1 ‘Ona tofia lea e fai ma tupu e i latou ē na nonofo i Ierusalema o Aasaia lona atali‘i e aupito itiiti e sui a‘i o ia; auā na fasiotia o ē matutua uma e ‘au na ō mai ma tagata Arapi i le toagalauapi. O lea na fai ai ma tupu o Aasaia le atali‘i o Ioramo le tupu o Iuta.
2 E fa sefulu ma le lua o tausaga o Aasaia ‘ina o fai o ia ma tupu; na fai o ia ma tupu i Ierusalema i le tausaga e tasi. O le igoa o lona tinā o Atalia le afafine o Omeri.
3 O ia fo‘i ‘ua savali i ala o le ‘āiga o Aapo; auā na taulalo ‘ese lona tinā ‘iā te ia ‘ina ‘ia amio leaga.
4 ‘Ua amio leaga o ia i luma o le ALI‘I e fa‘apei o le ‘āiga o Aapo; auā na latou taulalo ‘ese ‘iā te ia, ‘ina ‘ua oti lona tamā, e o‘o ai lona malaia.
5 ‘Ua savali o ia e tusa ma lo latou taulalo ‘ese, ‘ua la ō fo‘i ma Ioramo le atali‘i o Aapo le tupu o Isaraelu e tau ma Asaeli le tupu o Suria i Ramota-Kiliata ‘ua manu‘a fo‘i Ioramo i tagata o Suria.
6 ‘Ua toe fo‘i o ia i Isereelu e fofō ai ona manu‘a na manu‘a ai o ia i Rama ‘ina o tau ma Asaeli le tupu o Suria. Na alu ifo fo‘i Asaria le atali‘i o Ioramo le tupu o Iuta e asiasi ‘iā Ioramo le atali‘i o Aapo i Isereelu, auā ‘ua manu‘a o ia.
7 O le malaia o Aasaia mai le Atua lea, ‘ina ‘ua sau o ia ‘iā Ioramo; auā na o‘o i ai, ‘ona la ō atu lea ma Ioramo ‘iā Ieu le atali‘i o Nimesi, o lē na fa‘au‘uina e le ALI‘I ‘ia fa‘aumatia le ‘āiga o Aapo.
8 Na maua fo‘i e Ieu o ali‘i sili o Iuta ma atali‘i o uso o Aasaia, o ē na ‘au‘auna ‘iā Aasaia, ‘ina o fa‘ao‘o e ia le sala i le ‘āiga o Aapo, ‘ona fasiotia lea e ia o i latou.
9 Na sā‘ili‘ili e ia o Aasaia, na latou pu‘e ‘iā te ia, auā na lafi o ia i Samaria, ‘ona latou ‘aumaia lea o ia ‘iā Ieu; ‘ua latou fasioti fo‘i ‘iā te ia, ‘ona latou tanumia lea o ia; auā ‘ua fa‘apea a latou, “O ia o le atali‘i o Iosefatu o lē na sā‘ili i le ALI‘I ma lona loto ‘atoa.”‘Ua leai fo‘i se toe malosi i le ‘āiga o Aasaia e tāofi i le mālō.
10 ‘Ua iloa e Atalia le tinā o Aasaia ‘ua oti lana tama tane, ‘ona tula‘i lea o ia ma fa‘aumatia le fānau uma a le tupu o le ‘āiga o Iuta.
11 A o Iosapa le afafine o le tupu, ‘ua ia ‘ave ‘iā Ioasa le atali‘i o Aasaia, ‘ua āisola ‘iā te ia a‘i atali‘i o le tupu ē na fasiotia ma ‘ua tu‘u o ia ma lē na tausi ‘iā te ia i le potu moe. O Iosapa le afafine o le tupu o Ioramo le avā a Ieoiata le ositaulaga, (auā o ia o le tuafafine o Aasaia,) ‘ua natia ai o ia ‘ia lē iloa ai e Atalia, ‘ona ia le fasiotia ai lea o ia.
12 Sa i ai fo‘i o ia ‘iā te i latou, ‘ua natia i le fale o le Atua i tausaga e ono. ‘Ua fai fo‘i Atalia ma tupu i le nu‘u.