1 ‘Ua mavae ia mea uma ‘ona ō atu ai lea o Isaraelu uma sa i le tausamiga i ‘a‘ai o Iuta ma latou tu‘imomoia o tupua ma vavae i lalo o tupua o Asaira, ma lepetia mea maualuluga ma fatafaitaulaga sa i Iuta uma ma Peniamina ma Efaraima ma Manase, ‘ua o‘o ‘ina fa‘aumatia. ‘Ona toe fo‘i ai lea o le fānauga uma a Isaraelu, e ta‘itasi i lona tofi, ‘iā latou ‘a‘ai.
2 ‘Ona tofia lea e Esekia o vasega o le a‘u ositaulaga ma sa Levī, e tusa ma o latou vasega, e ta‘itasi le tagata e tusa ma lana galuega, o le ‘au ositaulaga ma sa Levī e fai ai taulaga mū ma taulaga fa‘afetai, e ‘au‘auna ma fa‘afetai ma vivi‘i atu i faitoto‘a o toagalauapi a le ALI‘I.
3 ‘Ua tu‘uina fo‘i o le vaega o ‘oloa a le tupu mo taulaga mū, o taulaga mū i le taeao ma le afiafi, ma taulaga mū i sapati ma masina fa‘ato‘ā va‘aia, ma tausamiga, e pei ‘ona tusia i le tulafono a le ALI‘I.
4 ‘Ua ia fai atu fo‘i i le nu‘u o ē ‘ua nonofo i Ierusalema ‘ia ‘aumai le vaega o mea mā le ‘au ositaulaga ma sa Levī, ‘ina ‘ia fa‘amalosia i latou i le tulafono a le ALI‘I.
5 ‘Ua o‘o atu le poloa‘iga, ‘ona ‘aumai ai lea o mea e tele e le fānauga a Isaraelu, o le fa‘apolopolo o saito ma uaina ma suāu‘u ma meli ma le fua uma o le lau‘ele‘ele; o mea fo‘i e sefulua‘i mea uma na latou ‘aumaia e tele lava.
6 O le fānauga fo‘i a Isaraelu ma Iuta, o ē ‘ua nonofo i ‘a‘ai o Iuta, na latou ‘aumaia fo‘i o mea e sefulua‘i povi ma mamoe ma mea e sefulua‘i mea pa‘ia ‘ua fa‘asāina i le ALI‘I lo latou Atua ma latou tu‘u faupuega.
7 Na amata ‘ona fai o faupuega i le tolu o masina, a ‘ua fa‘auma ‘ona fai i le fitu o masina.
8 ‘Ona ō mai lea o Esekia ma ali‘i, ‘ua matamata i faupuega, ‘ona latou fa‘amanū atu lea i le ALI‘I ma lona nu‘u o Isaraelu.
9 ‘Ona fesili atu lea o Esekia i le ‘au ositaulaga ma sa Levī pe fa‘apefea faupuega.
10 ‘Ona tali mai lea ‘iā te ia o Asaraia le ositaulaga sili o le ‘āiga o Satoka, ‘ua fa‘apea mai, “Talu ‘ona amata ‘ona ‘aumai o taulaga i le fale o le ALI‘I, ‘ua tele a matou mea e ‘ai, ‘ua tele fo‘i mea o totoe; auā ‘ua fa‘amanuia e le ALI‘I o lona nu‘u; ma ‘ua totoe o nei mea e tele.”
11 ‘Ona fai atu ai lea o Esekia ‘ia sauniuni ni potu i le fale o le ALI‘I; ‘ona latou sauni ai lea.
12 ‘Ona latou ‘aumai ai lea ma le fa‘amaoni o taulaga ma mea e sefulua‘i mea ma mea na fa‘asāina; na pule ai fo‘i Kononia o lo sa Levī ma Semi lona uso o lē aupito ane ‘iā te ia.
13 O Ieielu fo‘i ma Asesau ma Nakato ma Asaelu, ma Ierimota ma Iosapata ma Elielu ma Isemakia ma Makata ma Penaia, o matai ia ‘ua pule i ai Kononia ma Semi lona uso, e tusa ma le poloa‘i mai ‘iā Esekia le tupu ma Asaraia o le pule i le fale o le Atua.
14 O Kori le atali‘i o Iemina o lo sa Levī, o le leoleo faitoto‘a i le itū i sasa‘e, ‘ua pule o ia i taulaga ‘ua loto lava tagata ‘ina fai i le Atua, e tufatufa taulaga a le ALI‘I ma mea ‘ua sili ‘ona pa‘ia.
15 O ē ‘ua aupito ane ‘iā te ia o Etena ma Meneamina ma Iosua ma Semaia ma Amaria ma Sekania, i ‘a‘ai o le ‘au ositaulaga, e avatu ai ma le fa‘amaoni i o latou uso, e tusa ma o latou vasega, o ē ‘ua sili ‘atoa ma ē iti;
16 e fa‘aopoopoina o ē ‘ua tusia i le gafa o tane, e āfua i ē ‘ua tolu o latou tausaga ‘atoa ma ē ‘ua matutua ai, e avatu ‘iā te i latou ta‘itasi o ē ulufale i le fale o le ALI‘I, o le aso ma le mea e avatu mo a latou galuega i o latou tausiga e tusa ma o latou vasega;
17 ma ē ‘ua tusia i le gafa o le ‘au ositaulaga i ‘āiga o latou tamā ma sa Levī e āfua i ē ‘ua luafulu o latou tausaga ‘atoa ma ē ‘ua matutua ai, i o latou tausiga e tusa ma o latou vasega;
18 ma ē ‘ua tusia i le gafa, o latou tamaiti uma, o a latou avā ma o latou atali‘i ma o latou afafine, i le fa‘apotopotoga uma; auā ‘ua matuā fa‘apa‘iaina i latou e i latou i o latou lava tofiga;
19 o le fānauga fo‘i a Arona o le ‘au ositaulaga sa i fanua o tuāfanua o a latou ‘a‘ai, i ‘a‘ai ta‘itasi uma, o tagata ‘ua ta‘ua o latou igoa, e avatu ai tufa‘aga i tane uma o i le ‘au ositaulaga ma i latou uma ‘ua tusia i le gafa o sa Levī.
20 Sa fa‘apea ‘ona faia e Esekia i Iuta uma, ‘ua ia faia fo‘i le amio lelei ma le tonu ma le fa‘amaoni i luma o le ALI‘I lona Atua.
21 O mea uma na ia amata ‘ona fai i le galuega o le fale o le Atua ma le tulafono ma poloa‘iga e sā‘ili‘ili i lona Atua, ‘ua faia e ia ma lona loto ‘atoa ma ‘ua manuia.