1 ‘Ua toe fo‘i atu Iosefatu le tupu o Iuta i lona fale i Ierusalema ma le filemū.
2 ‘Ona sau lea o Ieu lē atali‘i o Hanani le tagata va‘ai e fa‘afetaia‘i ‘iā te ia, ‘ua fa‘apea mai fo‘i o ia i le tupu o Iosefatu, “E tatau ‘ea ‘ona e fesoasoani i ē amio leaga ma alofa atu ‘iā te i latou o ē ‘ino‘ino i le ALI‘I? O le mea lea o lo‘o i luga ai ‘iā te oe to‘asā mai i le ALI‘I.
3 ‘Ae peita‘i ‘ua maua mea lelei o ‘iā te oe, ‘ina ‘ua e ‘ave‘eseina tupua o Asaira i le nu‘u ma ‘ua saunia lou loto e sā‘ili‘ili i le Atua.”
4 ‘Ua nofo Iosefatu i Ierusalema; ‘ona toe alu atu lea o ia i le nu‘u e gata mai i Peresepa e gata mai i le mauga o Efaraima ma na fa‘afoisia mai i latou i le ALI‘I le Atua o latou tamā.
5 ‘Ua tofia fo‘i e ia fa‘amasino i le nu‘u i ‘a‘ai nofo ‘olo uma o Iuta, o lea ‘a‘ai ma lea ‘a‘ai.
6 ‘Ua ia fai atu fo‘i i fa‘amasino, “‘Ia ‘outou lava i mea tou te faia; auā tou te lē fa‘amasino mo tagata, a o le ALI‘I, ‘ua ‘iā te ‘outou o ia i mea tou te fa‘amasino ai.
7 O lenei, ia ‘iā te ‘outou le mata‘u i le ALI‘I; ‘ia fa‘aeteete ‘outou ma ‘ia ‘outou faia; auā e leai se amioletonu i le ALI‘I lo tatou Atua, po o se fa‘ailogaina o tagata, po o se talia o mea alofa.”
8 ‘Ua tofia fo‘i e Iosefatu Ierusalema nisi o sa Levī, ma ositaulaga ma matai sili o Isaraelu mo le fa‘amasinoga a le ALI‘I ma finauga, ‘ina ‘ua latou toe fo‘i mai i Ierusalema.
9 ‘Ua ia fai atu ‘iā te i latou, ‘ua fa‘apea atu, “‘Ia fa‘apea ‘ona faia e ‘outou ma le mata‘u i le ALI‘I, ma le fa‘amaoni ma le loto sao.
10 O finauga uma e ‘aumai ‘iā te ‘outou mai o ‘outou uso, o ē nonofo i o latou ‘a‘ai, i le toto ma le toto, o le tulafono ma le poloa‘iga, o sauniga ma fa‘amasinoga, tou te apoapoa‘i fo‘i ‘iā te i latou, ‘ina ne‘i latou agasala atu i le ALI‘I ma o‘o mai le to‘asā ‘iā te ‘outou ma o ‘outou uso; ‘ia fa‘apea ‘ona ‘outou faia ‘ona lē agasala lea o ‘outou.
11 Fa‘auta fo‘i, o Amaria o le ositaulaga sili e pule ‘iā te ‘outou i mea uma a le ALI‘I; ma Sepatia le atali‘i o Isamaeli, o lē pule i le ‘āiga o Iuta, i mea uma a le tupu; o sa Levī fo‘i e fai ma faipule i o ‘outou luma. ‘Ia fa‘amalosi ma ‘ia faia; e i ai fo‘i le ALI‘I i ē o amio lelei.”#