‘au‘auna mai ‘iā te a‘u ma le ‘au‘auna atu i mālō o nu‘u.”
9 ‘Ua alu a‘e Sesaka le tupu o Aikupito e tau ma Ierusalema ma ‘ua ‘avea e ia o le ‘oloa sa i le fale o le ALI‘I ma le ‘oloa sa i le fale o le tupu, ‘ua ‘avea uma; ‘ua ‘avea fo‘i e ia o talitā auro na faia e Solomona.
10 ‘Ona faia lea e le tupu o Reopoamo o talitā ‘apamemea e sui a‘i ma na tu‘uina atu ai i lima o ali‘i o le ‘au e fa‘afeao, o ē na leoleo i le faitoto‘a o le fale o le tupu.
11 A alu atu le tupu i le fale o le ALI‘I, ‘ona ō mai lea o le ‘au e fa‘afeao ma ‘ave ‘ia talitā ma toe ‘aumai ai i le potu o le ‘au e fa‘afeao.
12 ‘Ua fa‘amaulalo o ia, ‘ona liliu ‘ese ai lea ‘iā te ia o le to‘asā o le ALI‘I, ‘ua ia le matuā fa‘aumatia o ia; sa i ai fo‘i i Iuta le manuia.
13 ‘Ua fa‘amalosia e Reopoamo le tupu ‘iā te ia i Ierusalema ma ‘ua fai o ia ma tupu. Sa fagafulu ma le tasi tausaga o Reopoamo, ‘ina ‘ua fai o ia ma tupu, e tasi le sefulu ma le fitu o tausaga na ia fai ai ma tupu i Ierusalema, o le ‘a‘ai lea na filifilia e le ALI‘I i itū‘āiga uma o Isaraelu, e tu‘u ai lona suafa. O le igoa fo‘i o lona tinā o Naama lea o le sa Amonī.
14 Na amio leaga o ia ‘ina ‘ua lē manatu i lona loto e sā‘ili i le ALI‘I.
15 O mea na faia e Reopoamo, o mea muamua ma mea mulimuli, ‘ua lē tusia ‘ea i le tala a Semaia le perofeta ma Itu le tagata va‘ai i le tusi o gafa? Sa utu tau lava o Reopoamo ma Ierepoamo i aso uma.
16 ‘Ua ta‘oto Reopoamo fa‘atasi ma ona tamā, ‘ua tanu fo‘i o ia i le ‘a‘ai a Tavita. ‘Ona soloa‘i ane ai lea o lona atali‘i o Avia e fai ma tupu.#