1 O le sefulu ma le valu o tausaga o le tupu o Ierepoamo, na fai ai Avia ma tupu o Iuta.
2 E tolu tausaga na fai ai o ia ma tupu i Ierusalema. O le igoa fo‘i o lona tinā o Mekaia le afafine o Urielu, o le Kipea ia.Sa tau Avia ma Ierepoamo.
3 Na amataina le tau‘a e Avia, o lana itūtau‘a o toa malolosi e fa selau o afe o tagata ‘ua filifilia; na tofi mai fo‘i e Ierepoamo le tau‘a e tau ma ia, o lana itūtau‘a e valu selau o afe o tagata ‘ua filifilia, o toa malolosi.
4 ‘Ua tu Avia i luga o le mauga o Semaraima o i le mauga o Efaraima, ‘ua fa‘apea atu, “Ierepoamo e, ma Isaraelu uma, ‘inā fa‘afogafoga mai ia ‘iā te a‘u;
5 tou te lē o iloa ‘ea na foa‘i mai e le ALI‘I le Atua o Isaraelu ‘iā Tavita le mālō e pule ai ‘iā Isaraelu e fa‘avavau, o ia ma ona atali‘i i le feagaiga masima?
6 A o Ierepoamo le atali‘i o Nepata, o le ‘au‘auna a Solomona, le atali‘i o Tavita, ‘ua tu mai o ia ma ‘ua fōua e ia lona ali‘i.
7 ‘Ua fa‘apotopotoina fo‘i ‘iā te ia o tagata fa‘atauva‘a, o tagata ulavavale, na latou fa‘amalolosi i latou e tete‘e ‘iā Reopoamo le atali‘i o Solomona, ‘ina o taule‘ale‘a ma loto vaivai Reopoamo, ‘ua lē ma fa‘amalosi e tete‘e ‘iā te i latou.
8 “O lenei fo‘i, ‘ua ‘outou manatu e fa‘amalosi e tete‘e i le mālō o le ALI‘I o i ai i atali‘i o Tavita; ‘ua matuā to‘atele fo‘i ‘outou, ‘ua ‘iā te ‘outou fo‘i tama‘i povi auro na faia e Ierepoamo mo ‘outou e fai ma atua.
9 ‘Ua lē tulia ‘ea e ‘outou le ‘au ositaulaga a le ALI‘I, o le fānauga a Arona ma sa Levī ma ‘ua faia mo ‘outou o ositaulaga e pei o tagata o nu‘u ‘ese? ‘Ai se tasi e ‘aumai se povi po‘a ta‘anoa ma mamoe po‘a e fitu, e tofia a‘i o ia, e fai o ia ma ositaulaga ‘iā te i latou e lē ni atua.
10 A o i matou nei, o le ALI‘I o lo matou Atua ia; ‘ua lē tu‘ua o ia e i matou; o ositaulaga fo‘i, e o ‘au‘auna i le ALI‘I, o le fānauga a Arona ma sa Levī e fai a latou galuega;
11 ‘ua latou susunuina taulaga mū i le ALI‘I i lea taeao ma lea taeao, i lea afiafi ma lea afiafi; ma mea manogi lelei ma le areto e laulauina i luma i luga o le laulau auro lelei; ma le tu‘ugālamepa auro ma ona lamepa, e mumū ai i lea afiafi ma lea afiafi; auā na tausia e i matou le sauniga a le ALI‘I lo matou Atua; a ‘ua tu‘ua o ia e ‘outou.
12 Fa‘auta fo‘i, o ‘iā te i matou o le Atua e fai ma ali‘i sili; o ona ositaulaga fo‘i ma pū leo ta‘alili e ili i le leo fa‘atetetete ‘iā te ‘outou. Le fānauga a Isaraelu e, ‘aua tou te tau ma le ALI‘I le Atua o ‘outou tamā; auā e le manuia ‘outou.”
13 A ‘ua fai atu Ierepoamo ‘ia sisi‘o le ‘au e tanu i o latou tua; sa i ai fo‘i i latou i luma o Iuta, sa i o latou tua fo‘i le ‘au ‘ua tanu.
14 ‘Ona tepa lea i tua o Iuta, fa‘auta fo‘i, sa i ai ‘au i o latou luma ma o latou tua; ‘ona ‘alalaga atu lea o i latou i le ALI‘I ma ‘ua ili pū e le ‘au ositaulaga.
15 ‘Ona solovī lea o tagata o Iuta; ‘ua solovī tagata o Iuta, ‘ona fasia lea e le Atua o Ierepoamo ma Isaraelu uma i luma o Avia ma Iuta.
16 ‘Ona sōsōla lea o le fānauga a Isaraelu i luma o Iuta; ‘ua tu‘uina mai fo‘i i latou e le Atua i o latou lima.
17 ‘Ua fasia fo‘i i latou e Avia ma lona nu‘u, ‘ua tele lava le fasi. E lima selau o afe o tagata filifilia o Isaraelu na fasiotia.
18 ‘Ona fa‘ato‘ilaloina ai lea o le fānauga a Isaraelu i ia ona po ma ‘ua manumālō le fānauga a Iuta, auā na latou fa‘alagolago i le ALI‘I le Atua o latou tamā.
19 ‘Ua tuliloaina Ierepoamo e Avia, ‘ua faoa fo‘i o ‘a‘ai sa ‘iā te ia, o Peteli ma ona faoa ‘a‘ai ma Iesana ma ona faoa ‘a‘ai ma Eferona ma ona faoa ‘a‘ai.
20 ‘Ua lē toe maua se malosi e Ierepoamo i ona po o Avia; ‘ua taia o ia e le ALI‘I, ‘ona oti ai lea o ia.
21 A ‘ua tupu le malosi o Avia, ‘ua fai ni ana avā e to‘asefulu ma le to‘afa ma ‘ua fānaua ona atali‘i e to‘aluafulu ma le to‘alua ma afafine e to‘asefulu ma le to‘aono.
22 O toe o mea na faia e Avia ma ana amio ma ana ‘upu, ‘ua tusia i le tala a Itu le perofeta.#