1 ‘Ua alu atu Reopoamo i Sekema; auā na ō mai Isaraelu uma lava i Sekema, ‘ia fai o ia ma tupu.
2 ‘Ua fa‘alogo ai Ierepoamo le atali‘i o Nepata a o i Aikupito o ia, na sola ai o ia a‘i luma o le tupu o Solomona, ‘ona toe fo‘i mai ai lea o Ierepoamo nai Aikupito.
3 ‘Ona latou ‘a‘auina atu lea nisi ē ‘a‘ami atu ‘iā te ia. ‘Ona ō mai ai lea o Ierepoamo ma Isaraelu uma, ‘ua latou tautala atu ‘iā Reopoamo, ‘ua fa‘apea atu,
4 “Na fa‘amamafaina e lou tamā la matou amo; o lenei, ‘ia e fa‘amāmā le galuega tigā a lou tamā, ma lana amo mamafa na ia fa‘ae‘etia ‘iā te i matou, ‘ona matou ‘au‘auna ai lea ‘iā te oe.”
5 ‘Ona fai atu lea o ia ‘iā te i latou, “E tolu aso ‘ona ‘outou toe ō mai ai lea ‘iā te a‘u.” ‘Ona ō ai lea o le nu‘u.
6 ‘Ona filifili lea o le tupu o Reopoamo ma toeaina ē na tutū i luma o lona tamā o Solomona ‘ina o soifua o ia, ‘ua fa‘apea atu, “Se a sa ‘outou e fai mai e tali atu ai i lenei nu‘u?”
7 ‘Ona latou fai mai lea ‘iā te ia, ‘ua fa‘apea mai, “‘Āfai ‘e te agalelei atu i lenei nu‘u ma fa‘alotomalie ‘iā te i latou ma tautala atu ‘iā te i latou i ‘upu lelei, ‘ona fai ai lea o i latou mau ‘au‘auna i aso uma.”
8 A ‘ua tu‘ua e ia le ‘upu a toeaina na latou fa‘atonu mai ai ‘iā te ia, ‘ona filifili lea o ia ma taulele‘a o ē na tutupu fa‘atasi ma ia, o ē ‘ua tutū i ona luma.
9 ‘Ua fai atu ia ‘iā te i latou, “Se a sa ‘outou na e fai mai ‘ina ‘ia tatou tali atu ai i lenei nu‘u ‘ua tautala mai ‘iā te a‘u, ‘ua fa‘apea mai, ‘‘Ia e fa‘amāmā le amo na fa‘ae‘etia e lou tamā ‘iā te i matou?’”
10 ‘Ona fai mai lea ‘iā te ia o taulele‘a ē na tutupu fa‘atasi ma ia, ‘ua fa‘apea mai, “‘Ia e fa‘apea ‘ona tali atu i le nu‘u ‘ua tautala mai ‘iā te oe, ‘ua fa‘apea mai, ‘Na fa‘amamafaina e lou tamā o la matou amo, a ‘ia e fa‘amāmāina ‘iā te i matou;’ ‘ia e fa‘apea atu ‘iā te i latou, ‘O lo‘u lima tama e telē lava lea i le sulugātiti o lo‘u tamā.
11 Na fa‘ae‘etia e lo‘u tamā le amo mamafa ‘iā te ‘outou, a o lenei, ‘ou te fa‘aopoopoina atu i la ‘outou amo; na a‘oa‘i atu lo‘u tamā ‘iā te ‘outou i sasa, a o a‘u, ‘ou te a‘oa‘i atu ‘iā te ‘outou i akarava.’”
12 ‘Ua ō mai Ierepoamo ma le nu‘u uma ‘iā Reopoamo i le aso tolu, e pei ‘ona fai mai ai o le tupu, ‘ua fa‘apea mai, “Tou te toe fo‘i mai ‘iā te a‘u i aso e tolu.”
13 ‘Ona tali atu lea o le tupu ‘iā te i latou ma le sauā; ‘ua tu‘ua e le tupu o Reopoamo le ‘upu a toeaina;
14 a ‘ua tautala atu ‘iā te i latou e tusa ma le ‘upu a taulele‘a, ‘ua fa‘apea atu, “Na fa‘amamafaina e lo‘u tamā o la ‘outou amo, a ‘ou te fa‘aopoopo i ai; na a‘oa‘i atu lo‘u tama ‘iā te ‘outou i sasa, a ‘ou te a‘oa‘i atu ‘iā te ‘outou i akarava.”
15 ‘Ua lē fa‘alogo le tupu i le nu‘u; auā mai le Atua lea mea, ‘ina ‘ia fa‘ataunu‘u ai e le ALI‘I lana afioga, na fetalai mai ai na ‘aumaia e Akia le Sailo ‘iā Ierepoamo le atali‘i o Nepata.
16 ‘Ua iloa e Isaraelu uma lava e le‘i fa‘alogo mai le tupu ‘iā te i latou, ‘ona tali atu lea o le nu‘u i le tupu, ‘ua fa‘apea atu,“So matou tofi ‘ea Tavita?E lē so matou tofi le atali‘i o Iese;Isaraelu e, ta‘itasi ma alu i lona fale ‘ie.O lenei, Tavita e, faitalia oe i lou lava ‘āiga.”‘Ona ō ai lea o Isaraelu uma i o latou fale ‘ie.
17 A o le fānauga a Isaraelu sa nonofo i ‘a‘ai o Iuta, ‘ua fai Reopoamo ma tupu ‘iā te i latou.
18 ‘Ona ‘auina atu lea e le tupu o Reopoamo o Aturamo o lē na pule i taulaga; a ‘ua fetogi le fānauga a Isaraelu ‘iā te ia i ma‘a, ‘ua oti ai o ia. ‘Ona fa‘ata‘alise lea o le tupu o Reopoamo e alu a‘e i lona kariota, e sola atu i Ierusalema.
19 Na fōua e Isaraelu le ‘āiga o Tavita, ‘ua o‘o mai lava i nei ona po.